32lětna Carolina Eyckec je na hudźbnym polu mjeztym wulce požadana. Němsko-serbska hudźbnica po cyłym swěće koncertuje, jeje Youtube-kanal ma 100 000 abonentow, jeje wideja buchu 10 milionow razow hladane. Instrument, teremin, na kotrymž wona hraje, pak jenož mało ludźi znaje. W rozmołwje z Vivien Simmel powěda hudźbnica, spěwarka, komponistka a spisowaćelka mjez druhim wo zhromadnym dźěle ze Samyjom Deluxe.
Carolina, móžeš nam prošu něšto wo swojim wosebitym instrumenće rjec?
C. Eyckec: Rady, teremin bě 1920 ruski fyzikar Lew Sergejewič Termen (pozdźišo Leo Theremin) wunamakał. Je to jedyn z prěnich elektroniskich instrumentow, wobstejacych z jednoreho kašćika a dweju antenow. Zo by na tereminje zwuk produkować móhł, njetrjebaš so jeho ani dótknyć. Wotstawk ćěła a rukow k antenomaj tajki zwuk twori. Z prawej ruku reguluješ wysokosć zwuka, z lěwej, hač ma teremin wótře abo mjelčišo klinčeć.
Pytnješ wone zwuki?
C. Eyckec: Ně, pytnješ jenož swoje ćěło. Kóžda mała změna zynk wobwliwuje.
Jako so namaj loni w januarje synk Barnabas narodźi, bě za mnje a mandźelsku hižo jasne, zo chcemy w staršiskim času rjany zhromadny čas we wukraju dožiwić. Dołho w syći rešeršowachmoj, wopytachmoj přednoški a čitachmoj nastawki, kak to z ćěšenkom najlěpje zmištruješ. Kusk dlěje hač poł lěta po tym běše prěni cil našeje dyrdomdejskeje jězby jasny: Indiska!
T ak dowjeze nas třoch mój bratr spočatk nowembra do Berlina. Wottam wotlećachmy z třomi wačokami přez Kijew do New Delhija. Při cyłej našej jězbje pomhaše nam jara Felix Fleischer, pola kotrehož su hižo mnozy Serbja swój dowol zwonka Europy planowali – za to jemu hišće raz wulki dźak.
Daniel Matka a Julia Fiedler staj jako band Madstep nětko hižo po cyłej Němskej požadanaj.
Rodźeny Lejnjan by minjeny kónc tydźenja poprawom na woblubowanym festiwalu Sputnik Spring Break na połkupje Pouch na jewišću stał. Koronapandemije dla pak je tež tón do wody padnył.
Sćelak MDR Sputnik pak měješe ideju, festiwal w radiju wusyłać. Tak mějachu fanojo znajmjeńša kusk atmosfery w bydlenskej stwě abo na zahrodźe. Wot pjatka hač do póndźele DJjojo swoje tačele w studiju wjerćachu. Madstep bě sobotu na rjedźe. Byrnjež to festiwal wězo njenarunał, bě wothłós na Facebooku sćelaka dosć dobry. Nadźijomnje hodźa so festiwale klětu zaso po zwučenym wašnju přewjesć! Jurij Bjeńš
dweju elewow
Sy-li muzikalna/muzikalny,
maš nazhonjenja ze spěwanjom
a chceš so na wuměłskim polu wuspytać, da sy w chórje Serbskeho
ludoweho ansambla wutrobnje
witana/witany.
Trjebamy za nowu hrajnu dobu dweju elewow, kotrajž aktiwnje na koncertach z chórom
a w sceniskich programach SLA sobu skutkujetaj.
Maš-li zajim, požadaj so pod slědowacej adresu:
Serbski ludowy ansambl ptzwr • jednaćelstwo Wonkowna Lawska 2 • 02625 Budyšin
Na lětušim dnju muži běše najebać koronu při najrjeńšim wjedrje tójšto staršich kaž tež młódšich kolesowarjow po puću, zo bychu te abo tamne piwko wupili. Hišće lěpje wone słodźi, hdyž při tym lóštna hudźba live zaklinči. Wo tajku postarachu so na serbskich wjeskach młodźi hudźbnicy skupiny Brankatschki. Woni pobychu spontanje w Hórkach a Nowoslicach, zo bychu so tam wo dobru naladu postarali – a to je so jim wšudźe jara derje poradźiło. Beno Šołta
W Kulowje natwarichu nowu a wulku pěstowarnju. Mjenuje so Dźěćacy dom swj. Marije, štož je na swislach tež serbsce napisane. Maja tam hortowe rumnosće a dalše za pěstowarske kaž tež žłobikowe dźěći. Wo 215 chowancow so w přebywanišću staraja. W dwěmaj skupinomaj su ći, kotřiž chcedźa serbšćinu wuknyć. Ze 16 dźěćimi běštej nazhonita pěstowarka Cornelia Korchowa a Marija Domaškec, kotraž so na kubłarku wukubłuje, spěw „Moja ruka, što ta čini“ nazwučowałoj, a wšitke su mócnje sobu spěwali.
Dźěći, kotrež su přewažnje z Kulowa, ale tež ze Salowa a Brěžkow, so prócuja serbsce rěčeć, štož sej jich starši přeja a na čož serbske kubłarki jara dźiwaja. Najmłódša w skupinje je dwulětna Hana Möllerec. Paulina Dreselec swjećeše njedawno narodniny. Štyri lěta wona je, a dźěći su jej rjenje serbsce zbožo wupřeli. Runje samsny dźeń je Gustav Heibach ze swojej maćerku prěni raz na zažiwjenje do serbskeje skupiny přišoł. Zawěsće so tež wón spěšnje zažiwi.
Šěsć dźěći ze skupiny so wjeseli, zo su w pěstowarni wjele nawuknyli. Wšako póńdu za tři měsacy do šule. Tekst a fota: Alfons Handrik
Wjedro minjenych dnjow z wjele słóncom bě za mnohe płody a rostliny jara wunošne. Tak na přikład so tele tři dźěći dźiwaja, kak wulke su truskalcy pola wowki w Koslowje narostli. Z měridłom je štyrilětny Benedikt (napr.) wosebje wulki słódki płód wotměrił a dźiwaše so skónčnje nad sydom centimetrami.
Tekst a foto: Franciska Langec
Nalětnje słónco dźeń a wjac ludźi won do přirody wabi. Wšudźe drje namakaš rjane kućiki, ale komuž je znaty wobswět před jeho domom přewostudły, tón njech sej raz druhdźe dojědźe. Tak chcych so tež ja zaso jónu do Sakskeje Šwicy podać. Krutych wobmjezowanjow korony dla pak to w času jutrownych prózdnin njemóžach. Ćim rjeńšo bě, jako nětko skónčnje tak daloko bě.
Königstein a wokołopuć přez twjerdźiznu
Sobotu spočatk meje móžeše so naše planowane pućowanje při optimalnych 20 stopnjach celsija wotměć. Na pućowanskej app Komoot běch so za woblubowanu čaru Popowski kamjeń (Pfaffenstein)-wuško (Nadelöhr) rozsudźiła.
Dopołdnja w jědnaćich zetkachmy so na parkowanišću w měsće Königstein nad Łobjom. Tam wšak bě chětro wótře. Awtow a nimo jěducych ćahow dla njemóžachmy so ani rozmołwjeć. Nastajichmy so tuž hnydom na puć, mój bratr z přećelom a ja ze znatym a jeho psom.