Sindelfingen (dpa/SN). Awtotwarc Daimler je dźensa w Sindelfingenje nowu twornju wotewrěł. W tak mjenowanej „factory 56“, kotraž je dospołnje digitalizowana, budu nowy Mercedes typa S-klasy zhotowjeć. Žana druha serija njeje za koncern wuznamniša a nima tajki prestiž. Zdobom kładźe Daimler wulku wažnosć na prěnje elektroawta. „Factory 56“ ma hladajo na produkciju jězdźidłow nowe měritka sadźeć.
Chce njewotwisnosć Šotiskeje
Edinburgh (dpa/SN). Šotiske knježerstwo zasadźa so za nowy referendum wo njewotwisnosć. W naćisku zakonja chce nětko časowy plan, wuměnjenja a dokładne prašenja sformulować, tak zo móhło wo nim wothłosować. To zdźěli wčera prěnja ministerka Šotiskeje Nicola Sturgeon. Na přichodnych wólbach parlamenta klětu w meji chce so wona za njewotwisnosć kraja zasadźić. Sama rozsudźić wšak njemóže. Sturgeon trjeba přihłosowanje z Londona.
Zwaža so na kedźbliwy spočatk
Zwönitz (dpa/SN). Suchota je ratarjow w Sakskej lětsa znowa jara poćežowała. Regionalnje su tež pózdnje zmjerzki a krupy škodu načinili. Tak běchu wunoški w jednotliwych kónčinach swobod- neho stata chětro rozdźělne, rozprawješe dźensa krajny burski zwjazk w Zwönitzu. Pódla bě mjez druhim prezident Torsten Krawczyk a sakski wobswětowy minister Wolfram Günther (Zeleni). Posledni mjenowany bě sej hakle njedawno žadał, zo měli so ratarjo znowa nastajić a systematisce něšto změnić. Tak móhli lěpje na wjedrowe ekstremy reagować. „Pytnjemy, zo njejstej suchota a njedostatk wody w Sakskej hižo žane wuwzaće, ale stej mjeztym normalny zjaw“, rjekny Wolfram Günther.
Po datych stejnišćach měli ratarjo nowe družiny, kaž na přikład jahły, soju abo pšeńcu z dołhimi kochtami, wuspytać. Tež mjenje husty wusyw, zaměrne hnojenje a wobswětej tyjace wobhospodarjenje polow móhli pomhać.
Kaž Torsten Krawczyk praji, njemóža wuskutki klimoweje změny prěć. Kóžde ratarske předewzaće ma so tuž na nju nastajić a swoje plany přiměrić.
Po wšěm zdaću skutkowny škit před paduchami skići kumštna kurjawa. Tajku naprawu su w Düsseldorfskej bance instalowali, a wšitko je derje fungowało. Alarma dla je so tam po wšěch rumnosćach husta mła wupřestrěła. Bohužel pak jednaše so wo wopačny alarm, tak zo běchu přistajeni chětro překwapjeni. Wohnjowa wobora dyrbješe samo wjacorych sobudźěłaćerjow z banki wjesć, dokelž běchu bjez kóždeježkuli orientacije. Čehodla bě alarm wudyrił, njeje jasne. Najebać to je wěste, zo instalowana kurjawa skutkuje.
Zo móža jehnjata jara drohotne być, pokazuje přikład ze Šotiskeje. Minjeny tydźeń přewjedźechu w Lanarku awkciju, hdźež docpě młodźo z mjenom Double Diamond (dwójny diamant) sumu nimale 412 000 eurow a je tak do Guinessoweje knihi rekordow zašło. Kaž šotiscy burja měnja, njejsu hišće ženje rjeńšu wowcu widźeli.
Podstupim (dpa/SN). Dźěłarnistwa a dźěłodawarjo su dźensa w Podstupimje wo mzdach něhdźe 2,5 milionow přistajenych zjawneje słužby w Zwjazku a komunach jednali. Tak žadaja sej dźěłarnistwa za nich 4,8 procentow wjace pjenjez. Snadne mzdy maja znajmjeńša wo 150 eurow postupić. Druhe koło jednanjow je za 19. a 20. september předwidźane, třeće koło za 22. a 23. oktober.
Zaso wjace bjezdźěłnych
Nürnberg (dpa/SN). Ličba bjezdźěłnych w Němskej je w awgusće znowa rozrostła. Wina na tym pak njeje koronapandemija. Kóžde lěto w samsnym času zwěsća Zwjazkowa dźěłowa agentura w Nürnbergu sezonalny zjaw, zo do lětnich prózdnin mnohe dźěłowe zrěčenja wuběža. Po informacijach dźěłoweje agentury njeměješe minjeny měsac 2,95 milionow ludźi žane dźěło. To bě 45 000 wjace hač w juliju a 636 000 wjace hač loni. Bjezdźěłnostna kwota wučinješe 6,4 procenty.
Puigdemont ze strony wustupi
Drježdźany (dpa/SN). Sakska ministerka za strowotnistwo Petra Köpping (SPD) wobydlerjow namołwja, pomhać w boju přećiwo afriskej swinjacej mrětwje. „Najebać to, zo je nastupajo koronapandemiju wjele mocy trjeba, njesměmy strach mrětwy zabyć“, Köpping wčera w Drježdźanach zwurazni. Ludźo njeměli žane zbytki žiwidłow do přirody mjetać abo na zastanišćach podłu dróhow zawostajić. Zahinjene dźiwje swinje dyrbjeli zarjadam přizjewić. Plahowarjo swini měli na wulku wěstotu w swojich chlěwach dźiwać.
Z informaciskej kampanju, kotraž měri so mjez druhim na šoferow, pućowarjow a hajnikow, chce sakske strowotniske ministerstwo na problem skedźbnić. Za ludźi je mrětwa njestrašna, plahowarjo skotu pak měli z ekstremnymi wuskutkami ličić. Tak njemóhli swoje wudźěłki eksportować, a jich eksistenca by wohrožena była.
Před měsacami bě afriska swinjaca mrětwa na zapadźe Pólskeje wudyriła, ale njeje mjezu do Němskeje na zbožo přewinyła. Tuchwilu njejsu žane pady mrětwy blisko hranicy.
Minsk (dpa/SN). Opozicija w Běłoruskej chce z cyłokrajnym stawkom ćišć na statneho šefa Aleksandera Lukašenka wukonjeć. Dźensa njeměł tam nichtó na dźěło hić, rěkaše w připowědźenju. Organizatorojo mjenowachu masowy stawk najwjetši w stawiznach kraja.
Runočasnje je demokratiske hibanje wokoło Marije Kolesnikoweje wozjewiło, zo su nowu stronu za wobnowjenje kraja załožili. Strona z mjenom Wmjestje (Zhromadnje) měła ludźi, kotřiž chcedźa něšto změnić, podpěrać, 38lětna wčera zdźěli. Předewšěm dźe wo to, zamołwitosć za natwar noweje towaršnosće přewzać, kaž Kolesnikowa wuzběhny.
Hižo něhdźe tři tydźenje w Běłoruskej protestuja a stawkuja. Wuchadźišćo su manipulacije při wólbach. Z 80 procentami hłosow wolerjow bu Lukašenko znowa šef stata. Demokratiske hibanje pak ma Swjetlanu Tichanowskaju za dobyćerku. Wona je z eksila w Litawskej tohorunja k stawkej namołwjała, a to ze słowami: „Pokazajće, zo Lukašenko žadyn šulski direktor njeje.“
Wojerecy (AK/SN). Iniciatiwa Ciwilna kuraža Wojerecy wabi za wobdźělenje na wólbach Wojerowskeho wyšeho měšćanosty přichodnu njedźelu, 6. septembra. „Kóždy měł zamołwiće rozsudźić, komu při wólbach načolnika města swój hłós da. Dźe wo naše město, wo sylne Wojerecy“, podšmórnje sobudźěłaćerka koordinaciskeho městna kubłanje a koordinatorka za politisko-historiske projekty města Wojerec Cindy Paulick.
Jedna-li so wo woprawdźiteho krokodila, ma wón w Němskej relatiwnje dobre šansy přežiwić, zdźěli wčera slědźer Oliver Wings z Martina Lutheroweje uniwersity Halle-Wittenberg. Prašała bě so za tym powěsćernja dpa. W rěce Unstrut pytaja za krokodilom, kotrehož běchu tam wuhladali. Wings wšak skedźbnja na riziko, kotrež měli sej ludźo wuwědomić. Wšako jedna so wo strašne zwěrjo. Wone drje pomałe a spłóšiwe skutkuje, ale móže spěšnje kaž błysk metry daloko z wody skočić.
Chětro hłódny drje bě paduch minjeny pjatk we Würzburgu. Tak njemóžeše 41lětny dočakać a je ćelace medaljonki hnydom syre w kupnicy zjědł. Jako policija přijědźe, njeje wón spontany přikusk zapłaćić móhł, dokelž njeměješe žane pjenjezy při sebi, za to pak konop.