Bě cyrkej přejara podwólna?
Limburg (dpa/SN). Předsyda Němskeje biskopskeje konferency Georg Bätzing wočakuje po přewinjenju koronakrizy debatu wo poměrje mjez statom a cyrkwju. „Běchmy přepodwólni? Bychmy sej hižo prjedy wolóženja žadać dyrbjeli? Z mojeho wida smy zamołwiće jednali. Wo prašenjomaj dyrbimy pak tež sebjekritisce diskutować“, rjekny Limburgski biskop w rozmołwje z nowinarjemi.
Na wjeršku krizy njeběchu w Němskej wjacore tydźenje žane Bože słužby móžne. Tež tuchwilny reformowy proces w katolskej cyrkwi Němskeje, synodalny puć, je wot pandemije potrjecheny. Za september planowanu druhu synodalnu zhromadźiznu w Frankfurće nad Mohanom su mjeztym na februar 2021 přestorčili. W septembru chcedźa za to mjeńše regionalne konferency přewjesć, na kotrychž móža trěbny wotstawk mjez wobdźělnikami dodźeržeć. Tež hewak koronakriza reformowy proces w cyrkwi wobwliwuje. Jako přikład mjenowaše Bätzing temu žony: „Hdyž žony z krizy jako přěhračcy wuńdu, dokelž su hłowne brěmjo w swójbach njesli, dyrbimy wo róli žonow w cyrkwi znowa rěčeć.“
Wótry wołojnik (02.06.20)
Nalěćo słónčne a suche było
Offenbach (dpa/SN). Nalěćo 2020 bě w Němskej jedne z najsłónčnišich wot spočatka wjedrowych zapiskow a kaž hižo minjene lěta chětro ćopłe. Z 9,2 stopnjomaj bě přerězk temperatury wo połdra stopnja wyši hač přerězk mjezynarodnje připóznateje referencneje doby wot lěta 1961 do 1990, kaž Němska wjedrarnja w swojej bilancy zwěsća.
Runočasnje bě lětuše nalěćo znowa přesuche. Z něhdźe 108 litrami spadkow na kwadratny meter bě to jenož dobre 50 procentow wjelelětneho přerězka. Tak je lětuše nalěćo jedne ze šěsć najsušišich wot lěta 1881.
Po miłym měrcu bě apryl jasnje přećopły a słuša k sydom najćoplišim jutrownikam wot zahajenja měrjenja w lěće 1881. Zdobom pak bě „krasna“ meja trochu přezymna. Najebać to registrowachu někotre wjedrowe stacije na juhu sydom lětnich dnjow z wjace hač 25 stopnjemi. Po wšej Němskej najćopliši nalětni dźeń mějachu 21. meje w Lingenje z 29,4 stopnjemi. Za to spadny termometer za čas lodowych muži z městnami jasnje pod nulu: w Rudnych horinach 1. apryla hač na minus dwanaće stopnjow.
To a tamne (02.06.20)
Njezbožo z motorizowanym konopejom zaběra policiju w durinskim Eichsfeldźe. Za kuriozne jězdźidło běchu motorske na třikoleso přetwarili a před wodźidło konopej připrawili. Na dróze mjez Kefferhausenom a Küllstedtom bě wozydło, kotrež nima ani nadróžne přizjewjenje ani čisłowu tafličku, do hrjebje zajěło. Při tym so třo sobujěducy zranichu. Na městnje njezboža pak zwosta jenož jedyn z wobdźělenych. Policija pyta nětko za wobsedźerjom a za šoferom.
Po wšej Němskej prěni drive-in-cirkus je w Mannheimje njedźelu něhdźe tysac wopytowarjow přiwabił. „Smy jara spokojom“, rjekny jednaćel dźěćaceho a młodźinskeho cirkusa Paletti Tilo Bender. Na wulkim parkowanišću móžachu wopytowarjo z awtom k wšelakim atrakcijam jěć a naprawo a nalěwo wuměłcow wobdźiwać. Cirkus ma 500 čłonow.
SPD hišće kandidata nima
Berlin (dpa/SN). Předsyda SPD Norbert Walter-Borjans je potwjerdźił, zo njeje so wjednistwo strony hišće za kanclerskeho kandidata k wólbam zwjazkoweho sejma 2021 rozsudźiło. Magacin Cicero bě rozprawjał, zo by frakciski šef SPD w zwjazkowym sejmje Rolf Mützenich Borjansej a sobupředsydce Saskiji Esken najlubši kandidat był. Medije spekuluja, zo so tež financny minister Olaf Scholz z myslu nosy kandidować. Po tuchwilnych naprašowanjach ma SPD 15 procentow hłosow.
Wobmjezowanja dale powólnja
London/Paris (dpa/SN). Kontaktne wobmjezowanja koronawirusa dla chcedźa we Wulkej Britaniskej dale powólnić. To je premierminister Boris Johnson zdźělił. Tak smě so wot přichodneho tydźenja hač do šěsć wosobow na priwatnych zahrodach zetkawać. Dotal smědźeštej to jenož dwě wosobje. Tež šule chcedźa zaso wotewrěć. W Francoskej smědźa hosćency a kofejownje po wšěm kraju znowa hosći witać. Stanowanišća budu ludźom wot wutory přistupne.
Komunam dołh spušćić
Protesty po smjerći Afroameričana Georgea Floyda w Minneapolisu w ...
Trump přećiwo socialnym medijam
Washington (dpa/SN). Prezident USA Donald Trump je prezidialny wukaz podpisał, z kotrymž chcył socialnym medijam razniše prawidła napołožić. Trump platformam, kaž su to Twitter, Facebook abo YouTube, wumjetuje, zo jim njelube měnjenja potłóčuja a tak swobodu měnjenja a demokratiju wohrožeja. Nastork wukaza bě rozestajenje z platformu Twitter, kotraž bě jednu z mnohich powěsćow prezidenta po přepruwowanju faktow jako „wopačnosć“ woznamjeniła.
Kajke ma noworjadowanje dokładnje wupadać, njeje znate. Justicny minister Wiliam Barr ma nadawk, zakoń k tomu zdźěłać. Hłowny postork je Trumpej artikl, po kotrymž njejsu internetne platformy za wobsahi zamołwite. Demokratam USA je akcija Trumpa manewer, dokelž je w koronakrizy zaprajił.
To a tamne (29.05.20)
Dobra a droha to kapka: W Londonskim awkciskim domje Sotheby’s su 258 lět stary konjak za 132 000 eurow na přesadźowanju předali. Po wšěm swěće eksistuja runje hišće tři bleše palenca z palencarnje Gautier z lěta 1762. Je to zdobom najdróša hdy přesadźowana bleša konjaka. Blešu běchu přez generacije w pincy domu chowali. Fachowcy Sotheby’s su sej wěsći, zo je palenc „swój charakter wobchował“, a zo móžeš jón tež po połtřeća lětstotku hišće pić.
Swójski špihelowy wobraz na kradnjenym dźěćacym elektriskim awće je paducha přeradźił, jako tón spakosćene wěcy w interneće poskićowaše. Mjezwočo muža na nabóčnej škleńcy wuhladała bě wobsedźerka awta, bywša susodka 32lětneho paducha. 33lětna pytaše w interneće zaměrnje za awtom, kotrež běchu jej w pincy wjaceswójbneho domu w Schweinfurće pokradnyli. Podhladny sedźi mjeztym w přepytowanskej jatbje, dokelž ma hišće dalše padustwa na swědomju.
Warnuje před wjetšej škodu
Berlin (dpa/SN). Dźěćacy pomocny skutk Němskeje je před raznymi sćěhami za dźěći a młodostnych warnował, njedyrbjeli-li šule a pěstowarnje bórze zaso dospołnje wotewrjene być. „Njesměmy dopušćić, zo so škoda hišće powjetši“, rjekny prezident Thomas Krüger nowinarjam. Pobrachowaca zwučena wokolina za wuknjenje a hrajkanje so sylnje na socialne zadźerženje a na přichod potrjechenych wuskutkuje. Krüger rěčeše samo wo „snano zhubjenej generaciji“.
Zakoń za Hongkong schwaleny
Peking (dpa/SN). Ludowy kongres Chiny je na dźensnišim poslednim dnju swojeho kóždolětneho zeńdźenja wjele diskutowany wěstotny zakoń za Hongkong schwalił. Zakoń zakazuje aktiwity, kotrež ma Peking za subwersiwne, separatistiske a zběžkarske. Zo bychu zakoń w bywšej britiskej krónkoloniji zwoprawdźili, chcedźa přidatne chinske wěstotne mocy zasadźić. Prodemokratiske mocy so boja, zo ma China nětko dalši srědk w ruce, swoju móc w Hongkongu přesadźić.
Trump wukaz připowědźił
