Drježdźany (dpa/SN). Ze zakonjom zmóžnja Sakska prěni króć dlěše zhromadne wuknjenje šulerjow. Wčera popołdnju hłosowaše krajny sejm z wjetšinu za dołhi čas dwělomnu zhromadnu šulu. Koaliciske frakcije CDU, SPD, Zeleni a Lěwicy běchu za nju, AfD hłosowaše přećiwo tomu.

Konflikt, kotryž bě po schwalenju prěnjeho šulskeho zakonja 1991 stajnje zaso wudyrił, so nětko kónči. Přiwšěm njebudźe nowa forma šule tajka, kaž bě sej ju wjace hač 50 000 ludźi z podpismom žadało. Na ćišć CDU zatwarichu zadźěwki, kotrež po měnjenju fachowcow dlěše zhromadne wuknjenje dźěći po cyłym swobodnym staće znjemóžnjeja. Nowa šulska forma budźe jenož móžna, je-li po 5. lětniku štyričarowosć zaručena, potajkim štyri paralelne rjadownje.

Kultusowy minister Christian Piwarz (CDU) dopominaše na razne rozestajenja zhromadneje šule dla. Nětko je woboje móžne: zhromadna šula a dotalny system rozdźělnych šulskich formow. Wšitcy su na tym zajimowani, zo budźe tež nowa forma spomóžna.

Waršawa (dpa/SN). Zwjazkowa zakitowanska ministerka Annegret Kramp-Karrenbauer (CDU) chce tuchwilne předsydstwo Němskeje w Radźe EU za to wužić, mjez čłonami EU jednotnu analyzu wohroženja nastupajo Rusku wutworić. Za to je wona swoje wčera w Pólskej zahajene rozmołwy dźensa w Bołharskej a Madźarskej dale wjedła. NATO a transatlantiske poćahi su měznik wěstotneje architektury w Europje, rjekny ministerka wčera we Waršawje. „Přiwšěm měli europski stołp we wobłuku NATO zesylnić.“

W bołharskej stolicy Sofiji wočako­wa­še Annegret Kramp-Karrenbauer zakitowanski minister Krasimir Karakačanow. Tam traja mjeztym sedmy dźeń za sobu masowe protesty přećiwo knježerstwu.

Po Bołharskej běchu hišće rozmołwy w Madźarskej planowane. Mjeztym zo čuja so w Pólskej a balkanskich krajach wot Ruskeje wohroženi, ma knježerstwo w Budapesće wuske a wotputane styki do Moskwy. Zdobom je Madźarska jedyn z najwjetšich kupcow němskich bróni.

Wjetšina srjedźostawskich předewzaćow skorži přidatneho dźěła a kóštow dla

Berlin (dpa/SN). Srjedźostawske přede­wzaća Němskeje liča z jeno snadnymi lěpšinami nastupajo wot spočatka měsaca nachwilnje zniženy nadhódnotowy dawk. Jenož někotři, kaž wikowarjo črijow abo tekstilijow a twarska branša, lubja sej pozitiwne wuskutki, kaž z woprašowanja srjedźostawskeho zwjazka ZBV wuchadźa: Něhdźe 17 procentow zawodow wočakuje pozitiwny efekt a impuls za konjunkturu. Dwě třećinje woprašanych posudźujetej nachwilne zniženje dawka negatiwnje a skoržitej přidatneho dźěła a kóštow dla.

Hłowny jednaćel ZBV Ludwig Veltmann měni, zo je zniženje dawka derje měnjene, ale špatnje zwoprawdźene. „Srjedźnemu stawej je ekstremnje krótkeho časa dla wjele zarjadniskeho dźěła wurostło. Wšako dyrbjachu wikowarjo płaćizny změnić a kasowe systemy přestajić.“ Dokelž dyrbja klětu spočatk lěta ze skónčenjom zniženja wšitko znowa přestajić, jim samo hrozy, zo so njelěpšiny porno internetnym wikowarjam samo hišće přiwótřa.

Nětko je to oficialne: Zakitowanska ministerka Annegret Kramp-Karrenbauer njeje do Pólskeje, Madźarskeje a Bołharskeje jěła, zo by tam kofej piła, ale zo by kraje k „jednotnej analyzy wohroženja“ pohnuła. Z hinašimi słowami: Budźmy sej přezjedni, zo nas Ruska wohroža! W Pólskej njetrjebaše za to wjele prócy nałožować. Tam takrjec wšědnje nadpad Ruskeje wočakuja. Hinak budźe to w Madźarskej, hdźež dobre styki k Ruskej pěstuja. Wosebje wjele wuspěcha pak přeju ministerce w Bołharskej. Snano ma wona chwile sej na wjeršk Šipka w balkanskich horinach dojěć. Tam steji hoberski monument, ­a z nim so Bołharojo hišće dźensa swojim ruskim bratram dźakuja, kotřiž běchu jich 1878 z wulkej bitwu wot lětstotki ­tra­ja- ­ceho turkowskeho nadknjejstwa wuswobodźili. Snano by „AKK“ tam swój ­před­- sudk, zo je Ruska agresiwna, změniła. Předsudk pak je w Němskej statnje předpisany, štož je jara škoda. Marko Wjeńka