Wulkotna nalada knježeše sobotu na area­lu Budyskeho sportoweho towars­twa Post Germania. Tam wuhotowachu sobustawy towarstwa znowa kopańcowy turněr pěstowarnjow.

Při najrjeńšim wjedrje pokaza wjace hač 30 dźěći w sydom mustwach swój talent. Nimo mustwa hosćićelow hrajachu młodej koparce a młodźi koparjo z Budy­skeju pěstowarnjow „Katolski dom dźěći“ a „Sebastian Kneipp“, z Bukečanskeje a Kubšiskeje pěstowarnje. Na kromje polow­ pohonješe dobre sto sotrow, bratrow, staršich, wowkow, dźědow a přećelow hłósnje palcowacu a třělacu dźěćinu. Naposled bě jenož dobyćerjow, ze słódnym lodom swjećachu wšitcy krasne doži­wjenje. Zjawny dźak słuša hłownymaj organizatoromaj Dieterej Branskyjej a Lutzej Voigtej, kotrajž hižo dołhe lěta na polu dorosta skutkujetaj a holcy a hólcow za kopańcu zahorjataj, a wězo wšěm čestnohamtskim pomocnikam.

Serbske mustwo so bohužel njewobdźěli, ale serbski hólčec z druheho mustwa Katolskeho domu dźěći bě z pjeć wrotami mjez najwuspěšnymi třělcami.

Tampa Bay Lightning, Stanley-Cup Champion 2021! Nětko, nimale srjedź julija, je rozsud potajkim padnył. Najpo­žadaniša trofeja lodo­hokeja dźe wospjet do słónčneje Floridy. W rozsudnej finalnej bitwje napřećo Kanadźanam z Montreala přesadźi so amtěrowacy champion po pjeć hrach. Ja wšak hokejistam z Tampy titul wjace hač popřeju. Sprěnja maja wulkotne mustwo, kotrež hraje krasny, ale zdobom tež jara efektiwny lodohokej. Zdruha smětaj so z dobyćom dalšej čěskej hrajerjej z gra­wuru w pokalu Lorda Stanleyja zwěčnić: Jan Rutta a Ondřej Palát. Wosebje Palát je ze swo­jim njesprócniwym twjerdym „dźěłom“ před wrotami přećiwnika tójšto k wuspěchej mustwa přinošował. A střeća smědźachu so hrajerjo Tampy lětsa po dobyću mišterstwa w nimale połnej domjacej arenje tak prawje wot swojich fanow swjećić dać. Porno tomu běše lońše dobyće před prózdnymi kulisami (korona!!!) kaž dźěćaca narodninska party bjez limonady a słódkosćow. Za přiwisnikow kanadiskich mustwow woznamjenja přěhrate finale Montreala dalše čakanje na požadany 20 kg ćežki pokal.