Drježdźany (dpa/SN). Pjeć měsacow po wotkryću ilegalneho wikowanja ze sćazanymi kolesami w rjadach Lipšćanskeje policije je sakski nutřkowny minister Roland Wöller (CDU) dźensa w nutřkownym wuběrku krajneho sejma kónčnu rozprawu eksterneje nutřkowneje rewizije předstajił. Po informacijach Lipšćanskich nowinarjow njesteji za předawanjom kolesow z azerwatoweje komory policije žana kriminelna syć.

Wot lěta 2015 praktikowane ilegalne wikowanje z kolesami běchu w juniju wotkryli. Wöllerej tehdy wumjetowachu, zo je korupciski skandal zatajił. Po informacijach statneho rěčnistwa su přepytowanja přećiwo 119 wosobam zahajili. Mjez nimi staj zamołwita składa a dalši sobudźěłaćer. 68 wobskorženych bě za čas njeskutkow ze zastojnikom, šesćo z nich pola krajneho kriminalneho zarjada. Jedna so wo tysac kolesow.

Mnichow (dpa/SN). Tuchwilu tankuja šoferojo awtow wšak přeco hišće poměrnje tunjo, dokelž njebě zemski wolij swětoweje hospodarskeje krizy dla minjene měsacy wjace prašany. Tuž běchu jeho płaćizny raznje woteběrali. Tole pak móhło so bórze změnić. Awtomobilowy klub ADAC wočakuje kónc lěta widźomnje přiběrace płaćizny bencina a diesela, dokelž je so zemski wolij minjene dny zaso podróšił. Tuchwilu so to hišće na płaćizny při tankownjach njewuskutkuje, kaž z wčera wozjewjenych ličbow kluba wuchadźa. Po tym płaćeše liter super E 10 po wšej Němskej přerěznje 1,204 ­eurow, 0,7 centow mjenje hač tydźeń do toho. Porno tomu je so diesel snadnje wo cent na 1,063 eurow podróšił. Tak stej bencin a diesel wo wjele tuńšej hač do wudyrjenja koronakrizy.

Mjeztym pak je płaćizna zemskeho wolija wčera najwyši staw wot kónca měrca docpěła. Kónc lěta přidružitej so dalše efektaj: Potom žadaja sej 25 eurow za tonu wuhlikoweho dioksida. Nimo toho wjacehódnotowy dawk zaso zwyša. Tuž budźe drje diesel wo něhdźe wosom a super wo dźesać centow dróši.

Na wšě 30 000 eurow pokuty nabrěmjenili su žonje w jendźelskim Bradfordźe, dokelž bě wona najebać zakaz koronapandemije dla w swojim frizerskim salonje dale kupcow posłužowała. 9. nowembra běchu ju prěni króć napominali a jej wjace hač tysac eurow pokuty napołožili. Mjeztym je so hoberska suma nakopiła. W interneće žona kritizuje, zo dyrbi tydźenje na statnu pomoc čakać, podruž a zličbowanki pak přiwšěm płaćić.

Wosebity kołk je w Nižozemskej paduchow twarožka přeradźił. Tući běchu 300 wulkich twarožkow w ratarskim zawodźe kradnyli a chcychu rubiznu w hódnoće 40 000 eurow internetnje předać. Skućićelej – 19lětna žona a 21lětny muž – pak njeběštaj wobkedźbowałoj, zo je kóždy z něhdźe dwanaće kilogramow ćežkich twarožkow z indiwiduelnym čisłom wo­znamjenjeny. Tak móžachu zwěsćić, z kajkeho zawoda twarožki pochadźeja.

Washington (dpa/SN). Woleny prezident USA Joe Biden a kandidataj rozsudnej za zastojnstwo wonkowneje a wěstotneje politiki su narok na wodźacu rólu USA w swěće potwjerdźili. „Smy mustwo, kotrež wobkruća, zo je Amerika wróćo, zo by swět nawjedowała, město toho zo so wróćo sćehnje“, rjekny Biden hladajo na dotalny kurs swojeho předchadnika Donalda Trumpa. Ze swojim nowym knježerstwom chcył so Biden „njepřećelam stajeć, město toho zo zwjazkarjow wotpokazujemy, kotrež nas podpěruja“.

Postaja termin wólbow 2021

Berlin (dpa/SN). Zwjazkowe knježerstwo chcyše dźensa termin přichodnych wólbow Zwjazkoweho sejma postajić. Nutřkowny minister Horst Seehofer (CSU) je po dorěčenju z krajemi a frakcijemi 26. september 2021 namjetował. Doskónčnje rozsudźi wo tym zwjazkowy prezident Frank-Walter Steinmeier. Za wólby zwjazkoweho sejma, kotrež wotměwaja so prawidłownje po štyrjoch lětach, eksistuje po wustawje kruty časowy ramik.

Žada sej pomoc rjemjeslnikam