Praha (dpa/SN). Po najnowšim poručenju europskeho zarjada za dohladowanje lěkow EMA je Čěska započała, šćěpiwo přećiwo koronawirusej firmy Johnson&Johnson wužiwać. Něhdźe 14 400 dozow nětko poněčim lěkarskim praksam přewostajeja, kaž strowotniske ministerstwo w Praze zdźěli. Podhlada ćežkich wuskutkow kaž trombozow dla njeběchu serum firmy z USA najprjedy raz zasadźili. EMA pak hódnoći, zo je wužitk seruma wjetši hač móžne rizika.
Mjeńšinowe knježerstwo w Praze běchu snadneje spěšnosće šćěpjenskeje kampanje zas a zaso kritizowali. Mjeztym su po oficialnych informacijach wjace hač 2,5 milionow dozow šćěpili. Čłonski stat EU ma 10,7 milionow wobydlerjow. Hinak hač w Němskej wužiwaja w Čěskej rědkich pódlanskich wuskutkow dla kritizowany serum Astrazeneca we wšěch starobnych skupinach.
Połoženje koronapandemije dla so w Čěskej dale polěpša. Strowotniski minister Petr Arenberger z tym liči, zo móža spočatk meje wšitke wobchody zaso wotewrěć. Incidenca wučinja tam mjeztym 185, w Němskej 160.
Praha. Do njejasnych wobstejnosćow nastupajo rozbuchnjenje municiskeho składu lěta 2014 w čěskich Vrběticach běchu po najnowšich dopóznaćach wěstotnych mocow přisłušnicy ruskeje wojerskeje tajneje słužby GRU zaplećeni. Wo tym informowaše čěski ministerski prezident Andrej Babiš minjenu sobotu na nimorjadnej nowinarskej konferency. Tak wotkrychu wěstotni zastojnicy 18 sobudźěłaćerjow ruskeho wulkopósłanstwa jako tajnych agentow, kotřiž buchu wupokazani a dyrbjachu Čěsku nětko póndźelu wopušćić.
Čěski prezident Miloš Zeman je informowany, chce pak so hakle za něšto dnjow k aktualnym wuslědkam přepytowanja wuprajić.
16. winowca 2014 rozbuchny municiske składźišćo we Vrběticach, při čimž staj dwaj dźěłaćerjej žiwjenje přisadźiłoj. 3. hodownika 2014 eksplodowaše tam hišće dalši skład municije.
Praha (ČŽ/K/SN). Dobrych 60 procentow čěskich přemysłowych firmow ma potrjebu kwalifikowanych dźěłowych mocow. To je z wosebitym zwěsćowanjom nazhoniła agentura Hofmann Personal, kotraž je so mjez wjace hač 200 předewzaćemi najwšelakorišich branšow wobhonjała. Dokelž pak su domjace dźěłowe wiki w tym nastupanju tak derje kaž wučerpane, chcedźa so wo fachowcow hišće naležnišo hač dotal we wukraju prócować. „Po našich trochowanjach pobrachuje w produkciji a w twarstwje znajmjeńša 300 000 dźěłowych mocow“, zwuraznja direktorka agentury Hofmann Personal Gabriela Hrbáčková.
Waršawa. Z wulkim wotmachom ludźi w Pólskej přećiwo koronawirusej šćěpja. Mjeztym je šěsć milionow wobydlerjow prěnju sykawu dóstało, dalšej dwaj milionaj tež hižo druhu. Hižo šćěpja tam ludźi w starobje 57 lět. Najebać to je ličba infekcijow přeco hišće wulka. W chorownjach lěkuja nimale 34 000 pacientow, wjace hač 3 400 z nich dyrbja z kislikom kumštnje zastarać. Knježerstwo je tuž wobstejacy lockdown hač do 25. apryla podlěšiło. Hosćency a hotele wostanu hač do 3. meje zawrjene. Za to smědźa so dźěći wot přichodneje póndźele do žłobikow a pěstowarnjow nawróćić. Tež sport pod hołym njebjom je zaso móžny.
Praha (ČŽ/K/SN). 30 lět je tomu, zo bě so awtotwornja Škoda Auto Mladá Boleslav pod třěchu němskeho koncerna Volkswagen podała. A tale kročel, přećiwo wjele wobmyslenjam a wulkim zadźěwkam přez tehdyšeho ministerskeho prezidenta Vacláva Klausa zwoprawdźena, je wšak so jako dospołnje prawa a pře wšu měru wuspěšna wopokazała. Tak je produkciska kapacita předewzaća dźensniši dźeń wo šěsć króć wjetša hač lěta 1990. Hdyž bě tehdy wob lěto něhdźe 177 000 nowych wosobowych wozydłow twornju wopušćiło, nadźěła Auto Škoda wot lěta 2014 prawidłownje dobry milion jězdźidłow najwšelakorišeho razu.
Praha/Mnichow (dpa/SN). W pomjeznych kónčinach knježi wolóženje. Koronakrizy dla zarjadowane stacionarne kontrole na mjezy k Čěskej su nimo. Naprawy su wčera wuběželi a njebudu hižo podlěšene, rěčnik zwjazkoweho nutřkowneho ministerstwa w Berlinje zdźěli. K wopodstatnjenju rěkaše, zo su ličby infekcijow w Čěskej minjeny čas widźomnje woteběrali. Zwjazkowy nutřkowny minister Horst Seehofer (CSU) bě wospjet rjekł, zo ma namjezne kontrole wosrjedź Europy jeno za posledni srědk w boju přećiwo pandemiji.
Čěski wulkopósłanc w Němskej Tomáš Kafka kónc stacionarnych namjeznych kontrolow wuraznje wita. Jemu je to wažna kročel po puću k dołho wočakowanemu nawrótej k normaliće w čěsko-němskich poćahach, kaž Kafka powěsćerni ČTK w Praze rjekny.
Praha. W nalětniku minjeneho lěta, na spočatku cyłoswětoweje koronapandemije, wukaza čěske knježerstwo praktisce přez nóc za wšitkich wobydlerjow kraja winowatosć, w zjawnosći nahubniki wužiwać. Bjezposrědnje po wozjewjenju tajkeho dotal njepředstajomneho postajenja njebě mnohim Čecham scyła móžno, wobstarać sej předpisany srědk w lěkarnjach abo dalšich předawanišćach strowotniskich tworow. Ludźo dyrbjachu tuž sami aktiwni być a sej swójski škit za hubu a nós zhotowić. Tak sta so šijawa z najdrohotnišim domjacnostnym nastrojom, bydlenja přeměnichu so na twornje nahubnikow. Garderobjerki w zawrjenych dźiwadłach a kinach, nadobo bjezdźěłni wuměłcy, rjadniske sotry, samo bywša prěnja dama Čěskeje republiki Dagmar Havlová, wšitcy šijachu za sebje a swojich sobučłowjekow tónle nětko za kóždeho wšědny kruch drasty.
Praha (dpa/SN). Čěski wonkowny minister Tomáš Petříček je ze zastojnstwa pušćeny, kaž rěčnik prezidenta Miloša Zemana w Praze zdźěli. Hač k powołanju naslědnika ma socialdemokratiski kolega Petříčeka, nutřkowny minister Jan Hamáček, ministerstwo nawjedować. „Wopušću zastojnstwo z čistym swědomjom. Sym so stajnje za proeuropske a prozapadne wusměrjenje Čěskeje republiki zasadźał“, rjekny 39lětny Petříček.
Poł lěta do wólbow parlamenta w Čěskej so tak zwada w nawodnistwje strony socialdemokratow (ČSSD) přiwótřa, kotřiž su dźěl mjeńšinoweho knježerstwa. Petříček bě so wospjet kritisce nastupajo wobdźělenje na knježerstwje populista Andreja Babiša wuprajił. Při wólbach noweho předsydy ČSSD minjeny kónc tydźenja njemóžeše so wón ze swojim kursom jako přećiwny kandidat přećiwo Hamáčekej přesadźić.
K wjelelětnym kritikarjam Petříčeka słušeše tež prezident Miloš Zeman. 76lětny bě so hinak hač Petříček za to wuprajił, zasadźić ruske šćěpiwo Sputnik V a wobdźělić ruske firmy na twarje jadroweje milinarnje Dukovany.