Bamž Franciskus so po informacijach Vatikana wšědnje modli, zo by ...
Italska policija wukazy wirusa dla kontroluje
Bozen (SN). W Južnym Tirolu je hač do njedźele 71 ludźi na sćěhi koronawirusa zemrěło. To rozprawja redaktor tamnišeje němskorěčneje nowiny Dolomiten Hatto Schmidt ekskluziwnje za naš wječornik. Ličba zemrětych móhła po jeho informacijach hišće wjetša być, dokelž njekontroluja wšitkich zemrětych na wirus. Přirunanje z minjenym lětom znajmjeńša pokazuje, zo je so ličba smjertnych nawěškow wjace hač podwojiła.
Wot wudyrjenja pandemije su w Južnym Tirolu 1 205 ludźi pozitiwnje na wirus testowali. Tež tu pak testuja jenož ludźi, kotřiž maja widźomne symptomy: Nimaja dosć testow, a kapacity laborow su wućežene. W chorownjach tuchwilu 229 inficěrowanych lěkuja, 51 z nich na intensiwnych stacijach. Wjace hač 2 500 ludźi je w domjacej karantenje. Wulke problemy čakaja na 4 400 wobydlerjow starownjow a 3 300 hladarjow. Mjeztym je so 107 wobydlerjow a 138 sobudźěłaćerjow natyknyło.
„Dźemy do praweho směra“
Rom (dpa/SN). W Italskej maja łahodnu nadźiju, zo so pandemija koronawirusa dla poněčim wosłabja. Rozrost ličby pozitiwnje testowanych wosobow je tak snadny kaž do zahajenja cyłokrajneho zakaza, dom wopušćić. Najebać to chce knježerstwo wobmjezowanja wosobinskeje swobody wobydlerjow hač k jutram, 12. apryla, podlěšić, kaž tamniše strowotniske ministerstwo zdźěla. To wotpowěduje tež poručenjam komisije fachowcow.
Ličba z wirusom natyknjenych je wčera wo 1 648 na 75 528 přiběrała, tak mało kaž po 10. měrcu nic. Ličba zemrětych wostawa přiwšěm wulka: Wčera je 812 ludźi zemrěło, dohromady je jich dotal 11 591. Wot 10. měrca njesmědźa so ludźo w Italskej hižo swobodnje hibać. Šule su zawrjene, tójšto fabrikow tohorunja. Wukazy płaćachu poprawom hač do 3. apryla. „Dźemy do praweho směra. Njesměmy pak swoju strategiju ani kuska změnić“, rjekny prezident narodneje strowotniskeje rady Franco Locatelli. Nětko chcedźa hač k jutram čakać a potom wo móžnych dalšich kročelach rozsudźić.
To a tamne (31.03.20)
Zběrku wjace hač 40 000 komikowych zešiwkow poskića New-Yorkski awkciski dom Sotheby’s na předań. Wot britiskeho hudźbnika Iana Levinea zestajena zběrka wopřijima kóždy jednotliwy zešiwk nakładnistwa DC Comics, kotrež běchu wot lěta 1934 do 2014 wušli. Temy komikowych zešiwkow su Superman, Batman a Wonder Woman. Hódnota hoberskeje zběrki njeje znata.
Za pokład złota njeje so tež po štyrjoch lětach hišće žadyn wobsedźer přizjewił. Złotaki bě dźěłaćer w juniju 2016 na kěrchowje w delnjosakskim Dinklage namakał a wotedał. Pjenjezy běchu tehdy 481 500 eurow hódne, dźensa hižo 24 procentow wjace. Namakar žada sej premiju, město pak so spjećuje ju płaćić. Nětko ma sudnistwo rozsudźić.
Wobrjady lětsa bjez kemšerjow
Vatikan (B/SN). Martrowny tydźeń płaći w běhu cyrkwinskeho lěta we wšěch křesćanskich konfesijach jako najwažniši. Wosebje su to zeleny štwórtk, ćichi pjatk a ćicha sobota, hdyž wěriwi na wosebite wašnje na ćerpjenje, wumrěće a zrowastanjenje Chrystusa spominaja. Hišće ženje njejsu tute wobrjady we Vatikanje bjez kemšerjow přewjedli. Lětsa pak budźe bamž Franciskus prěni raz najwažniše liturgije za zawrjenymi durjemi swjećić. „Njejsym dotal wo žanej přirunajomnej situaciji słyšał, tež nic, jako w Romje cholera zachadźeše, abo we wójnskich časach“, praji Vatikanski fachowc Ulrich Nersinger Kölnskemu rozhłosowemu sćelakej Domradio.
Duchownje so zwjazać
Trump surowu ličbu mjenował
Washington (dpa/SN). Prezident USA Donald Trump je wobydlerjow kraja na dramatiske ličby smjertnych woporow koronawirusa dla nastajił. Hdyž so poradźi, ličbu na wirus zemrětych na 100 000 wobmjezować, „smy wšitcy hromadźe derje dźěłali“, rjekny Trump na nowinarskej konferency w Běłym domje. „To je surowa ličba“, wón doda. Zdobom pak připowědźi, płaćiwe směrnicy k wobmjezowanju socialnych kontaktow hač do kónca apryla podlěšić.
Mjenje nowych padow korony
Rom (dpa/SN). W Italskej ličba nowych infekcijow z koronawirusom hižo tak spěšnje njepřiběra kaž dotal. Přiwšěm su tež wčera zaso sta ludźi zemrěli. Kaž ciwilny škit zdźěla, je ličba smjertnych woporow w běhu 24 hodźin wo 756 na nětko 10 779 rozrostła. To je najwjetša ličba po wšěm swěće. Ličba natyknjenych je w Italskej wčera wo 5 217 na 97 689 přiběrała, sobotu bě jich hišće 5 974 nowych padow. Ličba wotchorjenych je so wo 646 na 13 030 powjetšiła.
Swobodny tydźeń w Ruskej
Posledni króć je wčera lětadło typa Airbus A 380 na lětanišću ...
Wjace infekcijow
Pomoc chcedźa spěšnje wupłaćić
Berlin (dpa/SN). W krizy koronawirusa dla chcedźa direktnu pomoc na dobro małych firmow, samostatnych a ludźi w swobodnym powołanju přichodne dny wupłaćeć započeć. Cyłkownje dźe wo 50 miliardow eurow. Zwjazk a kraje su za to wotpowědne zarjadniske dojednanje wotzamknyli, kaž financne a hospodarske ministerstwo wčera wječor zdźělištej. Po tym móža zwjazkowe kraje srědki wot dźensnišeho wotwołać, zo móhli je spěšnje a njeběrokratisce wupłaćić. Zaměr je problemy likwidnosće małych firmow přemosćić, kotrež njedóstanu žane kredity a nimaja dalše dochody zaručene. Konkretnje dóstanu firmy z hač do pjeć přistajenymi jónkrótnu přiražku 9 000 eurow na tři měsacy, firmy z hač do dźesać ludźimi 15 000 eurow, zwjazkowe knježerstwo informuje.
Požadarjo dyrbja dopokazać, zo su pandemije koronawirusa dla do hospodarskich wuskosćow přišli. Zwjazkowe knježerstwo z toho wuchadźa, zo su hač do tři miliony samostatnych a małopředewzaćelow potrjechene.
Altmaier: Žadanja přechwatane
Zakaz kontaktow dale pruwować a snano hišće přiwótřić
Berlin (dpa/SN). Dźesaćitysacy padow korony w Němskej a ličby dale přiběraja: Dosć energisce spyta zwjazkowe knježerstwo debatu wo móžnym popušćenju naprawow k wotwobaranju wirusa wobmjezować. Přewulki je strach, zo móhli ludźo runje hakle přesadźene wobmjezowanje kontaktow ignorować započeć. Po tym zo bě zwjazkowa kanclerka Angela Merkel (CDU) ludźi kónc tydźenja wo sćerpnosć prosyła, su nětko tež dalši ministrojo žadanje wotpokazali, hladajo na socialne a hospodarske wuskutki wo tym rěčeć, zo hodźeli so razne škitne naprawy w zwisku z koronakrizu zběhnyć. Diskusija přiwšěm dale dale.
Financny minister Olaf Scholz (SPD) rěči w tym zwisku wo cynizmje. „Naprawy tomu słuža, žiwjenje wuchować a tuž mam za cyniske, hdyž někotři nětko wo tym diskutuja, zo měli strowotniske naležnosće druhorjadne być a zo dyrbjeli hospodarske prašenja w srjedźišću stać“, rjekny Andreas Scholz wčera wječor w telewiziji ARD.
