Posledni staroměšćanski milion
Zhorjelc (dpa/ch/SN). Bajka wo staroměšćanskim milionje je nimo. Kaž Zhorjelski wyši měšćanosta Siegfried Deinege (njestronjan) wčera zdźěli, bě rano posledni króć suma we wobjimje 340 000 eurow dóšła. „Smy dźakowni, zo móžachmy z pomocu dara cyłkownje dźesać milionow eurow něhdźe 1 500 projektow w měsće podpěrać“, wón zwurazni. Staroměšćanski milion bě město Zhorjelc prěni króć w lěće 1995 dóstało, tehdy hišće w hriwnach. Wot toho časa bě njeznaty darićel stajnje nalěto 511 500 eurow přepokazał. W telefonaće z wyšim měšćanostu zastupjer darićela nětko připowědźi, zo je suma posledni dźěl staroměšćanskeho miliona. Čehodla so darjenska akcija kónči, njeje znate.
Přebywanišćo za ćěkancow
