Praha/Drježdźany (dpa/SN). Němska a Čěska chcetej w boju přećiwo kriminelnym wusko hromadźe dźěłać. „Tele policajske zrěčenje je jedne z najmodernišich w Europje. Špatna powěsć to złóstnikam“, rjekny zwjazkowy nutřkowny minister Thomas de Maizière (CDU) wčera při podpisanju zrěčenja w Praze swojemu čěskemu koleze Milanej Chovanecej. Při zhromadnych patruljach maja policisća wobeju krajow přichodnje na woběmaj bokomaj mjezy rozšěrjene prawa. Tak smědźa woni wosoby kontrolować, awta přepytać a podhladnych nachwilnje zajeć. Dotalne dojednanje mjez krajomaj pochadźa hišće z časa do přistupa Čěskeje k EU a k Schengenskemu rumej.
Nowosć je kooperacija při snadnych přeńdźenjach kaž wobchadnych deliktach abo wobsydstwa snadnych mnóstwow drogow. Tole ma wažna kročel w boju přećiwo droze crystal być, kotruž z Čěskeje do Němskeje woža. Při tym nochcedźa so jenož na pašowanje małych mnóstwow koncentrować, ale předewšěm wulkowikowarjow přesćěhać.
Nimale 300 000 cigaretow, schowane w blidowych platach, su cłownicy njedaloko Drježdźan w małotransporteru našli. 37lětny šofer bě při kontroli na parkowanišću při awtodróze A 4 jenož 200 cigaretow a wosobinske wěcy pokazał. Při přeswětlenju awta pak napadnychu zastojnikam spodźiwnosće w 23 składowanych drjewjanych platach. Po dokładnym přepytowanju nańdźechu w nich 271 000 ilegalnych cigaretow.
Hoberskeho nawala dla su planowanu hromakowu party w braniborskim Beelitzu wotprajili. Na wšě 20 000 ludźi bě so internetnje za podawk 9. meje přizjewiło. Tak je so měšćanosta na policiju wobroćił, ličo z wobchadnym chaosom. Ta jemu radźeše, najebać hižo předatych 2 500 zastupnych lisćikow, swjedźeń wotprajić. Zarjadowarjo liča přiwšěm z něhdźe 10 000 wopytowarjemi.
Nachwilne postajenje prawniske
Choćebuz (dpa/SN/ch). Po akciji přiwjazanja z rjećazom při wuhlowej jamje Wjelcej-juh su wobswětowi aktiwisća nachwilne postajenje přećiwo sebi skónčnje akceptowali. Na jednanju na Wyšim krajnym sudnistwje Berlin-Braniborska (OLG) woni powołanje přećiwo wusudej Choćebuskeho krajneho sudnistwa wčera cofnychu, kaž rěčnik OLG informuje. Nazymu 2013 bě so dźewjeć aktiwistow z rjećazom na kolije přiwjazało a nimale cyły dźeń dźěło w brunicowej jamje blisko Choćebuza haćiło, protestujo tak přećiwo planowanemu rozšěrjenju jamy. Wobsadźenje kolijow bě „wotpohladany a njezakonski zasah“ do prawa koncerna, kaž Vattenfall zdźěla.
Pjenjezy za braniborsku kulturu
Berlin (dpa/SN/K). Wobraz wo spionažnej aferje njesłyšaneho razu, zo bě mjenujcy Zwjazkowa tajna słužba (BND) ameriskej tajnej słužbje NSA informacije wo němskich firmach dodawała a zarjad kanclerki wo tym wědźał, nabywa jasnišich konturow. Nětko publikuja so wšelke nadrobnosće wo tym, kajki je rjećaz informacijow do zarjada kanclerki był.