Berlin (dpa/SN). Nowy corona-wirus so w Němskej dale wupřestrěwa. Wčera su w najbóle potrjechenych zwjazkowych krajach 200 nowych infekcijow registrowali, kaž ze zdźělenkow zamołwitych w Sewjerorynsko-Westfalskej, Bayerskej, Badensko-Württembergskej, Hessenskej, Delnjej Sakskej a Berlinje wuchadźa. Jeničce w Sewjerorynsko-Westfalskej je ličba natyknjenych wo sto na nětko 580 rozrostła. Po cyłej Němskej je mjeztym 1 500 registrowanych infekcijow, po wšěm swěće je jich wjace hač 113 000.

Sakska je wčera wirusa dla krizowy stab wutworiła. „Trjebamy nětko krute krizowe struktury“, rjekny strowotniska ministerka Petra Köpping (SPD) po posedźenju kabineta. W gremiju maja wšitke ministerstwa zastupjene być, po potrjebje tež lěkarjo, zastupnicy chorownjow, wokrjesow a městow. Hač do wčerawšeho bě w Sakskej 18 dopokazanych infekcijow z corona-wirusom.

Ličba natyknjenych w Braniborskej je na 16 přiběrała. Naposledk běchu pola porika z wokrjesa Märkisch-Oderland, kotryž bě so z dowola w Italskej nawróćił, wirus zwěsćili. Nimo toho maja tři nowe pady corony w Choćebuzu.

Moskwa (dpa/SN). Ruski parlament je dźensa najwjetšu změnu wustawy w stawiznach kraja schwalił. Z njej je mjez druhim předwidźane, zo móže prezident Wladimir Putin tež po wjace hač 20 lětach dale na mocy wostać – snano hač do lěta 2036. Parlament bě wčera bjez hłosow komunistow wobzamknył, dotalne štyri wólbne doby Putina „anulować“, zo móže wón w lěće 2024 znowa za zastojnstwo kandidować. Putin bě swoju zwólniwosć za to signalizował, dyrbjało-li wustawowe sudnistwo přihłosować.

Poprawom stej po wustawje jenož dwě wólbnej dobje prezidenta móžnej. Dokelž pak je najwyše zastojnstwo z nowymi knježerstwowymi kompetencami wuhotowane, měł 67lětny Putin po měnjenju Dumy móžnosć dóstać, so wo tele „praktisce nowe zastojnstwo“ prócować. Móžno, zo je šef Krjemla po lěće 2024 potom hišće raz najdlěje dwanaće lět prezident, hač do swojeho 83. žiwjenskeho lěta. Putin sam bě njedawno rjekł, zo so jemu „dźěło lubi“ a zo ma hamt prezidenta za „swój dóńt“.

Wjace hač 360 wobmyslenjow přećiwo tworni elektroawtow Tesla

Grünheide (dpa/SN). Dokładnje 361 kritikarjow je so oficialnje přećiwo planowanej prěnjej tworni elektroawtow twarca Tesla z USA w Braniborskej wobroćiło. Při tym dźe w prěnim rjedźe wo temy kaž woda, lěs, wobchad a přirodoškit, zdźěli rěčnica wobswětoweho ministerstwa w Podstupimje. Štóž chcyše, móžeše sej wot 6. januara hač do 5. februara rozprawu Tesle wo přirodoškitnej znje­sliwosći planowaneje fabriki wobhladać. Rozprawa bě na wjacorych městnach wupołožena a tohorunja internetnje ­přistupna. Tesla chce wot klětušeho w Grünheidźe pola Berlina něhdźe 500 000 elektroawtow wob lěto twarić. Hač do minjeneho pjatka bě 270 zapo­daćow přećiwo projektej dóšło.

Zapodaća wobydlerjow a zwjazkow chcedźa 18. měrca zjawnje wobjednać. Po tym chcedźa zamołwite zarjady po informacijach ministerstwa wobmyslenja hišće raz pruwować. Nimale dwě třećinje wšitkich znapřećiwjenjow stej z Grün­heidy a wokoliny, něhdźe třećina ze wšeje Braniborskeje a Berlina, jenož jara ­mało z tamnych zwjazkowych krajow a z wukraja.

Putin, Putin a bjez kónca Putin. Wón w Krjemlu nitki ćaha, zo by swoju móc wobchował, a znjewužiwa zapósłancow ruskeho parlamenta jako marionety. Hinak njemóžu sej to rozkłasć, štož je so wčera jako reforma ruskeje wustawy w statnej Dumje w Moskwje stało. Čłonka frakcije Zjednoćena Ruska Walentina Terješkowa­ namjetowaše, kaž kóždemu staćanej tak tež tuchwilnemu prezidentej samsne prawo zaručić, přichodnje k prezidentskim wólbam nastupić směć. To k tomu wjedźeše, zo je Duma dotalne štyri prezidentske wólbne doby Wladimira Putina prosće „anulowała“. Zo je runje tale wulce připó­znata 83lětna, kotraž bě 1963 w swětnišćowej łódźi Wostok 6 prěnja kosmonawtka swěta, tónle šamały manewer nastorčiła, mje poraža. Wjeršk politiskeje fatalnosće pak bě krótko na to wustup Putina w Dumje. Ludowe wothłosowanje wo nowej wustawje 22. apryla hrozy tuž jenož dalša farsa być. Axel Arlt