Berlin (dpa/SN). Zastupnicy zwjazkoweho knježerstwa a krajow su dźensa wo móžnych lokalnych zakazach pućowanja k wobmjezowanju koronawirusa wuradźowali. Zwjazk wo tajkich zakazach pječa chutnje rozmysluje, kaž rěčnik knježerstwa Steffen Seibert wobkrući, poćahujo so na wuprajenja zwjazkoweje kanclerki Angele Merkel (CDU). Porno tomu je sakski premier Michael Kretschmer připowědźił, zo njemóže sej „žadyn scenarij“ předstajić, cyły wokrjes zawrěć dać.
Maas: Wjeršk historiska šansa
Berlin (dpa/SN). Do jutřišeho wjerškoweho zetkanja Europskeje unije, na kotrymž chcedźa wo miliardy eurow wopřijacym pomocnym pakeće k nowonatwarej po koronakrizy rozsudźić, je zwjazkowy wonkowny minister Heiko Maas (SPD) wo „historiskej šansy“ rěčał a zdobom před zwrěšćenjom warnował. Zetkanje je tež składnosć pokazać, zo njewostanje w krizy nichtó sam, rjekny Maas nowinarjam. „Žadyn kraj sam z krizy njepřińdźe, hdyž susod w njej tčacy wostanje.“
Datowe dojednanje zběhnjene
Drježdźany (dpa/SN). Ze zakonjom zmóžnja Sakska prěni króć dlěše zhromadne wuknjenje šulerjow. Wčera popołdnju hłosowaše krajny sejm z wjetšinu za dołhi čas dwělomnu zhromadnu šulu. Koaliciske frakcije CDU, SPD, Zeleni a Lěwicy běchu za nju, AfD hłosowaše přećiwo tomu.
Konflikt, kotryž bě po schwalenju prěnjeho šulskeho zakonja 1991 stajnje zaso wudyrił, so nětko kónči. Přiwšěm njebudźe nowa forma šule tajka, kaž bě sej ju wjace hač 50 000 ludźi z podpismom žadało. Na ćišć CDU zatwarichu zadźěwki, kotrež po měnjenju fachowcow dlěše zhromadne wuknjenje dźěći po cyłym swobodnym staće znjemóžnjeja. Nowa šulska forma budźe jenož móžna, je-li po 5. lětniku štyričarowosć zaručena, potajkim štyri paralelne rjadownje.
Kultusowy minister Christian Piwarz (CDU) dopominaše na razne rozestajenja zhromadneje šule dla. Nětko je woboje móžne: zhromadna šula a dotalny system rozdźělnych šulskich formow. Wšitcy su na tym zajimowani, zo budźe tež nowa forma spomóžna.
Waršawa (dpa/SN). Zwjazkowa zakitowanska ministerka Annegret Kramp-Karrenbauer (CDU) chce tuchwilne předsydstwo Němskeje w Radźe EU za to wužić, mjez čłonami EU jednotnu analyzu wohroženja nastupajo Rusku wutworić. Za to je wona swoje wčera w Pólskej zahajene rozmołwy dźensa w Bołharskej a Madźarskej dale wjedła. NATO a transatlantiske poćahi su měznik wěstotneje architektury w Europje, rjekny ministerka wčera we Waršawje. „Přiwšěm měli europski stołp we wobłuku NATO zesylnić.“
W bołharskej stolicy Sofiji wočakowaše Annegret Kramp-Karrenbauer zakitowanski minister Krasimir Karakačanow. Tam traja mjeztym sedmy dźeń za sobu masowe protesty přećiwo knježerstwu.
Po Bołharskej běchu hišće rozmołwy w Madźarskej planowane. Mjeztym zo čuja so w Pólskej a balkanskich krajach wot Ruskeje wohroženi, ma knježerstwo w Budapesće wuske a wotputane styki do Moskwy. Zdobom je Madźarska jedyn z najwjetšich kupcow němskich bróni.
Berlin (dpa/SN). Srjedźostawske předewzaća Němskeje liča z jeno snadnymi lěpšinami nastupajo wot spočatka měsaca nachwilnje zniženy nadhódnotowy dawk. Jenož někotři, kaž wikowarjo črijow abo tekstilijow a twarska branša, lubja sej pozitiwne wuskutki, kaž z woprašowanja srjedźostawskeho zwjazka ZBV wuchadźa: Něhdźe 17 procentow zawodow wočakuje pozitiwny efekt a impuls za konjunkturu. Dwě třećinje woprašanych posudźujetej nachwilne zniženje dawka negatiwnje a skoržitej přidatneho dźěła a kóštow dla.
Hłowny jednaćel ZBV Ludwig Veltmann měni, zo je zniženje dawka derje měnjene, ale špatnje zwoprawdźene. „Srjedźnemu stawej je ekstremnje krótkeho časa dla wjele zarjadniskeho dźěła wurostło. Wšako dyrbjachu wikowarjo płaćizny změnić a kasowe systemy přestajić.“ Dokelž dyrbja klětu spočatk lěta ze skónčenjom zniženja wšitko znowa přestajić, jim samo hrozy, zo so njelěpšiny porno internetnym wikowarjam samo hišće přiwótřa.
94lětna kralowna Elizabeth II. wosobinsce chce jutře 100lětneho britiskeho wójnskeho weterana a zběrarja pjenježnych darow Toma Moora na ryćerja pozběhnyć. To je rěčnik Buckinghampalasta wobkrućił. Moore bě z pomocu namołwy při rolatoru na swojej zahrodźe 36 milionow eurow nazběrał, kotrež je strowotnistwu přewostajił. Za ryćerske pasowanje chce kralowna mječ wužiwać, kotryž słuša jeje nanej kralej Georgej VI.
Wjeršk Eiffeloweje wěže w Parisu je wotnětka zaso přistupny. Wčera su tež posledni poschod swětosławneje wěže wotewrěli. Ličba zastupnych lisćikow pak je wobmjezowana, zo móhli wopytowarjo trěbny wotstawk mjez sobu dodźeržeć. Po tři měsacy trajacej nanuzowanej přestawce koronakrizy dla běchu 324 metrow wysoku wěžu kónc junija zaso wotewrěli, najprjedy raz na dwěmaj etažomaj.
Berlin (dpa/SN). Prezident Němskeho zwjazka městow Burkhard Jung je w prašenju zakaza pućowanja k wobmjezowanju koronawirusa dla skeptiski. Naprawy k haćenju wirusa na městnje wudyrjenja su drje trěbne, hač pak zakaz pućowanja k tomu słuša, hdyž ničo wjace njepomha, wo tym dyrbimy rěčeć, wón měni. Tajke zakazy měli časowje wobmjezowane wostać, sej Jung žada. Fachowcy běchu namjetowali, ludźom w centrach koronawirusa pućowanje zakazać.
Žadaja sej wotstup premiera
Tel Aviv (dpa/SN). Tysacy demonstrantow su sej žadali, zo měł israelski ministerski prezident Benjamin Netanjahu wotstupić, kiž je wobšudnistwa, njeswěry a pokupnosće dla wobskorženy. Protestowacy zhromadźichu so wčera wječor před rezidencu 70lětneho w Jerusalemje. Woni Netanjahuwej tež wumjetowachu, zo je w managemenće koronakrizy dla zaprajił. Ličba z koronawirusom natyknjenych w Israelu spochi přiběra.
Sankcije přećiwo Chinje
Berlin (SN). Prěni raz je so mjeńšinowa rada němskeho zwjazkoweho knježerstwa wčera wirtuelnje zetkała a sej informacije wuměnjała. Přitomni běchu zastupjerjo třoch awtochtonych narodnych mjeńšin w Němskej. Nawjedował je posedźenje předsyda rady Dawid Statnik. Zhromadnje wobrěčachu temy přichodneho zetkanja mjeńšinoweje rady 23. a 24. awgusta, hdyž budu z hosćom danskeje mjeńšiny w Flensburgu. Wažne wobdźělnikam bě, wobhonić so wo tym, kak z koronawirusom w jednotliwych kónčinach a mjeńšinowych organizacijach wobchadźeja. Tuchwilne wobstejnosće dźě žadaja sej wosebite postupowanje wšitkich.
Dale rozprawješe zastupjer danskeje mjeńšiny wčera wo nowozałoženej „mjeńšinowej kompetencnej syći Schleswigsko-Holsteinska/Južna Danska“. Na jeje mjeztym zahajene dźěło a poskitki su zastupjerjo ludowych skupin hižo wćipni.