Berlin (dpa/SN). Kultusowi ministrojo zwjazkowych krajow chcychu dźensa wo dalšim postupowanju w šulach w časach koronapandemije wuradźować. W dźewjeć z cyłkownje 16 zwjazkowych krajow so njedźelu jutrowne prózdniny skónča. Rozmołwa kultusowych ministrow słuži tež přihotowanju přichodneho koronoweho wjerška ministerskich prezidentow a zwjazkoweje kanclerki Angele Merkel (CDU) přichodnu póndźelu.
Hospodarstwo chce koncept
Berlin (dpa/SN). Zwjazkowy minister za hospodarstwo Peter Altmaier (CDU) je dźensa na „hospodarskim wjeršku“ ze zastupnikami wjace hač 40 hospodarskich zwjazkow wuradźował. W srjedźišću steješe posudźowanje aktualneho połoženja hospodarstwa w koronakrizy, debata wo dalšim přiwótřenju naprawow a winowatosće zawodow, swojich sobudźěłaćerjow testować. Hospodarstwo kritizuje stajnje so měnjace naprawy a žada sej dołhodobny a spušćomny koncept.
Wo financach rěčeli
Zwuk mjez twarcom elektroawtow Tesla z USA a zamołwitymi w Braniborskej zdawa so wótriši być hač hišće před něšto časom, štož bě poprawom wočakować. Z euforiskim připowědźenjom, w hoberskej tworni njedaloko Berlina kóždolětnje 500 000 elektroawtow twarić a tysacy nowych dźěłowych městnow wutworić, běchu wšitke zadźěwki zwoprědka tak derje kaž přewinjene. Zo steji nowa fabrika wosrjedź wodoškitneho pasma a zo přetrjeba raz telko wody kaž město ze 60 000 wobydlerjemi, njebě naraz tak zlě. A lěs na terenje zawoda bě přez nóc pušćeny.
Mjeztym pak je někotryžkuli komunalny politikar z euforije wotućił a so praša, hač budźe wšitko woprawdźe tak wulkotne kaž připowědźene. Je elektroawto jenički přichod našeje mobilnosće? Změje region wony hospodarski rozmach kaž wěsćeny? Dwěle zamołwitych a wobmyslenja ludźi su dźeń a wjetše. Někotryžkuli so mjeztym boji, zo su sej hoberski problem nabrěmjenili. Marko Wjeńka
Waršawa (dpa/SN). Pólska podlěša škitne naprawy přećiwo koronawirusej hač do 18. apryla. Połoženje w chorownjach je dale jara komplikowane, zdźěli minister za strowotnistwo Adam Niedzielski wčera we Waršawje. To płaći wosebje za Šlesku. Po informacijach ministerstwa lěkuja tuchwilu po wšěm kraju 34 700 na koronawirus schorjenych pacientow w chorownjach, telko kaž hišće ženje po wudyrjenju pandemije. Wjace hač 3 300 z nich dyrbja kumštnje z kislikom zastarać. Šule a pěstowarnje wostanu dale zawrjene. Tež frizerojo a kosmetiske studija njesmědźa wočinjeć.
Pólska bědźi so tuchwilu z třećej žołmu koronapandemije. Minjeny tydźeń bě ličba nowych infekcijow w běhu dnja rekordnu ličbu 35 251 docpěła. Wčera běchu hišće 14 910 nowych infekcijow w běhu 24 hodźin zličili. 638 dalšich ludźi je na sćěhi wirusa zemrěło. Niedzielski nima woteběracu ličba za dosahacu přičinu, wobmjezowanja zaso zběhnyć. Němska je Pólsku jako kraj z wulkej incidencu zastopnjowała. Polacy, kotřiž chcedźa do Němskeje přijěć, dyrbja negatiwny koronowy test předpołožić.
Praha (dpa/SN). Čěski ministerski prezident Andrej Babiš je mjeztym třeći króć po wudyrjenju koronapandemije ministra za strowotnistwo wuměnił. Dotalny mějićel zastojnstwa, Jan Blatný, je wčera na nowinarskej konferency w Praze zdźělił, zo su jeho wotwołali. Je to „politiski rozsud“ knježerstwoweho šefa, Blatný rjekny. Nowy minister za strowotnistwo budźe manager chorownje Petr Arenberger. 62lětny nawjedowaše dotal uniwersitny klinikum Praha-Vinohrady.
Pozadk personalneho rozsuda je zwada wo móžne nuzowe přizwolenje wjele diskutowaneho ruskeho šćěpiwa Sputnik V. Blatný chcyše rozsud europskeho zarjada za dohladowanje lěkow wočaknyć. Na to bě jemu Ruskej přichileny prezident Miloš Zeman wumjetował, zo je „zadźěwk“. Arenberger je wotewrjeny za zasadźenje ruskeho seruma w Čěskej. „Znaju tójšto pacientow, kotřiž na Sputnik čakaja“, rjekny wón w rozmołwje z nowinarjemi. Opozicija kritizuje, zo trjeba knježerstwo Blatnýja za winika za swójske zmylki. W Čěskej wola za šěsć měsacow nowy parlament. Dotal je tam 27 329 ludźi na koronawirus zemrěło.
Piwo pijaceho paducha medikamentow w swojej praksy překwapił je lěkar w Bielefeldźe. Medicinar bě rano zahe do praksy přišoł a při recepciji nakupowansku titu z lěkami wuhladał. Jako słyšeše zwuki w lěkarskej stwě, dźěše pohladać. Tam steješe jemu cuzy muž z blešku piwa napřećo. Po krótkej rozmołwje so paduch bjez swojeje rubizny zminy. Policija zwěsći, zo bě so přez pinčne wokno zadobył.
Do awta bywšeho awstralskeho premierministra zalězła je skupina napitych młodostnych, dokelž mějachu jeho za šofera taksija. Kevin Rudd pytaše runje za parkowanišćom, po tym zo bě swoju dźowku před hosćencom wotsadźił. Při sylnym dešću so na to młodostni do awta tłóčachu. Rudd měješe zrozumjenje a wjesołu skupinu wožeše. Hakle po něšto času skupina zwěsći, zo sedźeše za wodźidłom bywši ministerski prezident.
Berlin (dpa/SN). Zwjazkowy minister za strowotnistwo Jens Spahn (CDU) chcyše dźensa ze swojimi kolegami ze zwjazkowych krajow wo dalšim postupowanju nastupajo šćěpjenje ludźi přećiwo koronawirusej wuradźować. Stajna šćěpjenska komisija bě doporučiła, zo měli ludźo pod 60 lětami, kotřiž maja hižo prěnju sykawu ze srědkom AstraZeneca, při druhim šćěpjenju hinaši serum dóstać, zo by strach trombozow woteběrał.
USA šćěpjenski porjad zběhnu
Washington (dpa/SN). W USA chcedźa hišće tutón měsac wšitkim dorosćenym termin šćěpjenja přećiwo koronawirusej poskićić. Wot 19. apryla smě so kóždy dorosćeny w USA do rynka čakacych nastupić, zo by šćěpjenje dóstał. Tole je prezident Joe Biden připowědźił. Ze zběhnjenjom dotalneho šćěpjenskeho porjada chcedźa docpěć, zo móža wjace ludźi hišće spěšnišo šćěpić. Knježerstwo kruće z tym liči, zo změja hač do kónca meje dosć seruma w kraju k dispoziciji.
Mócnarjo krizu znjewužiwaja