Wjace serbskich projektow zapřijeć
Budyšin (SN/MkWj). Parlamentariska přirada Załožby za serbski lud je so předwčerawšim, póndźelu, prawidłownje schadźowała, koronapandemije dla internetnje. Wobdźělnicy – zapósłancy, zwjazkoweho sejma, krajneju sejmow Sakskeje a Braniborskeje kaž tež zastupnicy wobeju knježerstwow – zaběrachu so spočatnje z financnym połoženjom załožby. Na wuradźowanju wobdźělištaj so tež předsydka załožboweje rady Susann Šenkec a direktor załožby Jan Budar, kaž předsyda parlamentariskeje přirady, Budyski zapósłanc CDU w Sakskim krajnym sejmje Marko Šiman, zdźěli.
Wobšěrnje rozjimowachu wobdźělnicy strukturnu změnu we Łužicy. Přezjedni sej woni běchu, zo dyrbjeli serbske projekty bóle zapřijeć a zo je w tym nastupanju hišće tójšto dźěła.
Jan Budar informowaše wo dotalnym wuwiću na polu digitalizacije a modernych medijow a wo dalšich nadawkach. Dźakowano přidatnym pjenježnym srědkam móžachu wot lěta 2015 hižo něštožkuli zdokonjeć. Přichodnje budźe wažne technologiski předskok wulkich porno mjeńšinowym rěčam, kaž serbskeje, krok po kroku nachwatać.
Do čorneho trjechili
Lěs ekologisce wobhospodarjeja
Přepytuja přećiwo demonstrantam
To a tamne (24.02.21)
Dale hač 80 metrow pod lodom nurił je Čech David Vencl w zamjerznjenym kupanskim jězoru pola Teplic. Sportowc njeje při tym žane pomocne srědki kaž pjericy (Flossen) wužiwał a bě jenož w kupanskich cholowach. Za čaru trjebaše wón 1,35 min., mjenje, hač bě sej myslił. Vencl nadźija so nětko zapisa w Guinnessowej knize rekordow. Dotalny swětowy rekord nurjenja pod lodom bjez pjericow a škitneho wobleka bě Dana Stig Severinsen lěta 2013 ze 76 metrami nastajił.
W myjerni awtow tčacy wostał je šofer transportera w Crimmitschauwje. 43lětny njebě wobkedźbował, zo je připrawa na 2,40 metrow wysoke jězdźidło wobmjezowana. Transporter pak bě wjele wyši. Jako program startowaše, bu třěcha zatłóčena a chětro wobškodźene awto wosta w připrawje wisajo.
W dialogu najprjedy pozicije zwěsćić
Na mjeztym 21. posedźenju Serbskeho sejma wobdźělichu so minjenu sobotu znowa podpěraćeljo a wjacori hosćo z europskeje, krajneje kaž tež wokrjesneje runiny.
Njebjelčicy/Drježdźany (SN/at). Wo zjawnoprawniskich zrěčenjach a strukturach k rozdźělenju přilubjenych srědkow w zwisku z kóncom wudobywanja brunicy kaž tež wo swojich naprašowanjach k njeličenym njejasnym detailam je zapósłanča Sakskeho krajneho sejma Antonia Mertsching na znowa wirtuelnje přewjedźenym posedźenju Serbskeho sejma rozprawjała. Sejm bě politikarku Lěwicy přeprosył. Jako serbskopolitiska rěčnica swojeje frakcije so wona dale zwólniwa wupraja, podpěrać objektiwne zwěsćenje stawa nastupajo aktualne połoženje serbskeho kubłanja w Sakskej kaž w Braniborskej po parlamentariskim puću. To Serbski sejm w nowinskej zdźělence piše.
Poł miliona woporow korony
Washington (dpa/SN). Wot spočatka pandemije je w USA wjace hač 500 000 ludźi po infekciji z koronawirusom zemrěło, kaž z datow Johnsa Hopkinsoweje uniwersity wuchadźa. „W jeničkim lěće pandemije je wjace Američanow wumrěło hač w Prěnjej a Druhej swětowej wójnje a we Vietnamskej wójnje hromadźe“, rjekny prezident USA Joe Biden. Wón zdobom wukaza, na wšitkich zjawnych twarjenjach chorhoje połwysoko powěsnyć.
Kubłarjo budu prjedy šćěpjeni
Berlin (dpa/SN). Za škit před koronainfekciju chcedźa wučerjow zakładnych a spěchowanskich šulow kaž tež kubłarjow dźěćacych přebywanišćow prjedy šćěpić, hač bě dotal planowane. To je předsyda konferency strowotniskich ministrow Zwjazka a krajow, bayerski strowotniski minister Klaus Holetschek (CSU), po wuradźowanju ze zwjazkowym ministrom za strowotnistwo Jensom Spahnom (CDU) připowědźił, budźe-li dosć šćěpiwa.
Ruska sankcije njeakceptuje
