Budyšin (SN). K wirtuelnej wuměnje nazhonjenjow schadźowałoj stej so wčera Europski wuběrk čěskeho Senata a čłonojo wuběrka za prawo, demokratiju a Europu Sakskeho krajneho sejma. Prěnju wuměnu tajkeho razu nastorčił bě předsyda čěskeho wuběrka Mikuláš Bek.
W něhdźe hodźinu trajacej rozmołwje dźěše mjez druhim wo saksko-čěske zhromadne dźěło we wobłukach wobchad, strukturna změna, energijowe hospodarstwo, wobswět a medicinske zastaranje. We wuběrkomaj běchu sej přezjedni, zo trjebaja předewšěm młodźi ludźo impulsy za wuměnu. Tak chcedźa projekty podpěrać, z kotrymiž maja młodźi ludźo na woběmaj bokomaj mjezy składnosć so zetkawać. „Chcemy nazhonjenja pandemije wužić a zastatki zhromadneho dźěła nachwatać, kotrež su nanuzowaneje přestawki dla nastali“, rjekny Marko Šiman (CDU), předsyda sakskeho wuběrka. Wotnětka chcedźa so čěscy a sakscy zapósłancy prawidłownje schadźować, nazymu zaso wosobinsce.
Berlin (dpa/SN). „Zwjazkowe nuzowe borzdźidło“ z jednotnymi naprawami při wulkej ličbje koronainfekcijow móže po měnjenju zwjazkoweje kanclerki Angele Merkel (CDU) kónc junija wuběžeć. „Wone móže so skónčić“, rjekny Merkel wčera w Berlinje. Zdobom wona w padźe zaso přiběraceje ličby infekcijow wujasni: „Dyrbjało-li so něšto přez mutacije wuwić, čehož so njenadźijamy, móžemy borzdźidło kóždy čas reaktiwizować.“
W aprylu wobzamknjene cyłoněmske škitne naprawy su w zakonju wo škiće ludźi před infekcijemi hač do 30. junija wobmjezowane.
Kaž Angela Merkel potwjerdźi, je nuzowe borzdźidło k tomu přinošowało třeću žołmu korony zadźeržeć. Wona dźakowaše so ludźom za rozumnosć a napinanja w minjenych měsacach, zdobom pak rjekny: „Korona tu hišće je, byrnjež incidency k našemu wjeselu woteběrali. Dyrbimy dale rozumni wostać.“
Hinak hač kanclerka sej strowotniski politikar CDU Erwin Rüddel žada, borzdźidło mutacijow dla podlěšić.
Windhuk (dpa/SN). Zwjazk włodykow ludowych skupin Herero a Nama w Namibiji je wot Němskeje namjetowane zrěčenje wotpokazał, z kotrymž zwjazkowe knježerstwo złóstnistwa němskeje kolonialneje mocy před wjace hač sto lětami w dźensnišej Namibiji jako ludomordarstwo připóznawa. Woni sej žadaja, zo so planowana ceremonija podpisanja mjez Němskej a Namibiju přestorči.
Wot zwjazkoweho knježerstwa namjetowane wupłaćenje cyłkownje 1,1 miliardy eurow přez 30 lět je „šokowace wuznaće njezamóžnosće“, „njeakceptabelne“ a „afront přećiwo našej eksistency“, zdźělichu zastupnicy wot namibiskeho knježerstwa připóznateje rady włodykow we wčera wozjewjenym stejišću. „Ranjacu sumu pjenjez“ woni wotpokazuja.
Kopenhagen (dpa/SN). Po rozprawach wo zhromadnym dźěle danskeje tajneje wojerskeje słužby FE z ameriskej tajnej słužbu NSA při wobčušlenju zwjazkoweje kanclerki Angele Merkel (CDU) a dalšich wodźacych politikarjow je so knježerstwo w Kopenhagenje wot tuteje praksy wotposkanja distancowało. Zakitowanska ministerka Trine Bramsen rjekny na naprašowanje powěsćernje dpa, zo ma „systematiske wobčušlenje wuskich zwjazkarjow za njeakceptabelne“.
Rešeršowy zwjazk wokoło danskeho rozhłosoweho sćelaka DR kaž tež NDR, WDR a Süddeutsche Zeitung bě, powołujo so na anonymne žórła, rozprawjał, zo je NSA z pomocu Danskeje mjez 2012 2014 zaměrnje europskich wodźacych politikarjow wotposkała. K wobčušlenym słušachu nimo Merkel tež dźensniši zwjazkowy prezident Frank-Walter Steinmeier, bywši kanclerski kandidat SPD Peer Steinbrück kaž tež načolni politikarjo Šwedskeje, Norwegskeje a Francoskeje. Whistleblower Eduard Snowden bě hižo w lěće 2013 masowe a swět wopřijace čušlenje NSA wotkrył. Njewotwisne přepytowanja su to nětko wobkrućili.
Spěšneje reakcije dźesaćlětneho dla je policija w Düsseldorfje ćeknjeneho zawinowarja njezboža zwěsćić móhła. Hólčec bě wobkedźbował, kak małotransporter do parkowaceho awta zrazy a je tak do dalšeho jězdźidła storči. Hólčec sej čisło na tafličce awta spomjatkowa a nana namołwi, policiju informować. Ta móžeše 41lětneho šofera transportera spěšnje zwěsćić a sćaza jemu jězbnu dowolnosć. Dźesaćlětnemu pachołej radźa, so pozdźišo na kóždy pad z policistom stać.
Paduši hromaka su na polu w južnej Hessenskej na šěsć kilometrach hromak „žnjeli“ a so z rubiznu 300 kilogramow zminyli. Po informacijach policije běchu njeznaći pakostnicy w nocy na njedźelu profesionalnje postupowali, jako hromak korektnje kałachu a nastate dźěry w nasypach zaso porjadnje zamjetachu. Škoda wučinja 3 000 eurow.
Vatikan (B/SN). Na lěta 1956 załoženym „Preseminario Pio X.“, jeničkemu kubłanišću z internatom we Vatikanje ze statnje připóznatym šulskim wotzamknjenjom, přihotuja so hólcy tež jako ministranća na bohosłužby w Pětrowej cyrkwi, hdźež k wołtarjej słuža. Dotal bydli něhdźe 30 hólcow we Vatikanje. W sudniskim procesu pak přepruwuja nětko seksualne znjewužiwanje, šikany a zanjechanja dohladowarskeje słužby w lětach 2006 do 2012 přez wyšich ministrantow a pozdźišich měšnikow. Něhdyšemu 71lětnemu rektorej zarjadnišća wumjetuja, zo je skućićelow krył. Bamž Franciskus so kategorisce za přećah internata zwonka Vatikanskich murjow do města Roma zasadźa, zo bychu přichodni chowancy we wjetšej transparency žiwi byli. Najpozdźišo w septembrje ma seminar přeměstnjeny być.
Židow lěpje škitać
Berlin (dpa/SN). Zwjazkowy minister za strowotnistwo Jens Spahn (CDU) wočakuje, zo budźe hač dosrjedź julija něhdźe 90 procentow wšitkich zwólniwych přećiwo koronawirusej šćěpjenych. To je wón wčera wječor w telewiziji ARD připowědźił. Spahn z toho wuchadźa, zo je 70 do 75 proc. dorosćenych zwólniwych so šćěpić dać. Zdobom pokaza tež na dynamiku šćěpjenja w Němskej: Bě-li k jutram dwanaće proc. ludźi šćěpjenych, je jich nětko 40 procentow.
Lětadło přepytali
Schönefeld (dpa/SN). Njeplanowane přizemjenje pasažěrskeho lětadła předewzaća Ryanair na Schönefeldskim lětanišću měješe po informacijach medijow wěstotne přičiny. Mašina po puću z irskeho Dublina do Krakowa bě minjenu nóc w Schönefeldźe přizemiła, po tym zo bě powětrowa wěstotna kontrola wobsadku lětadła informowała. Na lětanišću su pasažěrow a jich wačoki kontrolowali. Pječa bě něchtó telefonisce hrozył, zo je bomba w lětadle. Namakali pak ničo njejsu.
Ruska podpěruje Běłorusku