Berlin (dpa/SN). Mjenje stresa, wjace chwile za swójbu a samo wjetša produktiwita: Domjace dźěło koronakrizy dla bě mnohim dźěławym pozitiwne nazhonjenje, kaž z přepytowanja chorobneje kasy DAK wuchadźa. Bě-li do pandemije 21 procentow ludźi prawidłowneho stresa dla skoržiło, bě jich za čas koronakrizy jenož hišće 15. Slědźerjo běchu so 7 000 dźěławych prašeli. Mjez tymi, kotřiž doma dźěłaja, rjekny 56 procentow, zo su tam produktiwniši hač w běrowje. Dwě třećinje twjerdźitej, zo móža powołanje a swójbu doma lěpje zwjazać. Mnozy wjesela so přidatneho časa dla, dokelž njetrjebaja na dźěło jězdźić.

Při wšěch pozitiwnych wuskutkach domjaceho dźěła pokazuja zamołwići tež na negatiwne aspekty: Nimale kóždy druhi woprašany paruje jasne dźělenje mjez dźěłom a priwatnym žiwjenjom. Mjez ludźimi hač do 29 lět je to samo 52 procentow. Třom štwórćinam woprašanych pobrachuje kontakt ke kolegam.

Zjawny list Mättigoweje załožby podawkow w Budyšinje dla

Budyšin/Podstupim (SN). W debaće wo móžne wutworjenje prawicarskeho centruma w Budyšinje z rapperom Chrisom Aresom na čole je so Załožba dr. Gregoriusa Mättiga ze zjawnym listom na Budyšanow a politisce zamołwitych wobroćiła. „Podawki a wotpowědne rozprawy nowin wo Budyšinje mjez wšěmi, kotrymž je spomóžne wuwiće města a regiona wažne, starosć a zrudobu zbudźeja“, w lisće rěka. „Aktualny nastork je informacija, zo chce so w ródnym domje Gregoriusa Mättiga, wusahowaceho lěkarja a dobroćela ze 17. lětstotka, dubio­zna ludźi zacpěwaca institucija zasydlić.“ Z teje přičiny je załožba, kotraž je w Podstupimje zasydlena, wobsedźerja domu prosyła, swojej zamołwitosći napřećo městu, jeho stawi­znam a přichodnemu wuwiću wotpowědować a swoje rumnosće prawicarsko-nacionalistiskim a ludźi zacpěwacym kruham, kotrež wustawoškit hižo wobkedźbuje, zapowědźić. Mättigowa załožba je přeswědčena, zo je wobsedźer domu jeje argumentam napřećo přistupny. „Pytajmy zhromadnje za pućom na dobro města a zhromadneho přichoda.“

Łuty (SiR/SN). Wobydlerjo Łutow su ze swojej cyrkwju a jeje zwonomaj na wosebite wašnje zwjazani. To so tuchwilu zaso raz nazornje pokazuje.

Hišće před dnjemi stej zwonaj cyrkwineje wěže prawidłownje na Bože słužby abo na chowanja wołałoj. Dlěši čas hižo pak bě słyšeć, zo stej 500 lět starej woclanej zwonaj swój zwučeny zwuk zhubiłoj. „Tón zdawaše so tupy być a druhdy bě tež hišće jenož jedyn zwón słyšeć“, rozprawja Katrin Klein, čłonka cyrkwinskeje rady. Zhromadnje z dalšimi sobuwojowarjemi su tuž wšelake iniciatiwy organizowali, zo móhli zwóńcu ponowić. Wšako su tež hrjady, třěcha a podtwar wěže dotrjebane.

Projekt ze swójskeje kapsy zwoprawdźić bě za mału wosadu přewulke wužadanje. Njeprošachu tuž jenož wo spěchowanske srědki, ale přewjedźechu koncerty a zarjadowanja, zo bychu pjenjezy zběrali. Nimo spěchowanskich srědkow Budyskeho wokrjesa a spěchowanskeho kruha „Stare cyrkwje“ dyrbi wosada na wšě 50 000 eurow sama přinošować. Hižo při ponowjenju třěchi cyrkwje běchu 45 000 eurow znosyli, Katrin Klein powěda.

1 500 prózdnych piwowych kašćikow je njedaloko Dortmunda na awtodróhu spadało. Šofer nakładneho awta je tak wšitko zhubił, štož měješe na připowě­šaku. Sobudźěłaćerjo nadróžneje słužby trjebachu hodźiny, zawrjenu awtodróhu zaso wurjedźić. Kašćiki běchu w křiwicy na jězdnju spadali, jako chcyše šofer na hinašu awtodróhu zajěć. Policija pruwuje, hač njeběchu wone prawje přiwjazane, abo hač bě Lkw přespěšny.

Swójba kołpjow je wčera rano powołanski wobchad na awtodróze A 5 pola hessenskeho Bensheima nimale dospołnje zlemiła. Staršej ze swojimi pjeć młodźatami běštej so wokoło šesćich na A 5 zabłudźiłoj. Šoferojo zwěrjata na zbožo w prawym času wuhladachu a je ze swo­jimi awtami wobkružichu. Wohnjowi wobornicy natwarichu z rěblow wobhrodźenje a wodźachu kołpje k bliskemu jězorej.