Bagdad/Rom (dpa/SN). Po nimale štyrjoch dnjach je bamž Franciskus swoju historisku jězbu po Iraku zakónčił a so wčera popołdnju do Roma nawróćił. Franciskus je prěni bamž, kiž je Irak wopytał. Předewšěm křesćenjo na sewjeru kraja běchu sej to přeli. Sobotu witachu tysacy ludźi 84lětneho w Mossulu a Karakoshu, hdźež so najebać koronapandemiju na dróhach zhromadźichu. W Mossulu modleše so bamž na cyrkwinskim naměsće, kiž je ze swojimi zničenymi cyrkwjemi symbol ćerpjenja křesćanow za čas wójny přećiwo teroristiskej milicy Islamski stat. Njedźelu popołdnju swjećeše wón swoju poslednju Božu mšu w koparskim stadionje kurdiskeje stolicy Erbil před tysacami wěriwych. Při tym wužiwaše w arenje swój „papa-mobil“.
W dnjach do toho bě najwyši šiitiski duchowny, wulkoajataloh Ali al-Sistani, swjateho wótca na rozmołwu přijał. Mjezynarodne medije wuzběhuja jězbu Franciskusa do Iraka hladajo na chětro dwělomne wěstotne połoženje w kraju jako přewšo zmužity skutk.
Saarbrücken/Stuttgart (dpa/SN). Posaarski ministerski prezident Tobias Hans sej žada wšitke pady dospołnje wotkryć, w kotrychž su so zapósłancy, wužiwajcy tuchwilnu koronakrizu, wosobinsce wobohaćili. „Dyrbimy wotkryć a sej wobhladać: Hdźe je tomu snano runje tak było“, rjekny politikar CDU wčera w krajnym sejmje w Saarbrückenje. „Nětko dyrbi wšitko na blido.“
Zapósłancaj Georg Nüßlein (CSU) a Nikolas Löbel (CDU) staj pječa prowizije wjace hač 100 000 eurow za posrědkowanje nahubnikow brałoj. Wobaj staj mjeztym z frakcije wustupiłoj. Po spočatnym wahanju je Löbel wčera tež mandat jako zapósłanc zwjazkoweho sejma złožił. Do toho běchu jeho wjacori politikarjo CDU a měšćanske zwjazki ze zdźěla drastiskimi słowami k tomu namołwjeli
Na wšě 83 900 eurow namakała je policija w ručnym fašku wosoboweho awta na awtodróze A 61 pola sewjerorynsko-westfalskeho Nettetala. Kontrolujo awto njedaloko nižozemskeje mjezy nańdźechu zastojnicy pjenjezy w listowej wobalce. 58lětny šofer dawaše „spřećiwjace so informacije“ wo tym, zwotkel pjenjezy pochadźeja. Mnóstwa wjace hač 10 000 eurow dyrbja na namjeznych přechodach do Němskeje přizjewjene być.
Jědnaćelětneho paducha awta je policija w delnjosakskim Gifhornje lepiła. Šofer bě awto skrótka wopušćił, zo by sej při kiosku něšto k jědźi kupił. Klučik drje bě tčacy wostajił. Jědnaćelětny z 13lětnym towaršom to wuži a wotjědźe. 31lětny wóz z druhim awtom přesćěhowaše. Mjeńšiny pozdźišo pokradnjene jězdźidło na křižowanišću do dalšeho awta zrazy. Škoda: 12 000 eurow.
Rom (B/SN). Kejžor Konstantin Wulki je 3. měrca 321 přikazał, zo maja sudnicy, zawody a měšćanske wobydlerstwo njedźelu wotpočnyć. Jenož wjesni wobydlerjo smědźachu wusywać, žnjeć a skót zastarać. Tón pisomny dokument je hač do dźensnišeho zachowany. Wědomostnicy tukaja, zo bě so kejžorej židowske rjadowanje tydźenja ze sedmym dnjom jako sabat zalubiło. Sedmy dźeń bu po přikazu kejžora Konstantina Bohu słónca wěnowany.
Wustupy z cyrkwje hroža
Berlin (B/SN). „Dokelž so reformy w katolskej cyrkwi dlija, hrozy strach, zo so cyrkej šćěpi.“ Tole zwěsća historikarka a profesorka na Berlinskej Humboldtowej uniwersiće Birgit Aschmann. Jako čłonka Centralneho komiteja katolikow a synodalneho puća wona tež hibanje „Maria 2.0“ stajnje zaso pozbudźa, dale wo runoprawosć žonow wojować. „To wožiwja debaty mjez doprědkarskimi a konserwatiwnymi kruhami, mjez biskopami a lajkami.“ Přećiwnicy měšniskeje swjećizny za žónske dźě skedźbnjeja zas a zaso na pastyrski list „Ordinatio Sacerdotalis“ z lěta 1994, kotryž bě tehdyši bamž Jan Pawoł II spisał.
Ludnosć surowy hłód trada
Berlin (dpa/SN). Předsyda FDP Christian Lindner namjetuje, wurjadneho přepytowarja zasadźić, zo móhli aferu dweju zapósłancow zwjazkoweho sejma w zwisku z wobstaranjom škitnych koronanahubnikow wujasnić. Přepytowar měł prawo měć, jako njewotwisna wosoba tež dohlad do aktow dóstać. Afera měła do wólbow zwjazkoweho sejma wotzamknjena być. Zapósłancaj Georg Nüßlein (CSU) a Nikolas Löbel (CDU) běštaj prowiziju wjace hač 100 000 eurow za wobstaranje nahubnikow dóstałoj.
Testy hišće wšudźe nimaja
Berlin (dpa/SN). Organizować spěšnotesty na koronawirus je apotekam w Němskej wulke wužadanje. Njebudźe móžno to hnydom a wšudźe zwoprawdźić, rjekny prezidentka zwjazka apotekarjow Němskeje Gabriele Regina Overwiening w rańšim magacinje telewizije ZDF. Wot dźensnišeho maja wobydlerjo prawo, so jónu wob tydźeń darmotnje na koronawirus testować dać. Hladajo na problemy z testami opozicija strowotniskemu ministrej Jensej Spahnej (CDU) wumjetuje, zo je akciju špatnje přihotował.
Proces morjenja dla zahajeny
Berlin/Podstupim (SN). Zwjazkowa rada je na swojim posedźenju minjeny pjatk wotpokazanje wuspěšneje europskeje wobydlerskeje iniciatiwy MinoritySafePack Federalistiskeje unije europskich narodnych mjeńšin ze stron komisije Europskeje unije na wědomje brała.
Braniborski krajny społnomócnjeny za naležnosće Serbow, kulturny statny sekretar Tobias Dünow, zwurazni swoju přesłapjenosć nad rozsudom EU, „zo njeje komisija EU ani jenički nastork wuspěšneje wobydlerskeje iniciatiwy přewzała“. Dünow rěči wo briskěrowanju 1,2 milionow wobydlerjow, kotřiž su so za tule mjeńšinowu iniciatiwu zasadźeli. „Kraj Braniborska pak budźe so njedźiwajcy toho na swojej mjeńšinowej politice kruće dźeržeć a kulturnu a rěčnu mnohotnosć dale spěchować“, pisa Dünow w nowinskej zdźělence. Z tajkej mnohotnosću zwjazuje kraj hordosć, „serbski lud a němscy Sintojo a Romojo su integralny wobstatk našeje towaršnosće, našich stawiznow, našeje kultury – a dźěl europskeho kulturneho namrěwstwa“.
Ze swjedźenskim aktom je so swjedźenske lěto „1 700 lět židowske žiwjenje w Němskej“, wusyłanym w telewiziji ARD, 21. februara zahajiło. Nětko je w zhromadnym dźěle społnomócnjeneho sakskeho knježerstwa za židowske žiwjenje Thomasa Feista a syće Židowske žiwjenje z.t. brošura „Židowske žiwjenje w Sakskej“ wušła, kotraž tudyšich akterow a projekty předstaja.
Budyšin/Drježdźany (SN/at). Na nimale sto stronach wopisuja židowskej wosadźe Kamjenica a Drježdźany kaž tež israelitisku nabožinsku wosadu w Lipsku, nimo toho wjace hač 30 po cyłej Sakskej skutkowacych towarstwow a iniciatiwow. Podate su nimo toho wosebje za swjedźenske lěto koncipowane zarjadowanja, kaž čitanja, wustajeńcy, koncerty a diskusijne formaty. Kaž społnomócnjeny za židowske žiwjenje Thomas Feist informuje, wudospołnjeja tele zestajenje krótke stawizny židow w Sakskej, kalendariske nalistowanje wšitkich aktiwitow a glosar wo židowskich swjatkach w běhu lěta.