Kubłaja fachowcow za wottwar
To a tamne (09.09.20)
Pruwowanje policajskich psow přepadnył je rottweiler Balou w Bremerhavenje. Balou so jako słužbny pos „scyła njehodźi“, dokelž je prosće přeluby a tajki „prawy swójbny“, kaž rěčnik policije praji. Su tuž za nowym wobsedźerjom pytali a jeho mjeztym namakali. Balou bě loni runje wosom tydźenjow stary k policiji přišoł. Mjeztym je wurosćeny a sylny, ale dospołnje njestrašny.
Ručna toboła sobujěduceje na motorskim je so wosrjedź jězby zapaliła. Ani 15lětna ani lěto starši šofer pak njejstaj to pytnyłoj. Prawdźepodobnje bě so horceho wupuchadła dótknyła. Młodostnaj jědźeštaj dale, doniž jeju šoferojo na płomjenja njeskedźbnichu. Hakle na to wodźer motorskeho na pobóčnej čarje awtodróhi A 6 pola Weinsberga zasta. Wobsadka chorobneho awta płomjenja podusy. Nichtó so na zbožo njezrani.
Z nowym mjenom dale skutkować
Znate mjeno so pominje. Jako Smochčanske kubłanišćo swjateho Bena kroči zarjadnišćo biskopstwa Drježdźany-Mišno blisko Budyšina z nowym programom do přichoda.
Smochćicy (SN/at). „Naš nadawk wostanje, ludźi z křesćanskej wěru a cyrkwju hromadu přinjesć. Při tym je wažne, kak w našej towaršnosći, w kotrejž smy my křesćenjo mjeńšina, so ludźom zbližamy a jich přeprošamy naše poskitki wužiwać.“ To rjekny Drježdźansko-Mišnjanski biskop Heinrich Timmerevers w Smochćicach, hdźež předstajichu wčera nowy wonkowny wobraz hłuboko do regiona zakótwjeneho zarjadnišća: „Dom biskopa Bena je wotnětka Smochčanske kubłanišćo swjateho Bena.“
Altmaier dwěluje sankcijow dla
Berlin (dpa/SN). Hospodarski minister Peter Altmaier dwěluje hladajo na zajědojćenje ruskeho režimoweho kritikarja Alekseja Nawalneho na skutkownosći sankcijow přećiwo Ruskej. Jemu njeje žadyn pad znaty, w kotrymž bychu chłostanske naprawy kraje kaž Rusku pohnuli swój dotalny kurs změnić. To rjekny politikar CDU wčera w telewizijnym sćelaku ARD. Rěčnik Krjemla Dmitrij Pjeskow kóždu sobuwinu Krjemla na zajědojćenju Nawalneho wotpokazuje.
Schulze přećiwo premijam
Berlin (dpa/SN). Do dźensnišeho wjerškoweho zetkanja zastupnikow awtomobiloweje industrije z kanclerku Angelu Merkel (CDU) je zwjazkowa wobswětowa ministerka Svenja Schulze premije za nakup bencinowych a dieselowych awtow wotpokazała. „Sym zasadnje za to, awtomobilowu industriju podpěrać, trjebamy pak nowe a nic stare recepty“, rjekny politikarka SPD nowinarjam. Zaměr ma być, industriju za klimje přichilenu mobilitu přichoda wukmanić.
Lětsa jenož internetny zjězd
Aktiwisća wjacorych wobswětoškitnych organizacijow su wčera před ...
Zrěčenje hačdo kónca lěta wotzamknyć
Choćebuz (SN/at). Parlamentariska přirada Załožby za serbski lud na tym wobstawa, zo wobdźělene strony nowe financowanske zrěčenje za Załožbu za serbski lud za dobu 2021–2026 hač do kónca lěta wotzamknu. „Ma zaručene być, zo móže serbska załožba swoje nadawki wot prěnjeho dnja noweho lěta porjadnje spjelnjeć“, rjekny předsyda parlamentariskeje přirady, zapósłanc Sakskeho krajneho sejma Marko Šiman (CDU), wčera po posedźenju gremija w Choćebuzu. Tak je solidna financna baza trěbna. Wo sumach parlamentownicy wčera rěčeli njejsu.
Łužiscy zapósłancy zwjazkoweho sejma Klaus-Peter Schulze (CDU), Silvia Lehmann a Thomas Jurk (wobaj SPD) maja nětko nadawk so sobu wo to starać, zo etatnicy srědki za dalewjedźenje digitalizacije serbskeje rěče jako přidatny projekt nimo załožbowych pjenjez w zwjazkowym etaće 2021 zakótwja.
Minister: Komuny sobu zapřijeć
Wojerecy (dpa/SN). Swobodny stat Sakska chce komuny a regiony při zdźěłanju do přichoda sahacych projektow nastupajo strukturnu změnu wusko zapřijeć. „Chcemy přewodźowace wuběrki wutworić, kotrež projekty wuzwola. Nadźijomnje móžemy dopokazać, zo ze srědkami zamołwiće wobchadźamy, zo bychmy strukturnu změnu wuspěšnje zmištrowali, rjekny minister za wuwiće struktury Thomas Schmidt (CDU) na konferency wjesnjanostow Łužiskeho rewěra wčera we Wojerecach.
Kaž minister Schmidt potwjerdźi, trjebaja za strukturnu změnu cyły mozaik naprawow. Wosebitu wažnosć kładu na to, wutworić nowe dźěłowe a wukubłanske městna.
Němski zwjazkowy sejm a Zwjazkowa rada stej spočatk julija zakonske zakłady za kónc zmilinjenja brunicy a za strukturnu změnu schwaliłoj. Hač do lěta 2038 chcedźa cyłkownje 40 miliardow eurow w potrjechenych kónčinach inwestować, z toho 2,4 miliardy eurow do sakskeho dźěla Łužicy.
Maas: Hdźe je Kolesnikowa?
Mjezynarodna starosć wo dóńt běłoruskeje opoziciskeje politikarki
Brüssel (dpa/SN). Europska unija žada sej po słowach społnomócnjeneho za wonkowne naležnosće Josepa Borrella, wšěch zajatych opozicionelnych w Běłoruskej hnydom pušćić. EU swojowólne zajeće po wólbach w Běłoruskej raznje zasudźa, rjekny Borrell w Brüsselu. Wuraznje mjenowaše wón wodźacu zastupnicu opozicije Mariju Kolesnikowu, kotraž je wot wčerawšeje póndźele zhubjena. Koordinowaca rada ciwilneje towaršnosće w Běłoruskej z toho wuchadźa, zo su 38lětnu zawlekli. Borrell na to skedźbni, zo su cyłkownje 633 ludźi po njedźelnej měrniwej demonstraciji přećiwo režimej w Běłoruskej zajeli.
Hornc bórze prózdny?
Špatny powětrstrowotu wohroža
Kopenhagen (dpa/SN). Zanjerodźeny powětr strowotu čłowjeka dale najbóle wohroža. Kóždolětnje wuměra jeničce w Europskej uniji 400 000 ludźi dočasnje na sćěhi škódnych maćiznow w powětře, kaž přepytowanje Europskeje wobswětoweje agentury wujewja. Wotpowědnu rozprawu su dźensa w Kopenhagenje wozjewili. Za nju běchu daty wo wliwach wobswěta na strowotu a derjeměće Europjanow analyzowali. Přiwšěm je so połoženje minjene lěta polěpšiło: Lěta 1990 běchu hišće milion smjertnych padow špatneho powětra dla zličili.
Na druhim městnje steji poćežowanje ludźi hary dla, štož wjedźe k 12 000 smjertnym padam, w rozprawje dale rěka. Tež wuskutki klimoweje změny kaž horcota a zapławjenja přiběraja. Ludźo w měšćanskich kónčinach su wot klimoweje změny najbóle potrjecheni.
Dalše wot wobswětoweje agentury mjenowane faktory su mjez druhim na antibiotiku rezistentne bakterije a zanjerodźena pitna woda. Najwjace smjertnych padow wobswěta dla maja w Bosniskej-Hercegowinje, najmjenje w Islandskej a Norwegskej, rozprawa zwěsća.
