Horcy zazběh do europskich mišterstwow
Rom (kh/SN). 16. europske mišterstwa kopańcy (EM) su minjeny pjatk w Romje zahajili. Wosebitosć turněra, kotryž bu koronapandemije dla wo lěto přestorčeny, je, zo přewjeduja hry w jědnaće wšelakich krajach a stadionach.
Na połsta zapřahow z wjacorych zwjazkowych krajow je so kónc ...
Mustwje žonow zjednoćenej
Wot HZ Pančicy-Worklecy k Viktoriji Worklecy
W nowej sezonje 2021/2022 nastupja wolejbulistki dotalneho Hrajneho zjednoćenstwa Pančicy-Worklecy jako sportowe towarstwo Viktoria Worklecy. Hrajne zjednoćenstwo jako tajke so tuž rozpušći. Wone bě wot hrajneje doby 2018/2019 personalnych přičin dla wobstało. Minjene lěta hrajachu wolejbulistki z Pančic a Worklec zhromadnje wuspěšnje z dwěmaj mustwomaj: prěnje we wobwodnej lize a druhe we wobwodnej klasy. Dorostowe žónske mustwo Viktorije Worklecy bě so tohorunja we wobwodnej klasy na hrach wobdźěliło.
Za sezonu 2021/2022 ma Viktoria Worklecy nětko dohromady dwě zastupnistwje žonow, kotrejž wobstejitej z hrajerkow něhdyšeho hrajneho zjednoćenstwa a wolejbulistkow dotalneho dorosta Viktorije Worklecy. Tereza Wićazowa
Firma Hentschke twar FSV Budissy Budyšin nowy traktor dariła
Krajnemu ligistej FSV Budissy Budyšin je Hentschke twarska tzwr nowy wulce moderny traktor za trawusyčenje přewostajiła. Stara mašina, jenož poł lěta wužiwana, bě so skóncowała. Z nowym modelom móža trawnik nětko porjadnje hladać. Jenož tak móža předewšěm młodźi hrajerjo w dorostowym centrumje Humboldtoweho haja swoju najlubšu sportowu družinu – kopańcu – wukonjeć.
Nowy nastroj trawu šěršo syče, ju tež při dešćikowym wjedrje jara derje zběra a je wjele sylniši. To su najlěpše wuměnjenja, zo móža so 22 000 kwadratnych metrow trawnika zjednoćenstwa zaso profesionalnje wobhospodarjeć.
Jörg Drews, jednaćel Hentschke twarskeje tzwr, k tomu wuswětla: „Dorostowy centrum Humboldtowy haj je mi dušina naležnosć. Mam za samozrozumliwosć na zakładne wuměnjenja za prěnjorjadne dźěło z dorostom sadźeć. Dźěći a młodostni trjebaja zaběru a sport, wosebje po lockdownje, kotryž je so přez wjacore měsacy ćahnył. Hdyž směmy podpěrać, potom činimy to z połnym přeswědčenjom.“
Widźał, słyšał, napisał (14.06.21)
Wot dźensnišeho płaći nowy wukaz wo škiće před koronawirusom. Wobšěrnje informuje paragraf 19 wo sporće a fitnesowych studijach. Při kotrej incidencnej hódnoće ma so na čo dźiwać a hdy dyrbi hygienowy koncept schwaleny być. Při tajkim mnóstwje přehlad wobchować njeje lochko. Nimo wukaza dyrbja zamołwići tež přeco aktualnu ličbu incidency wokrjesa před wočomaj měć. Po njej so wusměrjeja, što je aktualnje dowolene. A je-li sportowe zarjadowanje w druhim wokrjesu, dyrbja wo tam płaćiwych prawidłach wobhonjeni być.
Što tučasnje we wokrjesu Budyšin płaći? Aktualna sydomdnjowska incidenca leži pod 35 a zmóžnja tuž dalše wolóženja. Tak smědźa na přikład koparki a koparjo wonka trenować, a to bjez testowanja. Jeničce kontaktowe daty maja zawostajić. To samsne płaći za sport z njepołnolětnymi. Za nich stej winowatosć testowanja a napisanja kontakta zběhnjenej. Woni smědźa na čerstwym powětře z maksimalnje 30 wobdźělnikami sportować.
Jubilejny koparski turněr ze zapozdźenjom
Rom/Berlin (dpa/SN/bn). Narodnej koparskej mustwje Italskeje a Turkowskeje zahajitej dźensa w Romskim Olympiskim stadionje 16. europske mišterstwa (EM). Jubilejny turněr – prěnju EM běchu 1960 wuhrali – wuhotuja we wjacorych městach cyłeho kontinenta. Nimo italskeje stolicy su to Amsterdam, Baku, Budapest, Bukarest, Glasgow, Kopenhagen, Mnichow, Sevilla a Pětrohród. Finale budźe 11. julija w Londonskim Wembley-stadionje. Dohromady 24 cyłkow wubědźuje so w sydom skupinach wo kwalifikaciju za k.o.-koło. Faworića na EM-pokal su po sudźenju ekspertow wubranki Italskeje, Belgiskeje a Francoskeje, zakitowar titula je Portugal. Sewjerna Makedonska a Finska debitujetej na najwjetšim jewišću mjezynarodneje europskeje kopańcy.
Sport (11.06.21)
Za běhi so přizjewić
Sportowe towarstwo Běła-Cunnersdorf přewjedźe lětsa tak mjenowany Žabjacy běh, a to 25. junija. Přizjewjenja su hišće móžne, někotři su so hižo zapisali. W poskitku maja tam běhaj na distancomaj 2 km a 9,6 km. Dalše wubědźowanja:
30.06. Krabatowy firmowy běh
11.07. VVO Hornjołobjowy marathon
28.08. KnappenMan
05.09. Cityjowy běh w Złym Komorowje
05.09. Blackbird-run w Hózku
24.09. Schiebock běha ekstremnje
26.09. Budyski crossowy duatlon
Situacija dale njejasna
Ze stron Sakskeho koparskeho zwjazka do redakciskeho kónca žana medijowa zdźělenka njepředleži hač smětaj krajnej ligistaj Budissa Budyšin a SC Freital zaso porjadnje trenować (to rěka z kontaktami mjez hrajerjemi) a 26. junija relegacisku hru we Weißigu pola Drježdźan přewjesć. Wšitko tuž na to pokazuje, zo relegaciski duel dowoleny njebudźe, a zo dyrbitej los abo sportowe sudnistwo rozsudźić. Dobyćer tajkeho losowanja smě potom přichodnu sezonu we wyšej koparskej lize hrać.
Změny w kole sudnikow
NŠ Mura mišter Słowjenskeje
W Słowjenskej su w najwyšej koparskej lize z mjenom Slovenska Nogometna Liga mjeztym 30. hrajnu dobu přewjedli. Jeje zazběh bě 22. awgusta 2020 z domjacej partiju NK Tabor Sežana přećiwo FC Koperej, zakónčiła je so 22. meje 2021.
Kónčna tabulka najwyšeje koparskeje ligi Słowjenskeje w hrajnej dobje 2020/2021:
1. NŠ Mura 36 50:26 63
2. NK Maribor 36 64:41 63
3. NK Olimpija Ljubljana36 45:35 59
4. NK Domžale 36 52:41 55
5. NK Bravo 36 39:39 45
6. NK Tabor Sežana 36 40:44 44
7. NK Celje 36 36:41 43
8. NK Aluminij 36 31:41 43
9. FC Koper 36 41:56 42
10. ND Gorica 36 24:58 29
Wo mišterstwo hraje dźesać koparskich cyłkow kóždy přećiwo kóždemu dwójce doma a dwójce wonka. Dźewjaty tabulki dyrbi do relegacije, hdźež nastupi přećiwo druhemu druheje Słowjenskeje koparskeje ligi. Lětsa wosta FC Koper w prěnjej lize. Prěnju partiju doby wón pola NK Krka z 2:0, druhu je doma 2:3 snadnje přěhrał. Posledni tabulki awtomatisce zestupi a naruna so z mištrom druheje ligi. Kilian Hrjehor
Koparscy mištrojo zašłych 23 hrajnych dobow w Słowjenskej:
1998/1999 NK Maribor
1999/2000 NK Maribor
2000/2001 NK Maribor
2001/2002 NK Maribor
2002/2003 NK Maribor
2003/2004 ND Gornica
2004/2005 ND Gornica
2005/2006 ND Gornica
2006/2007 NK Domažle
2007/2008 NK Domažle
2008/2009 NK Maribor
2009/2010 FC Koper
2010/2011 NK Maribor
2011/2012 NK Maribor
2012/2013 NK Maribor
2013/2014 NK Maribor
2014/2015 NK Maribor
Sudnicy z wokrjesa Budyšin na so skedźbnili
Druha zwjazkowa liga a finale wo pokal Sakskeho koparskeho zwjazka – sudnicy Zapadołužiskeho koparskeho zwjazka (WFV) běchu pódla a su na so skedźbnili. Tež hdyž je zakładne wukubłanje sudnikow w formje kursow a zasadźenjow na kopanišćach tučasnje jenož we wobmjezowanej formje móžne, runje refereeje z towarstwow WFV pokazuja, zo tež woni w ćežkej situaciji swój sportowy puć z wuspěchom kroča.
Tak móže sudniski wuběrk WFV rozprawjeć, zo je Richard Hempel wot Sportoweho zjednoćenstwa Großnaundorf skok do 3. ligi jako hłowny sudnik docpěł. A w druhej lize budźe Hempel jako asistent zasadźeny. Z njesprócniwym angažementom je so jemu skok do elitoweje ligi poradźił. Tak budźe Richard swoje nazhonjenja tež w přichodnej sezonje sudnikam spěchowanskeho kadra koparskeho zwjazka dale dawać. Richardowy nan Uwe Hempel je nětko wobkedźbowar sudnikow w krajnej lize.
Znowa sławna Praska Slavia
Nětko su tež w susodnej Čěskej koparske mišterstwa 2020/2021 zakónčene. W najwyšej hrajnej klasy Prima na poslednim dnju hižo k změnam w zaměstnjenju njedóńdźe – přewulke běchu wotstawki na medaljowych městnach kaž tež deleka na „wopuši“.
Slavia Praha je sej kaž hižo loni titul zawěsćiła. Ma na kóncu předskok dwanaće dypkow před měšćanskim riwalom a rekordnym mištrom Spartu Prahu. Na třećim městnje skónči najlěpše zastupnistwo ze sewjerneho dźěla kraja FK Jablonec. Bliski susod Slovan Liberec je na šestej poziciji. Před nim steji Viktoria Plzeň, kotraž bě w lětach 2011, 2015 a 2016 najlěpša. Zestupić dyrbja kolektiwaj z Morawy FC Brno a SFC Opava kaž tež FK Příbram (město mjez Plzenjom a Prahu). Z 13. městnom spokojom drje budźe Dynamo České Budějovice, kotrež w tabulce před pjeć lětami hišće njewuhladachmy – tam běchu mjena kaž Vysočina Jihlava, Hradec Králové abo Dukla Praha. Mikławš Krawc
A to je kónčna tabulka sezony 2020/2021
1. Slavia Praha 85:20 86
2. Sparta Praha 82:43 74
3. FK Jablonec 59:33 69
4. 1. FC Slovácko 58:33 63
5. Viktoria Plzeň 60:45 58
6. Slovan Liberec 44:32 52
7. FK Pardubice 41:42 52
8. Baník Ostrava 48:38 49
9. Sigma Olomouc 40:46 45
10. Bohemians Praha 40:37 43
11. Mladá Boleslav 49:52 39
