Na sezonu wróćo zhladować
Za koparjow a zamołwitych prěnjeho koparskeho mustwa ST Marijineje hwězdy bě w minjenej hrajnej dobje změna porno lońšej, wšako měješe Zapadołužiski koparski zwjazk nowe rozdźělenje staflow. Tohodla dyrbjachu Pančičenjo nětko w stafli 1 nastupić. To njebě za chowancow trenarskeje dwójki Franka Schneidera/Kaija Frenzela jenož dospołnje nowy teren, ale zdobom z dlěšimi wonkownymi jězbami zwjazane. Wšako pochadźeja mnozy kontrahenća z Hornjeho kraja. Cil do starta dypkowych hrow rěkaše so mjez najlěpšimi pjeć teamami etablěrować. Štož poradźi so w kónčnym wotličenju samo ze štwórtym městnom.
Dypki: Po 26 hrajnych dnjach měješe Marijina hwězda 15 dobyćow, pjeć remisow, a bohužel pak tež šěsć poražkow na swojim konće, štož wunjese po wrotowym poměrje 72:39 naposledk 50 dypkow. To woznamjenješe samo ličak wjace hač w minjenej sezonje. Ze 26 dypkami do zymskeje přestawki a ze 24 ličakami po zymskej přestawce wuhrachu sej štwórte městno w kónčnym tablowje.
KnappenMan ma so etablěrować
Wot nowembra 2022 steji towarstwo KnappenMan z.t. oficialnje w registrje Hamtskeho sudnistwa Drježdźany. Žanej dwě lěće pozdźišo přewjedźe wone z trójku Jan Frobart, Thomas Leberecht, Harald Skopi a 200 pomocnikami prěnje wulkozarjadowanje z triatlonowymi mišterstwami Němskeje při Třižonjanskim jězoru pola Łaza. Jan Hrjehor je so z Janom Frobartom zetkał.
Triatlonowe wubědźowanje KnappenMan budźe lětsa cyle wosebite, dokelž ...
J. Frobart: ... směmy triatlonowe mišterstwa Němskeje na dołhej distancy přewjesć, a dokelž sčinimy ze sportoweho zarjadowanja wulki ewent.
Tele triatlonowe mišterstwa na dołhej distancy přińdu do Łužicy, dokelž ...
J. Frobart: ... chcemy pokazać, zo móžemy tu we Łužicy němske mišterstwa wuspěšnje přewjesć, zo móžemy z našimi sportowcami a pomocnikami wulkotne zarjadowanje na nohi stajić.
Jako sportowc, triatlet, płuwar, kolesowar abo běhar dyrbjała abo dyrbjał so za jedne z wubědźowanjow KnappenMan, pak za staflowe wurisanja abo tež za wubědźowanja jednotliwcow přizjewić, dokelž ...
Bjez podpěry njeńdźe
– trjebamy Tebje a Was!
Planowanja za posledni kónc tydźenja w awgusće 2024 dale pokročuja! KnappenMan z.t. trjeba za přewjedźenje 36. nakłada spěšneho triatlona we Łužiskej jězorinje něhdźe 200 dobrowólnych pomocnikow, a to na kóždym z dweju wubědźowanskeju dnjow. Bjez pomocnikow, čarowych stražnikow a sobuskutkowacych njehodźi so tajki wulki sportowy event zwoprawdźić. 24. a 25. awgusta, ale tež na dnjach do toho je kóžda pomocliwa ruka trěbna.
Jeli maš wjeselo nad triatlonom, njech jako sportowc abo horliwy wobydler a přihladowar, jako towarstwo abo dobrowólna wohnjowa wobora, chceš k tomu přinošować, zo stanje so triatlonowe wubědźowanje we Łužicy z wulkotnym wuspěchom, potom so prošu přizjew. Přizjewjenski formular steji na webstronje www.knappenman.com. Wupjelnjeny a podpisany formular pósćel na
Wjeselimy so na Tebje!
Jan Hrjehor
Wuspěšne sakske mišterstwa
Wuspěšnje a tež ze serbskim duchom su so njedźelu w Holešowskej Dubrawce po třoch dnjach sakske mišterstwa w dresurowym jěchanju zakónčili. Nowe bě, zo je Konjace sportowe towarstwo Njeswačidło mišterstwa we wšěch starobnych klasach wot dźěći U14 hač k dorosćenym přewjedło.
Při počesćenju nowych mištrow a mišterkow běchu tež sakski ministerski prezident Michael Kretzschmer (CDU) a dwě młodej holcy w serbskej katólskej narodnej drasće na městnje. Nětko hotuja so w Holešowskej Dubrawce na sakske mišterstwa w skakanju.
Nowostki ze Zapadołužiskeho koparskeho zwjazka
Jedyn ze zasłužbnych prezidentow w Zapadołužiskim koparskim zwjazku, Ferdinand Müller, swjećeše swoje 70. narodniny. Wot 1. apryla 2003 nawjeduje Müller sportowe towarstwo ST Postup Großharthau. Wón hraje samo hišće aktiwnje pola starych knjezow towarstwa. Na próstwu swojeho towarstwa su jubilara z Čestnym wopismom a ze Złotej čestnej jehličku Zapadołužiskeho koparskeho zwjazka wuznamjenili. Na namjet prezidija WFV je Ingolf Horn, Ferdinandej Müllerej tež hišće čestnohamtski časnik a wopismo Němskeho koparskeho zwjazka přepodać.
Dobyće w poslednjej sekundźe
Do z napjatosću wočakowaneje třećeje hry relegacije staflowych dobyćerjow wokrjesnych klasow do wokrjesneje ligi zapołožichu mustwa a přihladowarjo mjeńšinu ćišiny a spominachu na sportoweho přećela, čłona předsydstwa a předsydu wuběrka sudnikow Andreasa Lieskeho, kotryž bě njenadźicy w starobje 65 lět zemrěł.
Niclas Füllkrug přiwisnikow Němskeje wubranki wumóžił
Třeći a posledni skupinski hrajny dźeń europskeho koparskeho mišterstwa bu wčera wječor zahajeny.
Prěnja poražka na domjacej EM bu w poslednjej mjeńšinje wotwobarana. Němske narodne mustwo je přećiwo Šwicarskej 1:1 wuchowało. Zaćah do wosmifinala běše hižo do partije wěsty, dźěše pak hišće wo prěnje a druhe městno.
Němska wubranka nastupi třeći raz ze samsnej zestawu, to dožiwichmy naposledk při WM 2002 pod dźensnišim sportowym direktorom DFB Rudijom Völlerom. Znowa pódla bě Manuel Neuer. Z mjeztym cyłkownje 18 zasadźenjemi na europskich mišterstwach je Mnichowski wrotar nowy rekordny wrotar EM. Do toho bě to Italčan Gianluigi Buffon.
Wšitke Poříčí w Spáleným Poříčí
Sokołki a Sokoljo na sportowej wuměnje pobyli
Kóžde dźesać lět je čěske město Spálené Poříčí w Plzenskim kraju na rjedźe, zo by sportowy a kulturny swjedźeń zhromadnje ze wšěmi dźewjeć čěskimi komunami – su to wjeski, wsy a města – wuhotowało, kiž maja w swojim mjenje Poříčí. W samsnym času je 50 hosći z Delan minjeny kónc tydźenja tam pobyło. 59. raz zetkachu so Sokołki a Sokoljo Ralbicy/Hórki ze sportowčemi a sportowcami TJ Sokol Spálené Poříčí. A tež komunalni zastupjerjo Plzenskeho kraja tam běchu, zo bychu nazhonjenja wuměnjeli a wo nowinkach pobjesadowali. Gmejnu Ralbicy-Róžant zastupowaše lětsa znowa wjesnjanosta Hubert Ryćer.
Rekordna ličba
Widźał, słyšał, napisał (24.06.24)
Awtor dźensa
Pětr Šołta
„Po wěstych prawidłach, tež we wubědźowanjach, z wjesela na pohibje a hraću abo k ćělnemu wukmanjenju wukonjane ćělne skutkowanje“, tajka je definicija za sportowanje. Intensitu, prawidłownosć a wosobinske cile wšak při tym kóždy sam za sebje postaja. Někotři so wjesela, su-li wšědnje znajmjeńša 5 000 krokow běželi, druzy su hakle potom zbožowni, hdyž po treningu ani wjac prawje stać njemóža. Wjesela na pohibje dla, a dokelž je to wězo tež raz zajimawe wužadanje, sym so lětsa na Slawiamaršu wobdźělił. To bě skerje krótkodobny rozsud. Spočatk meje smy ze swójbu Łužisku 50, čěsce Lužická 50, sobu nóžkowali. Zarjadowanje wotměje so hižo přez poł lětstotka w Hrádeku nad Nisou a móžeš tam po markěrowanych šćežkach 8, 15, 25, 35 abo 50 kilometrow po Łužiskich a Žitawskich horach pućować. Smy so za 25 km čaru přizjewili a tutu tež wšitcy derje zmištrowali. Wjedro a přiroda podłu šćežkam běštej krasnej, tak zo bě spěšnje jasne, zo budźemy tam klětu tež zaso pódla.
Přichodne městno we wosmifinalu wěste
Wčerawši hrajny dźeń europskich koparskich mišterstwow započa so z partiju Słowjenska přećiwo Serbiskej. Něhdyši Frankfurtčan Luka Jović trjechi ke kónčnemu stawej 1:1, jako lědma hišće něchtó z 63 000 přihladowarjow do wurunanja wěrješe. Serbiska bě po słowjenskim nawjedowanju přez Žana Karničnika (69.) drje komando přewzała a měješe wjac wobsydstwa bula, na tamnym boku pak bu w swojich nadběhach tež přeco njedokładniša. Jenož zaměnjeny Jović nadźiju njespušći. A tak šrubowaše so 26lětny wot AC Mailand w šestej mjeńšinje přidatneho hrajneho časa do wyšiny a zhłójčkowa k wurunanju. Słowjenska kaž tež Serbiska matej dale šansu na wosmifinale. Po dwěmaj z třoch hrow je Słowjenska z dwěmaj dypkomaj na druhim městnje skupiny C. Serbiska je z jednym dypkom poslednja. Zo bychu k.o.-koło docpěli, dyrbja Serbičenjo wutoru Dansku přewinyć. Słowjenska hraje k zakónčenju skupinskeje fazy tohorunja wutoru přećiwo top-faworitej Jendźelskej. Titulny faworit Jendźelska je dočasnu kwalifikaciju za wosmifinale zapasł.
Sport (21.06.24)
Satkulabičtura 2024
Team Radija Satkule serbskeho młodźinskeho sćelaka MDR swoju bičwolejbulowu turu lětsa znowa přewjedźe. Mustwa zetkaja so stajnje w 17.30 hodź., hrać budu potom wot 18 hodź.
08.07. Ralbicy
15.07. Jaseńca
22.07. Róžant
29.07. Kulow
05.08. Njebjelčicy
12.08. Chrósćicy
19.08. Konjecy
26.08. Miłoćicy
Sakske mišterstwo w dresurje
Jěchanske a jězdne towarstwo Njeswačidło wuhotuje lětsa turněraj w konjacym sporće na jěchanskej ležownosći w Holešowskej Dubrawce. Tónraz we wjetšim wobłuku jako sakske mišterstwo w dresurje a skakanju we wšěch starobnych klasach, a to na poslednimaj kóncomaj tydźenja smažnika. Jěcharjo a konje budu so w pruwowanjach hač do ćežkeje klasy S** wubědźować.
Wot dźensnišeho pjatka hač do njedźele přewjedźe so dresurowy turněr. Jutře wječor přeprošuja organizatorojo na party Ü30 to jěchanskeje hale a sobotu a njedźelu poskićeja nimo jěchanskeho sporta tež zabawy za swójby.
