Rumpodich ST Radworja zaso po puću
W zašłych sydom winowatostnych dypkowych hrach je koparske mustwo ...
Tři dypki po słabej hrě
Tigry Bayreuth – Łužiske liški Běła Woda 2:3 (0:1, 2:0, 0:2)
Pjatk běchu so Łužiske lodohokejowe liški do Wagneroweho města Bayreutha nastajili a so wottam samo z třomi dypkami zaso do domizny wróćili. Štož pak wobaj teamaj na lodźe pokazaštej, njebě jara šwarne. Wšako woběmaj zas a zaso kopica hrajerjow pobrachowaše.
Tak so wobaj cyłkaj w prěnich dźesać mjeńšinach najprjedy raz łahodnje jedyn tamnemu bližeštej. Nadobo pak trjechi Rylan Schwartz łatu, a jenož mjeńšinu na to docpě Brad Ross samo nawjedowanje za Łužiske liški. Trjechił bě wón puk po přihrawce Schwartza z njesměrnje wótreho kuta. Hakle mjeńšinu do prěnjeje přestawki mějachu domjacy prěnju wulku šansu, kotruž pak njewužichu. Hrajny nastroj wrota snadnje misny.
W druhej třećinje běchu Liški pasiwne a dachu Bayreuthskich lodohokejistow hru postajeć. Tak sej woni tež kopicu šansow wuhrachu a trjechichu w 25. min. k 1:1. Hakle w poslednjej mjeńšinje, jako mějachu hosćićeljo jednoho muža wjac na lodźe, móžachu woni wospjet wyskać.
Hłowne dźěła za lětsa zakónčene
Sobotu do 3. adwenta su sportowcy Chróšćanskeje SJ z dotwarom barjery a nastajenjom kabiny za trenarjow dźěła při sportnišću zakónčili.
„Dźěl spěchowanskeho projekta gmejny Chrósćicy, štož nastupa nuzne krjepjenje trawnika a porjeńšenje sportoweho centruma ,Jednota‘, steji“, rozłožuje jednaćel Chróšćanskeje SJ Tadej Cyž.
Srjedź septembra su tam dźěłać započeli. Připrawichu połnoawtomatisku podešćowansku připrawu, kotraž trawnik po potrjebje krjepi. Do zemje zapołožene krjepjawki wodu na trawnik pryskaja. Wodu za to ma připrawa z noweje studnje, kotruž běchu niže sportnišća wuryli. Tež wjesnjanostu Marka Klimana (CDU) zwjesela, zo su dźělny projekt SIMUL-wubědźowanja, kotrež je gmejna lětsa dobyła, tak spěšnje zwoprawdźili. Zhromadne dźěło gmejny z towarstwami je wažne a budźe tež dale prašane.
Wutrobny dźak na tutym městnje firmam, kotrež su projekt sobu zwoprawdźili a jón přewodźeja, wšitkim sponsoram a wobdźělenym sportowcam. Wažmy sej inwesticiju, wona so w přichodźe zawěsće k wjeselu wšeje sportowaceje dźěćiny a młodźiny wudani. Jan Macka
Widźał, słyšał, napisał (21.12.20)
FC Bayern – FC Barcelona, to bě dotal jenička koparska hra, za kotruž sym swoju mandźelsku lochce přeswědčił sobu do stadiona so podać a sej duel gigantow wobhladać. Jutře, wutoru, budźe to za mnje wospjet lochka wěcka, hdyž dóstanje wona wječor napoł dźewjećich zastupny lisćik za pokalnu hru Dynamo Drježdźany – Darmstadt 98. Wostanjemy mjenujcy doma. W druhim hłownym pokalnym kole wočakuje načolnik tabulki třećeje ligi štyrnateho z druheje ligi. Za cyłu swójbu (wona dotal hišće ničo wo tym njewě) sym hnydom pjeć lisćikow dóstał, a to za cyłkownje 25 eurow. Městna směmy sej w stadionje wupytać; sedźeć, ležeć abo stać pak budźemy doma w dobrej stwě. Znowa je so překlepanym čorno-žołtym wosebita akcija z předanju zastupnych kartkow poradźiła, kotrež we woprawdźitosći njeeksistuja.
Sport (18.12.20)
Husycu lětsa sami wotběhać
Jubilejne wotběhanje hodowneje husycy lětsa w Němskich Pazlicach njebudźe, tradicija při a wokoło wulkeho hata pak wostanje. Towarstwo Natwar Němske Pazlicy pak chce sportowy podawk, kotryž bě stajnje bjez wubědźowanskeho charaktera, přiwšěm přewjesć. Štóž w času wot 20. decembra 2020 do 3. januara 2021 indiwiduelnje pjeć kilometrow kołowokoło Němskopazličanskeho wulkeho hata absolwuje, a to walkujo, z psom, dźěćacym wozyčkom abo kolesom, dóstanje w cilu wopismo a kołk. Při zachodźe do sportoweho centruma budźe boksa z wopismami a kołkom stać. Natwar Němske Pazlicy chce tež lětsa zaso towarstwo Słónčna pruha, kotrež stara so wo na raka schorjene dźěći, podpěrać. Za to změja w hodownym busu Natwara při zachodźe do sportoweho domu darowansku boksu.
Nastupja we Vilsbiburgu
Wolejbulistki Drježdźanskeho SC hraja jutře w 17 hodź. w 1. zwjazkowej lize we Vilsbiburgu pola Čerwjenych rapakow. Hry na zwjazkowej runinje pokazuja pak w telewiziji na sćelaku SPORT1 pak w livestreamje na www.sporttotal.tv.
27.12. 17:30 Drježdźanski SC –
SC Podstupim
17.01. 14:30 USC Münster –
Wot žórła rěki přez hory a doły
Spočatk winowca smy sej přećeljo a bratřa na połdnjowskim wulěće někotre wosebite městnosće našeje domizny z kolesom wotkryli. Zo za dyrdomdejsku čaru na kóždy pad mountainbike trjebaš, běchmy sej hižo při jeje planowanju spěšnje wuwědomili.
Započała je so naša jězba w Pančicach-Kukowje, zwotkelž jědźechmy přez Jaworu do Krěpjec a Jědlowa. Wottam dźěše dale po pólnych pućikach, zo bychmy sej k žórłu Čorneho Halštrowa blisko hory Žiwin (Hochstein) dojěli. Sćěh falowacych spadkow minjenych měsacow je tón, zo bě tamniše žórło wusaknyło.
Dalša etapa našeje tury běše chětro dyrdomdejska, jako wjedźeše nas čara přez lěs hač k awtodróze A 4 w Porchowje. Puć bě chětro nahły, a poslednje metry dyrbjachmy swoje kolesa njesć, dokelž njebě hižo šćežki za jězdźenje. Docpěchmy skónčnje paralelnu dróhu k awtodróze, kotraž wjedźe přez dźiwinowy móst na Porchowskej horje znowa přez lěs, tónkróć horu dele. Napinace njebě tónkróć teptanje, za to pak sy so chětro koncentrować dyrbjał.
Wulosuja 500 małych wrotow
Zapadołužiski koparski zwjazk (WFV) skedźbnja sportowe towarstwa na atraktiwnu akciju. Tež amaterscy koparjo su drje přeco hišće w lockdownje, ale klětu budźe so bul něhdy zaso kuleć, a to snano z nowymi miniwrotami za dorostowe mustwa. Němski koparski zwjazk a koparski portal FUSSBALL.DE wužiwatej dohodowny čas za wosebitu akciju. Wobaj wulosujetej zhromadnje z regionalnymi a krajnymi zwjazkami cyłkownje 500 małych wrotow za dźěćacu kopańcu. Kóžde sportowe towarstwo, kotrež so na wulosowanju wobdźěli, móže štwore tajke wrota dobyć. 125 towarstwow potajkim nowe małe wrota dóstanje.
Na akciji wobdźělić móžeće so hač do 22. hodownika w 14 hodź., a to z formularom na internetnej stronje WFV. Zwjazk skedźbnja dobyćerjow hižo nětko na to, zo smědźa wrota jeničce za trening a hry dorostowych koparskich mustwow wužiwać a zo su za cyłki młodźiny G, F a E myslene. Do formulara zapisać dyrbja so jenož powšitkowne daty kaž adresa, mjeno towarstwa a mustwa, kotrež bychu wrota w padźe dobyća wuži- wali. Jurij Bjeńš
Z wulkej wolu a zbožom faworita porazyli
Łužiske liški – Lawy Frankfurt 2:1 (0:0; 0:0; 2:1)
Po njetrjebawšej poražce w Bad Nauheimje wočakowachu Běłowodźanske lodohokejowe liški team z Frankfurta nad Mohanom. Z wulkim zbožom a ze sylnej wolu su Běłowodźenjo duel z 2:1 snadnje dobyli. Přećiwnik z Hessenskeje tež chětro ze swojimi šansami broješe, ale Liški maja po měnjenju trenarja Coreyja Neilsona z Mac Carruthom najlěpšeho wrotarja cyłeje ligi.
Serbšćina na kopanišću ma kóždemu samozrozumliwa być
Zašły tydźeń dósta Jurij Bjeńš wot Tadeja Cyža-Njebjelčanskeho pjeć prašenjow, dźensa Clemens Škoda, trenar koparskeho dorosta Sportoweho towarstwa Marijineje hwězdy.
Zaso je přestawka w amaterskim sporće. Kak z njej we wašim towarstwje wobchadźeće?
C. Škoda: Mam zrozumjenje za naprawy. Spytam měrny wostać, postajenja tak derje kaž móžno wobkedźbować a sej naladu kołowokoło sebje dobru dźeržeć. Z rańšim žorćikom je druhdy hižo wjele pomhane. Swary ničo njepomhaja. Naše towarstwo běše po prěnim lockdownje spěšnje zaso aktiwne, a trenowach z młodźinu F w dwěmaj skupinomaj w časowych wotstawkach hač do prózdnin. Derje tež bě, zo dóstachmy w tym času krótkodobnje přeprošenje z Hornjeho kraja (Oberland) na turněr do prózdnin, tak zo móžachmy skepsanu sezonu tola někak hódnje zakónčić. Po lětnjej přestawce startowachmy derje přihotowani samo z dwěmaj mustwomaj młodźiny E a mějachmy štyri dypkowe hry. Bohužel dyrbjachmy do dalšeje nuzoweje přestawki. Tak to je.
Kotre kmanosće a kajkosće dyrbi wustojny dorostowy trenar měć? Što je w treningu z dźěćimi wažne!
