Kritizuje korona-management
Drježdźany (dpa/SN). Předsydka frakcije Zelenych w Sakskim krajnym sejmje Franziska Schubert je management krajneho knježerstwa w koronakrizy jasnje kritizowała a swoju stronu při tym zapřijała. Po jeje słowach njeje „žana hańba“ jasnje rjec, zo njeběchu wšitke rozsudy wirusa dla runjewon zbožowne. Někotre wukazy njejsu ani prawnisce zawěsćene, kaž na přikład rjadowanje, zo njesmědźa so ludźo dale hač 15 kilometrow wot swojeho bydlenja zdalować.
Kaž Franziska Schubert dźenikej Sächsische Zeitung dale rjekny, běchu tež Zeleni po prěnjej žołmje koronawirusa dla wopak rozsudźili. Dramatisku situaciju w krematorijach su zamołwići tohorunja podhódnoćili. „Sebjekritika politiki je wuraz načasneje suwerenity“, 38lětna potwjerdźi, žadajo sej zdobom nowy stil politiki. Wobydlerjam posrědkować, zo je knježerstwo wšitko prawje činiło, je po jeje měnjenju wopačny a zestarjeny politiski stil. Sakska politika dyrbjała zmužita być „swoje nazhonjenja sprawnje reflektować a so skorigować“.
Zwada seruma dla
EU žada sej přehlad wo dodawanju šćěpiwa pře koronawirus
Brüssel/Berlin (dpa/SN). Njedosahaceho mnóstwa šćěpiwa přećiwo koronawirusej dla chcedźa wšitke eksporty srědka z Europskeje unije přichodnje registrować a wot wotpowědneje dowolnosće wotwisne sčinić. To je komisija EU wčera w Brüsselu přizjewiła. Pozadk je zwada ze zhotowjerjom seruma Astrazeneca, kiž chce EU najprjedy raz mjenje šćěpiwa přewostajić hač přilubjene. Hłowna přičina su pječa problemy při produkciji seruma. EU je hněwna a žada sej přilubjene mnóstwo, čehoždla planuje jutře dalše krizowe posedźenje z firmu.
Podlěšenje schwalene
To a tamne (26.01.21)
Jako mobilny dodawar jědźe je wobchadny policist w Jendźelskej zaskočił. Do toho bě posoł, kiž skazanu jědź wjezeše, ze swojim mopedom padnył a sej ruku złamał. Najebać bolosće a ćmu móžeše posoł zastojnika hač k domej w měsće Banstead južnje Londona wodźić, hdźež na jědź čakachu. „Dokelž sergeant Chris Schultze nochcyše, zo něchtó wo swoju skazanku přińdźe, je so wón rozsudźił jědź sam k ludźom dowjezć“, policija piše.
Při kradnjenju awta sej wusnył je paduch w bayerskim Weidenje. Jako so wobsedźer wčera k swojemu awtu wróći, widźeše 39lětneho spjaceho na sydle šofera. Prawdźepodobnje bě muž spytał, kable zwjazać a tak awto startować. Policija wšak zwěsći, zo steji wón wočiwidnje pod wliwom wopojnych srědkow. Z awtom drje 39lětny wotjěł njeje, načinjena wěcna škoda pak přiwšěm tysac eurow wučinja.
Biskop rěči k njekřesćanam
Zhorjelc (B/SN). Biskop Wolfgang Ipolt ze Zhorjelca je so w nowolětnym postrowje na njekřesćanow swojeho biskopstwa wobroćił. „Přeju wam wšěm, zo so přeco zaso mjez sobu natykujeće z nadźiju, zo w kóždejžkuli njewěstosći tež paniskemu strachej spřećiwiće.“ Biskop Ipolt zakónči swój postrow ze słowami: „Jenož tak do noweho lěta so kopolić, abo samo ze strachom a starosćemi so do njeho podać njeje naš zaměr. Zwěrju sej z wami za zhromadnym směrom pytać.“
Namołwja k solidariće
Drježdźany (B/SN). Prezident Sakskeho krajneho sejma Matthias Rößler (CDU) wšitkich ludźi namołwja, za čas koronapandemije w solidariće njepopušćić. „Tež w lěće 2021 dźe wo ‚my‘, nic wo ‚ja‘, nic wo indiwidualnosć“, rjekny CDU-politikar w swojej nowolětnej narěči krajnemu sejmej. Dźe wo „lubosć k blišemu, wo mjezsobnu kedźbnosć na dobro towaršnosće, wo křesćanske hódnoty. Koronapandemija je katastrofa, kotraž so cyle pomału wotměwa. Njemóžeš wšitko na stat, na profesionelnych pomocnikow suwać“, rjekny ewangelsko-lutherski křesćan. „Wo koronadiktaturje rěčeć je njezamołwite.“
Přewod mrějacych zaručić
Masterske dźěło předstajiła
Prawa Serbow při zachowanju přirodnych žiwjenskich zakładow kaž k znowadocpěću po kóncu wudobywanja brunicy su čłonojo Serbskeho sejma na swojim sobotnym online-posedźenju rozjimali. Nimo toho zhonichu wo jara zajimawym masterskim dźěle Klary Nagelojc.
Budyšin (SN/at). Hromadźe z Johannesom Rohrom z Instituta za ekologiju a akcisku etnologiju z Kölna a Karstenom Smidom z organizacije Greenpeace su sejmarjo prawa Serbow rozjimali, dźe-li wo to, jich přirodne žiwjenske zakłady zachować resp. po kóncu wudobywanja brunicy znowa docpěć. Kaž Serbske Nowiny z kruha wobdźělnikow zhonichu, su rozmołwnicy zdobom na wažne móžnosće jednanja pokazali. Tak měli na přikład nuznje za to skutkować, zo maja so po principje zawinowarja zarunanske płaćenja, kotrež je stat před něšto dnjemi koncernej Łužiska energija a milinarnje (LEAG) připrajił, za naslědne sćěhi jeho wobchodniskeje dźěławosće před insolwencu wěsće wróćo stajić a nimaja so jako profit wotćahnyć.
Dale přećiwo Trumpej
Washington (dpa/SN). W mjeztym druhim jednanju k wotsadźenju bywšeho prezidenta Donalda Trumpa planowachu dźensa dalšu kročel. Dom reprezentantow chcyše skóržbu přećiwo Trumpej druhej komorje parlamenta, senatej, dale posrědkować. Skóržbu z wumjetowanjom Trumpej „naškaranja rokoćenja“ chcychu tam předčitać. Demokraća chcedźa jeho nadběha přiwisnikow na Kapitol 6. januara dla chłostać. W padźe zasudźenja njeby Trump hišće raz za zastojnstwo prezidenta kandidować směł.
EU ćišć na koncerny zesylnja
Brüssel (dpa/SN). EU je zhotowjerjow šćěpiwa přećiwo koronawirusej hladajo na dlijace so dodawanje seruma před konsekwencami warnowała. „Wočakujemy, zo farmowe předewzaća wotzamknjene zrěčenja dodźerža“, rjekny prezident Rady EU Charles Michel rozhłosownikam. W nuzy chcedźa „juristiske srědki“ zasadźić. Wjacore koncerny, mjez druhim Biontech-Pfizer a britisko-šwedski koncern Astrazeneca, běchu připowědźili, zo njemóža přilubjene mnóstwo dozow šćěpiwa dodźeržeć.
Biden potwjerdźa zakaz
We wjacorych městach Nižozemskeje, kaž tule w Amsterdamje, je ...
Statna kenclija zakituje dialog Kretschmera
Drježdźany (dpa/SN). Sakska statna kenclija je dialog ministerskeho prezidenta Michaela Kretschmera (CDU) z kritikarjemi naprawow přećiwo koronawirusej zakitowała. „Demonstracija před domom ministerskeho prezidenta je jasnje pokazała, zo je mjez wobydlerjemi tójšto prašenjow, zo pak je na tamnym boku tójšto wopačnosćow wokoło korony“, zdźěli rěčnik knježerstwa Ralph Schreiber minjeny pjatk na naprašowanje medijow. Tohodla bě Kretschmer dialog we wobłuku zarjadowanja poskićił.
Schreiber na to pokaza, zo je so Kretschmer minjene tydźenje wospjet na zjawnych internetnych diskusijnych forumach wobdźělił a zo chce to tež pjatk, 29. januara, zaso činić. Internetne zarjadowanje pod hesłom „Fakty město wopačnosćow“ budźe zjawne a měri so na wšitkich wobydlerjow, wosebje na tych Žitawskich kónčin. Sobu diskutować chcedźa Žitawski wyši měšćanosta Thomas Zenker, lěkarski direktor Žitawskeje chorownje Mathias Mengel a nawodnica Zhorjelskeje hladarnje „Při měšćanskim parku“ Bergit Kahl.
Přiwisnikow Nawalneho zajeli
Moskwa (dpa/SN). Ruske wěstotne mocy su wjacorych demonstrantow zajeli, kotřiž běchu so před jastwom zhromadźili, w kotrymž je kritikar Krjemla Aleksej Nawalny zajaty. Sobudźěłaćerjo opozicionelneho wozjewichu wčera wideja, kotrež dokumentuja, kak čłonojo wosebiteje policajskeje jednotki OMON w Moskwje z retlemi demonstrantow bija a do nich teptaja. Druzy demonstranća tole widźo „hańba“ wołaja. Po wjetšej protestnej akciji wosrjedź města běchu so sta demonstrantow k wuwołanemu jastwu „Čisło jedyn“ na sewjerowuchodźe ruskeje stolicy podali.
Nawalneho, kotrehož běchu w awgusće zajědojćić spytali, zasudźichu dźens tydźenja w dwělomnym chwatnym sudniskim jednanju k 30 dnjam jastwa. 44lětny bě pječa wukazy so přizjewić ignorował, jako so w Němskej wot sćěhow atentata wočerstwješe. Nawalny ma postupowanje sudnistwa za politisce motiwowane.
Na protestach w sto ruskich městach je policija po informacijach organizatorow wčera 2 200 demonstrantow zajała.
