Łužica (12.08.15)

srjeda, 12. awgusta 2015 spisane wot:

Bórze zaso piwo z Choćebuza

Choćebuz (SN). W delnjołužiskej metropoli změja snano bórze zaso swoje piwo. Tónle plan chce zwoprawdźić z Porynskeje pochadźacy 44lětny Olaf Wirths. Hižo dwě lěće bydli wón w Choćebuzu a pyta nětko wotpowědne twarjenje, zo móhł swoje plany zwoprawdźić. Wirths chce nimo mikropiwarnje a piwoweje bary tež tak mjenowany craftbeer a online předań na nohi stajić. „Choćebuz jako město piwa z tradiciju ma so na korjenje jeho warjenja dopomnić. Swójska piwowa marka ma nastać a so wuspěšnje a dołhodobnje w regionje zaměstnić“, zjima přichodny piwarc swoje wotmysły.

Šok za łužiske komuny

Łužica (11.08.15)

wutora, 11. awgusta 2015 spisane wot:

Nowy labor za studentow

Budyšin (dpa/SN). Hišće lětsa ma nastać moderne twarjenje za labor Budyskeje powołanskeje akademije. To zdźěli direktorka kubłanišća prof. Barbara Wuttke. Twarić chcedźa jón na płoninje něhdyšeje mensy. Z nowotwarom maja so wuměnjenja za slědźenje studentow polěpšić, wosebje we wobłuku kumštnych maćiznow, lijernje a elektrotechniki. Po předležacych planach ma labor w oktobrje 2017 za wužiwanje hotowy być. Tuchwilnje přewjeduja slědźenske dźěła we wuskich rumnosćach w pincy powołanskeje akademije.

„Módry dźiw“ ponowja

Habrachćicy-Neugersdorf (dpa/SN). Tak mjenowany „módry dźiw“, móst w Habrachćicach-Neugersdorf budźe ponowjeny. Škody a njedostatki hakle w lěće 1996 twarjeneho mosta maja so wotstronić. Swobodny stat Sakska přewostaji za to 540 000 eurow. Za sporjedźenje trěbnych budźe 760 000 eurow. Železnu konstrukciju mosta móža nětko zasadnje wobnowić. Twarske dźěła na „módrym dźiwje“, kotryž přeprěča železniski zwisk do Žitawy a Sprjewju, klětu zahaja. Jězdnju a chódnik runje tak ponowja kaž njerunosće před a za mostom.

Nowy wobsedźer rězaka

Łužica (10.08.15)

póndźela, 10. awgusta 2015 spisane wot:

Změny na přemysłowej płoninje

Kodersdorf (dpa/SN). Dźěła za natwar noweje twornje zhotowjerja zwjenow BORBET w Kodersdorfje dale postupuja. Kaž předewzaće zdźěli, je prěni twarski wotrězk ze zrunanjom twarskeje pře­strjenje zakónčeny. Tuchwilu stajeja tam stołpy za halowu konstrukciju. Kónc oktobra ma druhi twarski wotrězk z natwarom produkciskich halow tohorunja wotzamknjeny być. Twarske dźěła zakónčić chcedźa kónc lěta. Přichodnje matej w tworni lětnje něhdźe dwaj milionaj aluminijowych zwjenow nastać. Dźěłać budźe pola BORBET w Kodersdorfje 300 do 400 ludźi.

Słónčna energija pomha

Łužica (07.08.15)

pjatk, 07. awgusta 2015 spisane wot:

Přećiwo wulkogmejnam

Gubin (dpa/SN). Prezident Braniborskeho zwjazka městow a gmejnow, Podstupimski wyši měšćanosta Jann Jakobs (SPD), je před tym warnował, minimalnu ličbu wobydlerjow w gmejnach přichodnje na 10 000 postajić. Tak bychu we wjesnych kónčinach wulkogmejny z płoninu hač do 600 kwadratnych kilometrow nastali. To njeje zastupujomne, rjekny wón nowinarjam. „Trjebamy diferencowane postupowanje. Wokolina Berlina a dale zdalene kónčiny měli so rozdźělnje wobhladować“, sej Jakobs žada. Braniborske krajne knježerstwo hladajo na woteběrace wobydlerstwo wo tym rozmysluje, we wobłuku reformy ličbu wokrjesow wot dotal 14 na jenož hišće dźesać pomjeńšić. Zamołwići lubja sej zalutowanja na zarjadniskim polu.

Twarja stanowe sydlišćo

Łužica (06.08.15)

štwórtk, 06. awgusta 2015 spisane wot:

Jědź wina njebyła

Lubin (dpa/SN). Jědź w prózdninskim lěhwje w Błótach njeje wina na schorjenju dźesatkow dźěći a dohladowarjow. Zwisk mjez zastaranjom a schorjenjemi je wuzamknjeny, kaž krajnoradny zarjad wo­krjesa Dubja-Błóta zdźěla. Labor bě jědź na wiry a bakterije přepytował, zo by přičiny schorjenjow zwěsćił, při tym pak ničo njenamaka. Minjeny pjatk bě 38 dźěći a šěsć pomocnikow w prózdninskim lěhwje w Prierosu skoržiło, zo je jim špatnje. Někotři dyrbjachu bluwać abo mějachu židlawu. Přiwołany lěkar jich zastara. Do chorownje­ nichtó njetrjebaše. Strowotniski zarjad nětko wobkedźbuje, hač maja potrjecheni tež po prózdninskim lěhwje hišće strowotniske problemy.

Přemało kislika w hatach

Łužica (05.08.15)

srjeda, 05. awgusta 2015 spisane wot:

Bóle na turistow so nastajić

Zły Komorow (dpa/SN/ch). Historiske zahrodowe město Marga w južnej Braniborskej chce so bóle na turistow wusměrić. W přichodnych lětach maja so w sydlišću za turistow pućniki nastajić, informuje Christina Nicklisch (Swobodni wolerjo), wjesna předstejićerka Złokomo- rowskeho wjesneho dźěla Brjazk. „Myslimy tež na handyjowu app.“ Marga słuša k najstaršim zahrodowym městam Němskeje. Natwarili běchu je w lětach 1907 do 1915 jako zawodowe sydlišćo akcij­neje towaršnosće Ilsyne hórnistwo. Blisko briketownje nasta 78 domow. Mjeno Marga poćahuje so na dźowku tehdy­šeho generalneho direktora předewzaća. W sydlišću poskićeja hižo trajnu wu­stajeńcu a wodźenja. Na awtodróze A 13 skedźbnjeja wot spočatka lěta pokiwne tafle na zahrodowe město Marga.

Łužiski camp přećiwo wuhlu

Łužica (04.08.15)

wutora, 04. awgusta 2015 spisane wot:

Dóstanu spěchowanske pjenjezy

Choćebuz (dpa/SN/ch). Centrum za čłowjeske prawa w Choćebuzu dóstanje něhdźe 312 000 eurow spěchowanja wot Zwjazka a Kraja Braniborskeje hač do lěta 2016. Pjenjezy słuža wobdźěłanju sta­wiznow w bywšim Choćebuskim jastwje. Při přepodaću spěchowanskeje zdźělenki kulturny statny sekretar Martin Gorholt wčera zwurazni, zo je bywše jastwo NDR symbol potłóčowanja a politiskeho přesćěhanja za čas nacionalsocializma kaž tež sowjetskeje wobsadniskeje mocy a diktatury strony SED. Lěta 2007 załožene nošerske towarstwo Centruma za čłowjeske prawa Choćebuz je 2012 wopo­minanske a zetkawanske městno wote­wrěło a lěto pozdźišo trajnu wustajeńcu.

Podhlad zapalerstwa

Łužica (03.08.15)

póndźela, 03. awgusta 2015 spisane wot:

Pjenjezy za dźěło we wopomnišću

Choćebuz (dpa/SN/ch). Za dźěło we wopomnišću w bywšim jastwje NDR ma Choćebuski centrum za čłowjeske prawa lětsa a klětu cyłkownje 183 000 eurow dóstać. Braniborski kulturny statny sekretar Martin Gorholt je centrumej dźensa popołdnju wotpowědnu spěchowansku zdźělenku za dźěło we wopomnišću přepodał. Choćebuske bywše jastwo słušeše k najwjetšim chłostarnjam za politiskich jatych w NDR. Mjeztym so wone­ za kubłanske poskitki a zarja­dowanja wužiwa.

Ličba wudźerjow přiběra

Łužica (31.07.15)

pjatk, 31. julija 2015 spisane wot:

Wopušći Choćebuske sudnistwo

Choćebuz/Podstupim (dpa/SN). Dotalny prezident Choćebuskeho krajneho sudnistwa Klaus-Christoph Clavée stanje so z prezidentom Braniborskeho wyšeho krajneho sudnistwa. Statny sekretar Roland­ Pienkny přepoda jemu dźensa w Podstupimje wotpowědne powołanske wopismo. 56lětny jurist naslěduje Wolfganga Kahla, kiž woteńdźe na wuměnk. Wyše krajne sudnistwo ze sydłom w Brandenburgu nad Habolu je najwyše sudnistwo na krajnej runinje za ciwilne, swójbne a chłostanske jednanja. Štó budźe nowy prezident Choćebuskeho krajneho sudnistwa, njeje dotal znate.

Listonošej so zetkałoj

Łužica (30.07.15)

štwórtk, 30. julija 2015 spisane wot:

Wuwozny móst přestanje dźěłać

Choćebuz (dpa/SN/ch). Kónc wudobywanja brunicy we wuhlowej jamje Choćebuz-sewjer so bliži. Kaž energijowy koncern Vattenfall wčera w Choćebuzu zdźěli, wuwozny móst F 34 bórze dźěłać přestanje. Kónc wudobywanja na stejnišću hižo dlěši čas přihotuja. Z jamy ma pozdźišo hoberski jězor nastać. Po wozjewjenju energijoweho předewzaća je wuwozny móst, kotryž bě 32 lět w jamje zasadźeny, posledni swojeho razu. Nimo jamy Choćebuz-sewjer wobhospodarja šwedski statny koncern w Braniborskej a Sakskej štyri dalše brunicowe jamy. Vattenfall pyta tuchwilu kupca za swoju brunicowu spartu we Łužicy. Něhdźe 8 000 ludźi ma w tym wobłuku dźěło.

Łódźowe modele so wubědźuja

Serbska debata

nowostki LND