Wulki wuspěch přećiwo crystalej
Praha měła sobu dźěłać
Sankcije přećiwo Pólskej?
Waršawske knježerstwo wobara so přiběracej kritice z wukraja
Berlin/Waršawa (dpa/K/SN). Nětčiše pólske knježerstwo pod nawodom radikalno-konserwatiwneje strony Prawo a sprawnosć (PiS) twjerdošijneho Jarosława Kaczyńskeho drje swěru jědźe kurs tak mjenowaneho „znarodnjenja kraja“, přiwšěm jemu wětřik chětro mjezwoči duje – wotnutřka a hišće bóle wotwonka.
We wjace hač 20 pólskich městach su sobotu dźesaćitysacy znjeměrnjenych ludźi na dróhu šli, demonstrujo wosebje přećiwo pjatk wobzamknjenemu nowemu medijowemu zakonjej, z kotrymž widźa demokratiju wohroženu. Z hesłami kaž „Ruce preč wot radija“ abo „Knježerstwo łži“ wustupowachu woni naležnje za jeho cofnjenje. K demonstracijam bě namołwił Komitej k zakitowanju demokratije, kotrehož załožićel Mateusz Kijowski we Łódźi, dźiwajo na hižo přewjedźene změny na čole zjawnoprawneje telewizije a rozhłosa, rjekny: „Změny w zjawnych medijach su hižo nětkole widźeć.“
Dobra bilanca
Słowakska njerodźi wo muslimow
Nětko postaja knježerstwo
Nowy pólski medijowy zakoń schwaleny – prěnje personalne změny
Waršawa. Z wotmachom nowe pólske knježerstwo planowane zakonske a personalne změny w kraju zwoprawdźa. Tak su hišće silwester w sejmje a senaće – druhej komorje parlamenta – nowy medijowy zakoń wobzamknyli, kotryž ma daloko sahace wuskutki na wšón medialny system w kraju.
Sobu najwažniša změna potrjechi dotal njewotwisny Komitej rozhłosa a telewizije. Gremij bě w personalnych a financnych prašenjach rozsudźał, bjez toho zo móhło knježerstwo wliw wukonjeć. Tónle komitej je z nowym zakonjom faktisce rozpušćeny. Wot 1. januara dohladuje medije jenička wosobina: wot knježerstwa pósłany minister Dawid Jackiewicz. Wón nětko postaja, štó smě w nowej Radźe narodnych medijow dźěłać. To wšak rěka, zo přichodnje šef narodnokonserwatiwneje strony Prawo a sprawnosć Jarosław Kaczyński a prezident Andrzej Duda w personalnych a financnych naležnosćach medijow postajataj.
Planuja jednanje přećiwo Pólskej
Amsterdam/Waršawa (dpa/SN). Dwělomnych reformow w Pólskej dla chcyła komisija Europskeje unije jednanje zahajić, zo móhła móžne strachi za prawniski stat přepytować. „Zahajimy proceduru, kotruž smy hižo lěta 2014 wuwili“, rjekny prezident komisije EU Jean-Claude Juncker dźensa w Amsterdamje. Naprawy přećiwo nowemu narodnokonserwatiwnemu knježerstwu we Waršawje njejsu po měnjenju wobkedźbowarjow překwapjace. Wšelake instancy EU běchu hižo minjeny kónc tydźenja připowědźili, zo chcyli pruwowanske jednanje wo prawostatnosći w Pólskej zahajić.
Taflički-spodźiwački
NAWAL hnydom prěni dźeń po tym zo směš sej za swoje awto registracisku tafličku po přeću zhotowić dać, bě na přisłušne zarjady po cyłej Čěskej hišće wjetši hač wočakowane. W Teplicach na přikład je hodźinu do wotewrjenja hižo dlěši rynk zajimcow zymu mrějo před durjemi registrowarnje stał. Dźesać mjeńšin po zastupjenju su prěni pjećo swoje nowe znamjo zregistrowane měli. Na jich wozydłach budźe na tafličkomaj prědku a zady mjez druhim stać MARTIN01 resp. TOMAS007. Po nowinje Mladá fronta dnes je sej w Ústíju nad Labem něchtó samo kuzłarske čisło 1IIIIIII registrować dał. Dowolene je tohorunja mjeno firmy (za reklamu), taflička pak dyrbi wosom znamjenjow měć, mjez nimi znajmjeńša jednu cyfru. Za motorske je maksimalnje sydom znamjenjow trěbnych, za mopedy pjeć. Za kóždu wosebitu registracisku tafličku dyrbi měnjer 5 000 krónow (něhdźe 185 eurow) nałožić, a dokelž stej za awto dwě trěbnej, tuž 10 000 krónow (370 eurow) woprować. W Ústíju młody muž registrowarjam wupowěda, zo je pjenjezy za to wot swojeho dźěda jako hodowny dar dóstał.
Wšo najlěpše tež mjeńšinam
Wotchila so Pólska?
Po tym zo bě nacionalno-konserwatiwna strona Prawo a Sprawnosć (PiS) Jarosława Kaczyńskeho njedawno absolutnu wjetšinu w sejmje zdobyła, přewza wona knježerstwo Pólskeje.
Waršawa (dpa/K/SN). Spočatk je činiła dwělomna reforma wustawoweho sudnistwa z přitřihanjom kompetencow; kónc tydźenja slědowaše kontrowersny medijowy zakoń, zmóžnjacy knježerstwu, w zjawnoprawniskej telewiziji a rozhłosu wobsadźić nawodne městna ze swojimi ludźimi, rozprawja powěsćernja dpa.
