Bórze šćěpiwo?
Ruske jednotki w Hórskim Karabachu
Baku/Jerjewan (dpa/SN). Po najnowšim dojednanju, zakónčić wšitke wojowanja wo konfliktnu kónčinu Hórski Karabach, su ruske měrowe jednotki swoju misiju zahajili. Prěnje štyri lětadła typa IL-76 su minjenu nóc wojakow a tankowe jězdźidła do krizoweje kónčiny přiwjezli, kaž ruske zakitowanske ministerstwo w Moskwje informuje. Přiměr płaći wot dźensnišeho ranja. Zrěčenje wo kóncu wojowanjow běštaj prezidentaj Azerbajdźana a armenski ministerski prezident po posrědkowanju ruskeho prezidenta Wladimira Putina podpisałoj. Wone předwidźi, zasadźić nimale 2 000 ruskich měrowych wojakow a wujednać teritorialne kompromisy.
W krizowej kónčinje bě połoženje dźensa rano měrne. Wo wojowanjach ničo znate njebě. W armenskej stolicy Jerjewanje je porno tomu k namócnosćam dóšło. Demonstranća wobsadźichu twarjenje knježerstwa a parlamenta a mjenowachu ministerskeho prezidenta Nikola Pašinjana „přeradnika“. Tón přizna, zo je měrowe dojednanje „bolostne“.
Łužiski kruh přesłapił
Trjebinska gmejna chce gremij komunalnych zajimow wopušćić
Trjebin (AK/SN). Gmejna Trjebin je přesłapjena wot Łužiskeho kruha (Lausitzrunde). Wona mjeztym rozmysluje gremij komunalnych zajimow wopušćić, kotryž zastupuje jako hłós Łužicy wjace hač milion wobydlerjow 20 wokrjesow, městow a komunow. „W decembru chcu k tomu naćisk wobzamknjenja gmejnskej radźe předpołožić“, je wjesnjanosta Waldemar Locke (CDU) minjeny tydźeń na posedźenju Trjebinskich radźićelow připowědźił.
GdP kritizuje sudnistwo
To a tamne (10.11.20)
Kurioznu, lěta trajacu zwadu wo worštowane drjewo na zahrodźe Podstupimskeho Kupoweho hotela su na dosć jednore wašnje rozrisali: Stapl drjewa nětko wo 20 metrow přestorča. Tak njesteji hižo dlěje na škitanym pasmje połkupy Hermannswerder, kaž město informuje. Zwada bě po wšej Němskej kedźbnosć zbudźiła: Město bě lěta 2016 drjewo jako twarski objekt wobhladowało, za kotryž by hotel twarsku dowolnosć trjebał a kiž dyrbjał tohodla zwottorhać.
Prezident USA Donald Trump njesteji w Londonskim kabineće wóskowych figurow hižo jako statnik w čornym wobleku z čerwjenym krawatu, ale jako hrajer golfa w pisanej drasće a z pochmurjenym mjezwočom. Wón ma nětko wjace chwile so swojemu najlubšemu sportej wěnować, muzej pisa.
Dźěćom a młodostnym poboku
Magdeburg (B/SN). W srjedźišću lětušeje akcije Bonifacijoweho pomocneho skutka steji njedźelu, 15. nowembra, skutkowanje rjadniskich sotrow, kotrež dźěłaja w Magdeburgskim dźěćacym a młodźinskim centrumje Don Boska. Centrum na sewjeru města stajnje wot póndźele do soboty dźěći a młodostnych w starobje šěsć do 27 lět hospoduje. „Mnozy z nich wobhladuja centrum jako kótwicu, kotrejež móža so dźeržeć a hdźež móža tež nadźiju, dowěru a wěstotu čerpać“, praji nawodnica domu sotra, Lydia Kaps. W zmysle Don Boska spožčeja sobudźěłaćerki wopytowarjam přewod, kubłanje a předewšěm domiznu.
Zasudźeja teror
Policija přećiwo demonstrantam
Tbilissi (dpa/SN). Policija w Georgiskej je namócnje přećiwo protestam tysacow přećiwnikow knježerstwa postupowała. Zastojnicy zasadźichu w stolicy Tbilissiju bjez warnowanja wodomjetaki a sylzopłun, kaž telewizijne sćelaki zwěsćichu. Demonstranća wumjetuja knježerstwowej stronje Georgiski són, zo je wólby parlamenta kónc oktobra falšowała. Strona pak to prěje. Tež mjezynarodni wobkedźbowarjo njeběchu žane hrube ranjenja wólbow zwěsćili.
Steinmeier pogrom wopominał
Berlin (dpa/SN). Zwjazkowy prezident Frank-Walter Steinmeier je sej składnostnje róčnicy pogromoweje nocy konsekwentne postupowanje přećiwo antisemitizmej w Němskej žadał. Jeho wohańbja, zo njemóža so Židźa z kipu na hłowje na dróhach Němskeje hižo wěsći čuć a zo dyrbi policija jich Bože domy škitać. To rjekny Steinmeier we widejowym poselstwje swojemu israelskemu koleze Reuvenej Rivlinej. 9. nowembra 1938 běchu nacionalsocialisća synagogi a wobchody zapalili a Židow nadpadowali.
Hotuja so na šćěpjenje ludźi
Zaso třěleńcy na Ukrainje
Pochod zakazał
Žadaja sej wotstup ministra
Lipsk (dpa/SN). Młodźinskej organizaciji Lěwicy a FDP w Sakskej žadatej sej konsekwency po namócnosćach při demonstraciji přećiwo wobmjezowanjam koronawirusa dla w Lipsku. „Sobotu su žurnalistow po měsće ćěrili a strowotu nas wšěch wohroželi. K namocy zwólniwi radikalni prawicarjo móžachu so swobodnje po Lipsku pohibować. Sym zludany“, piše Paul Podbielski w mjenje sakskeje Lěwicarskeje młodźiny. Wón wumjetuje policiji zaprajenje, kotrež dyrbjało konsekwency měć.
Młodźi liberalni Sakskeje žadaja sej wotstup nutřkowneho ministra Rolanda Wöllera (CDU). „W jeho wuprajenjach na nowinarskej konferency njebě žana zwólniwosć spóznajomna, za dospołnje zwrěšćene policajske zasadźenje zamołwitosć přewzać“, rěka w zdźělence. Sobotu bě znajmjeńša 20 000 ludźi přećiwo naprawam koronawirusa dla demonstrowało. Lědma štó wužiwaše nahubnik. Policija njebě personelnje kmana prawidła hygieny přesadźić. Na kromje demonstracije dóńdźe k namócnosćam.
