650 milionow eurow přećiwo coronje
Drježdźany (dpa/SN). Sakski ministerski prezident Michael Kretschmer (CDU) wobydlerjow hladajo na dalše rozpřestrěće coronawirusa namołwja, měrnje a rozumnje jednać. Nětko njeje čas hektiki a njepřemyslenych reakcijow, ale wobhladniwosće, rjekny Kretschmer dźensa w Drježdźanskim krajnym sejmje. „Dokal móža rozsudy bjez dosahaceho rozmyslowanja wjesć, pokazuje so tuchwilu na awtodróze A 4 do směra na Pólsku, hdźež je so něhdźe 60 kilometrow dołhi rynk čakacych awtow wutworił. Chcemy tutu ćežku situaciju zhromadnje zmištrować.“ Kóždy dyrbjał zmužitosć a optimizm wobchować. Zdobom wón připowědźi, zo chcył nadbytk etata 650 milionow eurow z lěta 2019 nałožić, zo hodźeli so sćěhi coronakrizy wotpopadnyć.
Do posedźenja bě so wjace hač 20 zapósłancow wšelakich frakcijow coronakrizy dla zamołwiło. Posedźenje bě minjene dny zwadu zawiniło. AfD bě za to, wuradźowanje krizy dla połnoličbnje přewjesć, na čož wumjetowachu jej njezamołwitosć.
Žana přičina nahrabni być
Ratarska ministerka Klöckner apeluje na měr a rozumne nakupowanje
Berlin (dpa/SN). Zwjazkowa ministerka za ratarstwo a zežiwjenje Julia Klöckner (CDU) wobydlerjow Němskeje w tuchwilnej krizy coronawirusa dla namołwja, měr wobchować a rozumnje jednać. Zastaranje ludźi ze žiwidłami a z wěcami wšědneje potrjeby je dale zaručene, rjekny wona na nowinarskej konferency w Berlinje. Njeje tuž žaneje přičiny, při nakupowanju nahrabny być. Klöckner bě nowinarjow zwołała, zo by wo wuskutkach krizy wirusa dla informowała. Podobnje kaž wona wuprajichu so prezident Němskeho burskeho zwjazka Joachim Rukwied kaž tež zastupnicy drobnowikowanja a žiwidłoweje industrije. Wšitcy potwjerdźichu, zo njeje zastaranje wobydlerjow ze žiwidłami wohrožene.
To a tamne (18.03.20)
Wosebite wusyłanja krizy corony dla w telewiziji zbudźeja dale hoberski zajim přihladowarjow. Wusyłanje „ARD Extra“ je sej wčera wječor 6,55 milionow ludźi (17,8 procentow) wobhladało. Přinoškaj „ZDF spezial“ w 19.20 hodź a 20.30 hodź. je wjace hač wosom milionow ludźi widźało. Dźensa wječor chce so zwjazkowa kanclerka Angela Merkel (CDU) z narěču coronakrizy dla na ludnosć wobroćić, na ZDF w 19.20 hodź., na ARD w 20.15 hodź.
Tak mjenowane corona-partyje je policija w bayerskimaj Nürnbergu a Schwabachu rozpušćiła. Něhdźe sto młodostnych bě so w Nürnbergskim měšćanskim parku k swjećenju zešło a za to zwukowu a swěcowu připrawu wužiwało. W Schwabachu je so něhdźe 50 młodych ludźi w parku skaterow zetkało a harowało. Policija techniku sćaza a pósła wšěch domoj.
Nowa chorownja corony dla
Moskwa (dpa/SN). Ruska stolica Moskwa twari nowu chorownju za lěkowanje na coronawirus schorjenych pacientow, a to w najkrótšim času. Tuchwilu je wjace hač 2 000 dźěłaćerjow na twarnišću na kromje města zasadźenych, zdźěla měšćanski twarski zarjad. W nowym centrumje za natykliwe chorosće ma městno za 500 pacientow być. W Ruskej je so dotal oficialnje 90 ludźi natyknyło. Woprawdźita ličba je drje wo wjele wjetša.
Francozojo doma zamknjeni
Paris (dpa/SN). W boju přećiwo coronawirusej Francoska swojim wobydlerjam faktisce zakazuje, dom wopušćić. Ludźo smědźa jenož hišće na dróhu, zo bychu nakupowali, na dźěło abo k lěkarjej šli. To je statny prezident Emmanuel Macron wčera wječor w telewizijnej narěči wukazał. Wobmjezowanje płaći wot dźensnišeho připołdnja znajmjeńša 15 dnjow. „Smy we wójnje z njewidźomnym njepřećelom, kotryž so dale bliži“, Macron rjekny. Hač ludźo zakaz dodźerža, chcedźa ze 100 000 policistami kontrolować.
Wólbne lokale zawrěli
W nocy na njedźelu je Pólska tež znaty Móst přećelstwa a měra ...
Wurjadny wjeršk EU krizy dla
Brüssel/Berlin (dpa/SN). W boju přećiwo rozšěrjenju coronawirusa su statni a knježerstwowi šefojo Europskeje unije dźensa na wurjadnym wjeršku wo tym wuradźowali, zapućowanja do EU wobmjezować. Wobdźělnicy běchu w formje widejokonferency mjez sobu zwjazani. Prezidentka komisije EU Ursula von der Leyen bě namjetowała, wšitke njetrěbne jězby ze zwonkaeuropskich krajow do EU přichodne 30 dnjow zakazać. Na konferency wona wočakowaše, zo wšitkich 27 statow EU tomu přihłosuje. Dalšej temje běštej zastaranje z medicinskimi srědkami a slědźenje na polu lěkow.
Dźensa dopołdnja je wonkowny minister Heiko Maas (SPD) informował, zo chcył z charterowymi lětadłami němskich turistow domoj přiwjezć, kotřiž njemóža so z dowola nawróćić. Jeničce w Marokku jedna so wo wjacore tysacy ludźi.
VW přetorhnje produkciju
Wolfsburg (dpa/SN). Awtotwarc Volks-wagen chce produkciju w mnohich twornjach rozšěrjaceho so coronawirusa dla přetorhnyć. W najwjace zawodach ma pjatk, 20. měrca, poslednja změna běžeć, zdźěli zawodna rada koncerna dźensa we Wolfsburgu. Minjene dny běchu tež w němskich zawodach wjacore pady wirusa zwěsćili. Dokelž njemóža při běžacych pasach wotstawk mjez kolegami dodźeržeć, su so z nawodnistwom dojednali zawod na dwaj tydźenjej zawrěć.
Wšitke 53 wotnožkow w Němskej je wot dźensnišeho tež wikowar meblow Ikea zawrěł, kaž wottam rěka.
Merkel: Dalše wobmjezowanja
Berlin (dpa/SN). W boju přećiwo coronawirusej je zwjazkowa kanclerka Angela Merkel (CDU) dalše wobmjezowanja zjawneho žiwjenja w Němskej připowědźiła. Tak dyrbjeli so wobydlerjo dowolowych jězbow w kraju a wukraju wzdać. Zjawne žiwjenje je w dalokej měrje zlemjene. Naprawy su dźěl wulkeho kataloga wukazow, zo bychu socialne kontakty mjez ludźimi dale wobmjezowali. Tak ma wulki dźěl wobchodow zawrěć. Bože słužby wšitkich wěrywuznaćow kaž tež towarstwowe aktiwity su zakazane. Hrajkanišća wostanu zawrjene. Wobchody žiwidłow a tajke, kotrež słuža zastaranju ludźi, maja pak dale wotewrjene wostać. Merkel apelowaše na ludźi, naprawy a směrnicy dodźeržeć, ćim lěpje móže so poradźić rozšěrjenju wirusa zadźěwać. „Tajke naprawy njejsmy w Němskej hišće dožiwili“, rjekny wona po posedźenju wjacorych gremijow, kotrež běchu so z pandemiju zaběrali.
Bayerski ministerski prezident Markus Söder (CSU) žada sej w boju přećiwo wirusej „spěšniše postupowanje“.
Zasypany pólski hórnik zemrěł
To a tamne (17.03.20)
Do swojeje chinskeje domizny nawróćiło je so koparske mustwo Wuhan Zall z treningoweho lěhwa w Španiskej. Sportowcy dyrbjachu połdra měsaca w španiskim eksilu wostać, po tym zo bě coronawirus w jich chinskej domiznje wudyrił. „Nětko mamy problem tu“, rjekny španiski trenar mustwa krótko do wotlěta z Madrida. W Chinje je so połoženje mjeztym změrowało, Španiska pak je nimo Italskeje tuchwilu wot wirusa najbóle potrjecheny kraj Europy.
Dwě lěće jako domownik dźěłał je znaty telewizijny moderator Günther Jauch do swojeho časa w telewiziji, kaž je we wčerawšim wusyłanju „Štó budźe milionar?“ přeradźił. „To njebě najzbožowniši čas za wobydlerjow“, wón k tomu rjekny. Wosebje mjerzachu Jaucha njepřestajne skóržby wobydlerjow najwšelakorišeho razu a črije před durjemi bydlenjow.
