Přetwarja katedralu swj. Jadwigi
Berlin (B/SN). Zwjazk spěchuje planowane saněrowanje a přetwar Berlinskeje katedrale swj. Jadwigi z cyłkownje dwanaće milionami eurow. W budgeće zwjazkoweho twarskeho ministra je za to klětu jedyn milion eurow předwidźany, za lěto 2018 šěsć a za 2019 pjeć milionow eurow. Arcybiskopstwo Berlin trochuje kóšty cyłkowneho projekta na 60 milionow eurow, 43 milionow eurow planuja za biskopsku cyrkej a 17 milionow eurow za susodny Bernharda Lichtenbergowy dom.
Friedel nowy wiceoficial
Konsekwentnje přećiwo namocy
Osnabrück (B/SN). Měrowy etikar Fernando Enns cyrkwje namołwja, so konsekwentnje zasadźeć přećiwo namocy a kóždejžkuli wojerskej akciji. Dołhož cyrkwje namóc jako opciju widźa, maja wone problem, zo jim ludźo hižo njewěrja, rjekny Enns w Osnabrücku. Tam bě synoda wobzamknyła, widźeć wojersku namóc jako poslednju móžnosć, wobarać akutnej namocy.
Planuje młodźinsku synodu
Vatikan (B/SN). Bamž Franciskus je přizjewił swětowu biskopsku synodu na temu „Młodźina, wěra a namakanje powołanja“. Zetkanje ma so wotměć w lěće 2018 we Vatikanje a ma zdobom dale wjesć swójbne synody lěta 2014/2015. Tema je přewod młodych katolikow při aktiwnym dźěle w cyrkwi a towaršnosći.
Pakistan sylni prawa žónskich
Zběrka dokumentow wušła
Berlin (B/SN). K prašenjam swójby wuda Němska biskopska konferenca njedawno zběrku dokumentow swětoweje synody. W njej namakamy tež prědowanja bamža Franciskusa a zakónčacy dokument synody. Nimo toho su tu podate rěčne přinoški němskich wobdźělnikow na synodźe a wuslědki wuradźowanja dźěłoweje skupiny. Brošurka hodźi so internetnje pod www.dbk.de skazać.
Konflikt mjez ÖRK a Israelom
Dom ćěkancow wopytał
Drježdźany (B/SN). Prezident Diakonije Němskeje Ulrich Lilie je nadźijepołny, zo zwjazkowa republika wužadanja připućowacych ćěkancow zmištruje. „Smy jedyn z najbohatšich krajow swěta. Z toho wurosće winowatosć dźělenja“, rjekny Lilie tydźenja w sakskej stolicy. Wopytał bě wón přebywanišćo za dźěći-ćěkancow bjez staršich w Rodewischu a Drježdźansku poradźowarnju migrantow Cabana. Chcyše tak hódnoćić angažement za ćěkancow a wosebje čestnohamtskim pomocnikam rjap sylnić. Prezident Diakonije naspomni tež protesty a namocne ataki na migrantow a jich přebywanišća. „Dźe wo to, zo sylnimy předewšěm sprawny angažement“, Ulrich Lilie podšmórny.
Maja katolsku uniwersitu
Rom (B/SN). W irakskim měsće Erbil su katolsku uniwersitu wotewrěli. Wona je wšěm studowacym přistupna, předewšěm pak ma zajim młodych křesćanow budźić. Wot časa nadběhow teroristiskeje organizacije Islamski stat pytaja tysacy křesćanskich ćěkancow w Erbilu škit.
Wusypanje popjeła zakazane
Pjenježny podźěl podwojili
Berlin (B/SN). Zwjazk chce swój financny podźěl za 500. róčnicu reformacije w lěće 2017 podwojić. Město pjeć milionow eurow lěta 2017 ma so potom 11,65 milionow eurow jako přidawk Zwjazka za jubilejne swjatočnosće přewostajić, wobkrući zapósłanc zwjazkoweho sejma Christian Hirte (CDU) w Berlinje. Zwjazk přidawa k 500. jubilejej reformacije wot 2011 lětnje pjeć milionow a lětsa sydom milionow eurow.
Nadźija na lěpše poćahi
Moskwa (B/SN). Ruska ortodoksna cyrkej nadźija so po wólbnym dobyću Donalda Trumpa za prezidentstwo USA, zo so mjezynarodne poćahi wotputaja. Metropolit Hilarion, nawoda cyrkwinskeho zarjada za wonkowne poćahi, rjekny ruskej powěsćerni Interfax w Moskwje, zo njeje přičiny za euforizm. Wotewrjene tež wostanje, hač Trump jako ameriski prezident swoje přilubjenja z wólbneho boja zwoprawdźi a kak budźe wón na čole stata jednać. Přiwšěm schadźa nětko nadźija, zo so cyły system mjezynarodnych poćahow polěpši a zo wuwije so zhromadna swětowa koalicija přećiwo terorizmej.
Cyrkej wuznamjenjena
Kollig budźe generalny wikar
Berlin (B/SN). 60lětny pater Manfred Kollig z Münstera budźe nowy generalny wikar arcybiskopstwa Berlin. Kollig, přisłušnik rjadu Arnsteiner Patres, budźe wot 1. februara naslědować prelata Tobiasa Przytarskeho, kiž je nětko propst cyrkwje swj. Jadwigi. Kollig je so 1956 w Koblenzu narodźił, zastupi 1974 do rjadu, złoži 1978 wěčne sluby a bu 1981 na měšnika wuswjećeny.
Planuja wosadny centrum
Annaberg-Buchholz (B/SN). Milionowy projekt wosadneho centruma planuje wosada swj. Hany w Annabergu-Buchholzu. Wón ma nastać na cyrkwinskej ležownosći, hdźež steji nětko hišće stare twarjenje. W nowotwarje změje na sto ludźi městno. Farar Karsten Loderstädt wuchadźa z toho, zo płaći nowotwar něhdźe milion eurow, a 200 000 eurow budźe wosada sama płaćić dyrbjeć. Hižo nětko wona za to pjenjezy zběra. Prěni zaryw je planowany za kónc lěta 2018. Lěto pozdźišo swjeći cyrkej swj. Hany swój 500. jubilej. Potom chcedźa nowy dom wotewrěć. Dźěćom a młodostnym chcedźa tak skićić dobre wuměnjenja za intensiwne skutkowanje.
Gymnazij wobsteji 25 lět
Atomowe brónje wotstronić
New York (B/SN). Zjednoćene narody (UN) chcedźa zahajić jednanja k wotpokazanju a wotstronjenju atomowych bróni. USA, Ruska, Francoska a Wulkobritaniska kaž tež Israel, kiž ma pječa tohorunja atomowe brónje, hłosowachu přećiwo tajkim jednanjam. 123 sobustawskich statow hłosowaše za to. Konferenca ma so w měrcu w New Yorku, we hłownym sydle UN, započeć.
Snano bamž tola přijědźe?
Rom (B/SN). Bamž Franciskus njeje swoje pućowanje do Němskeje k swjatočnosćam „500lětny jubilej reformacije“ w lěće 2017 hišće cyle wotprajił. Nimale wěste w jeho pućowanskim planje dotal jenož je, zo wopyta wón Indisku a Bangladesh, rjekny wón na wróćolěće žurnalistam z dwudnjowskeho přebywanja w Šwedskej. Tež předsyda Němskeje biskopskeje konferency, kardinal Reinhard Marx, běše před pućowanjom bamža na zahajenje swjatočnosćow k reformaciji w Šwedskej rěčał wo móžnym wopyće bamža w Němskej k zakónčenju jubilejneho lěta.
Biskop zawjazuje měšnikow
Přihotuja 750. jubilej klóštra
Nowa Cala (B/SN). Klóšter Nowa Cala w Braniborskej swjeći za dwě lěće 750lětne wobstaće. Jubilejny swjedźeń koordinuje hudźbny wědomostnik Tilman Schladebach, kaž Załožba Nowa Cala wozjewi. 750. klóšterski jubilej přihotuje hižo wot oktobra 2015 dźěłowa skupina, kotrejž přisłušeja komuna a zarjadnistwo Noweje Cale, ewangelska kaž tež katolska wosada, klóšterska piwarnja a Załožba Nowa Cala.
Biskopja so schadźowali
Katolsku chorownju chwalił
Berlin (B/SN). Chorownja swj. Jadwigi, wobstejaca 170 lět, je najstarša Berlinska chorownja w nošerstwje katolskeje cyrkwje. Na swjedźenskim zarjadowanju wobdźěli so tež Prěni měšćanosta Michael Müller (SPD). W narěči wón chwaleše, zo steji chorownja za „žiwu mjezyčłowjeskosć“. Wot załoženja pomha wona pacientam, njehladajo na jich nabožinu a pochad. Tež dźensa wukonja wažny přinošk k tomu, zo wostanje rosćaca stolica „čłowjeska a solidarna“.
Zwjazani we wšelakorosći
Genf (B/SN). Lutherski swětowy zwjazk (LWB) a katolska cyrkej stej do swjatočnosćow k 500. róčnicy reformacije swoje zhromadnosće wuzběhnyłoj. Po lětstotkach trajacych napjatosćach a konfliktach su katolscy a ewangelscy wěriwi 31. oktobra prěni raz na globalnej runinje zhromadnje w šwedskim Lundźe na reformaciju spominali. Zhromadnu Božu słužbu swjećeštaj tam bamž Franciskus a prezident LWB, biskop Munib Younan.
Modlić so za přesćěhanych
Připóznaće dźiwow přiwótřene
Vatikan (B/SN). W přichodźe budźe ćešo, dźiw wobkrućić dać. Vatikan je proces za připóznaće dźiwow wobdźěłał a je jón zdźěla přiwótřił. Zo njehodźi so wuhojenje wujasnić, dyrbi w přichodźe sydom město dotal pjeć ekspertow zwěsćić, tež jich zarunanje za to ma transparentniše być. A woni njesmědźa kontakt měć ze stajerjemi próstwow na zbóžno- abo swjatoprajenje.
Twar cyrkwje postupuje
Barcelona (B/SN). Hižo 134 lět twarja na wonkownym znamjenju španiskeje metropole Barcelony. W lěće 2026, k 100. posmjertninam prěnjeho architekta Antonija Gaudija, ma cyrkej Sagrada Família hotowa być. Nětko započinaja 140 metrow wysoku wěžu maćerje Božeje twarić. Nastać maja tež štyri wěže ewangelistow a 170 metrow wysoka wěža Chrystusa.
Poćahi k Pólskej zesylnić
Berlin (B/SN). Berlinski arcybiskop Heiner Koch je hódnoćił wujednanje ze susodnym krajom Pólskej po wójnje a wuhnaću. To „je žohnowana stawizna, kotraž ma wjele činić z miłosću a wodaćom“, wujasni Koch w rozhłosu RBB. Zdobom wón namołwi, njepopušćić „w našim prócowanju, dobre poćahi rozkćěć dać, a tak zdobom skrućić w Europje měr a swobodu“.
