To a tamne (01.03.19)

pjatk, 01. měrca 2019 spisane wot:

Přećiwo žlokanju w zjawnosći chcedźa zamołwići na dowolowej kupje Mallorca wotnětka raznišo postupować. Dowol­nicy smědźa jenož hišće w hosćencach a nic kaž dotal tež na chódniku před nimi­ jěsć a pić. Za to su mjez turistami woblubowanu partyjowu milu „Ballermann“ a dróhi wokoło njeje na „pasmo wosebiteho turistiskeho zajima“ deklarowali. Štóž nowe postajenje rani, tomu hrozy pokuta hač do 3 000 eurow.

Dwaj metraj dołheho hada je muž w mecklenburgsko-předpomorskim Friedlandźe wčera wječor při hromadźe komposta našoł. Boa so hižo njehibaše. Přiwołany skótny lěkar zwěsći, zo je zwěrjo mortwe. Zwotkal had pochadźa a hač słuša k jědojtym družinam, ma nětko weterinarny zarjad přepytować.

To a tamne (28.02.19)

štwórtk, 28. februara 2019 spisane wot:

Gumijowe škórnje w haće su we vogtlandskim wokrjesu zasadźenje policije zawinowali. 40lětny bě škórnje w haće pola Plauena wuhladał a na mortweho tukał. Wohnjowi wobornicy a policisća pak zwěsćichu, zo běchu so škórnje scomt wudźerskimi cholowami w błóće potepili a so při korjenju zapopadnyli. Komu wone słušeja, to nichtó njewě.

Nadźijejo so wažneje archeologiskeje drohoćinki je šěsćlětny hólc namakany hlinjany črjop Romsko-germaniskemu muzejej w Kölnje pósłał. W lisće jemu nawod­nistwo muzeja wobkrući, zo njejedna so wo črjop z časa Romjanow, ale wo dźěl něhdźe sto lět stareho hornče­rjeneho wodowoda. Hólc měł sej namakanku přiwšěm wobchować. Powěsćerni dpa muzej wobkrući, zo dóstawa staj­nje zaso tajke posyłki dźěći, na čož pak zasadnje wotmołwja.

To a tamne (27.02.19)

srjeda, 27. februara 2019 spisane wot:

Wosrjedź awtodróhi A 3 porodźiła je žona swoje dźěćko njedaloko bayerskeho Regensburga. Mandźelskaj běštaj po puću do porodoweje chorownje, jako so hro­na započachu. Muž při awtodróhowym twarnišću zasta a zawoła nuzoweho lěkarja. Jako tón dojědźe, bě so hólčk z mjenom Karl hižo narodźił. Policisća běchu jemu na swět pomhali. Dalše daty wo młodej swójbje woni njetrjebachu, z wida policije dźě njebě pad relewantny.

Golf hrajacy prezident Donald Trump budźe jedna z atrakcijow lětušeho karnewala róžowu póndźelu w Kölnje. To su wčera hižo raz připowědźili, předstajejo někotre wozy wulkeho póstniskeho ćaha. Tež zwjazkowa kanclerka Angela Merkel (CDU) a francoski prezident Emmanuel Macron budźetaj sej kritiku lubić dać dyrbjeć. Woprawdźe łoskoćiwe temowe wozy wšak hakle póndźelu wuhladamy.

To a tamne (26.02.19)

wutora, 26. februara 2019 spisane wot:

Chětro přesłapjena zhladuje dotalna „miss Germany“, 24lětna Anahita Rehbein ze Stuttgarta, na swoje lěto jako najrjeń­ša rjanolinka Němskeje. „Nichtó će njespěchuje, jako model scyła nic“, rjekny wona nowinarjam. Město přilubjenych terminow za fotoshooting steješe wona zwjetša jako hostess na kwasnych wikach. Swojej njedźelu wuzwo­lenej naslědnicy Nadine Berneis wona radźi, so w „zwjeršnym swěće jako miss Germany wšemu njepodwolić“.

Wulku myš z gullyja wuswobodźili su w hessenskim Bernheimje. Přetołste zwěrjo bě so pod gullyjom zatłusnyło. Wohnjowi wobornicy jón wuzběhnychu a pušćichu myš na swobodu. Kritiku, zo su škódnikej pomhali, woni wotpokazuja: „Tež wulka myš sej respekt zasłuža.“

To a tamne (25.02.19)

póndźela, 25. februara 2019 spisane wot:

Nowa „Miss Germany“ je policajska zastojnica Nadine Berneis ze Stuttgarta. 28lětna móžeše so při wólbach w nocy na njedźelu w Europskim parku Rust pola­ Freiburga přećiwo 15 dalšim wob­dźělnicam přesadźić a je sej tak sama són spjelniła, kaž wona rjekny. Berneis bě najstarša wobdźělnica, najmłódša bě 19 lět. Třeće městno wobsadźi 22lětna studentka Anastasia Aksak z Lipska.

Wopita šoferka je ze swojim awtom w sewjerorynsko-westfalskim Sundernje do wabjenskeje tafle za jězdźenje bjez alko­hola zrazyła. Awto wosta mjez murju a taflu tčacy, tak zo dyrbješe žona do­moj nóžkować. Tam wona policistam wobkrući, zo bě njezbožo zawinowała. Na plakaće wabjenskeje kampanje wob­chadneje straže wabještej bleša wody a klučik awta z hesłom „Přećeljo za žiwjenje“ za strózbe jězdźenje. Policija wuka­za pře­pytowanje kreje 21lětneje a sćaza jeje jězbnu dowolnosć.

To a tamne (22.02.19)

pjatk, 22. februara 2019 spisane wot:

Paducha we łožu wobchoda spicy našła je policija zawčerawšim w Bielefeldźe. 29lětny bě so přez wokno do wobchoda zadobył. Po wšěm zdaću pak bě tak mučny, zo so do jednoho z łožow lehny a sej wusny. Kedźbliwa swědka jemu nóclěh skazy a zawoła policiju. Jako zastojnicy młodeho muža wubudźichu, bě wón wězo chětro hněwny a so z rukomaj a nohomaj wobaraše. Wuspać smědźeše so na to w celi policajskeho rewěra.

Kumštny dinosawrier w kružnym wobchadźe w bayerskim Abensbergu skićeše šoferam spodźiwny wobraz. Žona bě ně­hdźe dwuapołmetersku dźiwnu kreaturu wuhladała a to policiji přizjewiła. Kaž so wukopa, jednaše so wo dinosawriera, zhubjeneho z něhdźe 40 kilometrow zdaleneho Altmühltalskeho muzeja. Postawa, kotraž napodobnja družinu sawrierow Coelophysisa, bě wobškodźena a njeměješe žane panochty a žanu wopuš. Štó je jenož dwaceći kilogramow ćežki eksemplar z platy na hórce wonkowneho areala muzeja wutorhnył a do kružneho wobchada stajił, njeje jasne.

To a tamne (21.02.19)

štwórtk, 21. februara 2019 spisane wot:

Kedźbu, hdyž sej knihu kupiće! Žona bě sej w interneće roman wo rjekach kupiła, zo móhła ju w dowolu woměrje čitać. Na lětanišću pak bu njejapcy zadźeržana. Roentgenowa připrawa pokaza, zo bě w knize pistola schowana. Wustróžana 59lětna powědaše, zo ničo wo „strašnym wobsahu“ njewě. Na zbožo jej to policija wěrješe, a tak móžeše swój zasłuženy dowol nastupić, wězo bjez pistole.

Wjetši kašć za tołše ćěło woznamjenja wjace pjenjez za pohrjeb. Tak mjenowany wosebity popłatk za wjetše kašće chcedźa w nowoseelandskim Hastingsu přesadźić. Normalnje pali so kašć z ćěłom dwě a poł hodźinje, ekstra wulki porno tomu hač do pjeć a poł hodźiny. Za nje dyrbja tuž 121 eurow připłaćić.

To a tamne (20.02.19)

srjeda, 20. februara 2019 spisane wot:

Nimo je zhromadne hońtwjerske wjeselo. Dokelž je pos z třělbu na hajnika třělił, ma to nětko sćěhi za 74lětneho. Wón dyrbi swoje hońtwjerske wopismo wotedać, dokelž njeje třělbu zawěsćenu měł. Jako so z wuchodźowarku rozmołwješe, je so jeho pos w awće z hońtwjerskej třělbu hrajkał, na hajnika třělił a jeho tak na ruce zranił.

Po turbulentnej jězbje z pokradnjenym awtom sam telefonisce pola policije přizjewił je so chětro natutkany 24lětny w badensko-württembergskim Ludwigsburgu. Po wšěm zdaću je sej potom tola hinak přemyslił a so radšo zminył. Policija muža na to pytaše a namaka jeho skónčnje doma w bydlenju. Bjez jězbneje dowolnosće bě młody muž z awtom runjewon přez kružny wobchad jěł, do parkowaceho awta zrazył a na to do štoma, doniž jeho sćěna domu njezadźerža.

To a tamne (19.02.19)

wutora, 19. februara 2019 spisane wot:

Nimale měsacaj po hodźoch přeco hišće wobswětleny hodowny štom w saksko-anhaltskim Merseburgu zdaše so pasantce njedźelu trochu dźiwny być. A kaž so wukopa, bě jeje starosć woprawnjena. Wona informowaše policiju, kotraž nańdźe mějićelku jednoswójbneho domu mortwu w pincy. Po wšěm zdaću bě so 76lětna hižo před dlěšim časom z woporom njeskutka stała. 51lětneho syna njeboćičkeje nablaku zajachu.

Italske awto w hódnoće 250 000 eurow měć, ale žane pjenjezy za ćěriwo – tak zeńdźe so w oberfrankskim Bergu 65lětnemu šoferej, kiž njeje zličbowanku tankownje zapłaćił, ale radšo dale jěł. W Bayreuthu jeho policija zadźerža. Při přepytowanju zastojnicy zdobom zwěsćichu, zo njeje awto ani zawěsćene a zo za mužom hižo z chłostanskim wukazom pytachu. Wón njebě mjenujcy pokutu dźesać eurow zapłaćił.

To a tamne (18.02.19)

póndźela, 18. februara 2019 spisane wot:

Tež kóń zamóže kriminalny pad rozrisać. Skoćo bě sobotu w južnej Hessenskej njezbožownje do bahna padnyło a njemóžeše so hižo same wuswobodźić. Wohnjowi wobornicy tuž pomhachu. Nimo konja wućahnychu pak hišće wulku bróń. Přiwołana policija bahno dokładnišo přepyta a nańdźe hišće dalšej třělbje kaž tež municiju. Brónje běchu paduši pokradnyli a je w bahnje schowali. Po­zdatnje wěsty schow pak je kóń připadnje wotkrył.

Napjateho telewizijneho programa dla je muž w Saksko-Anhaltskej wšo wokoło so zabył. Dny dołho njebě wot njeho ničo widźeć, jenož telewizor bě słyšeć. Dokelž wón tež na klinkanje a klepanje njereagowaše, wołachu susodźa wuchowansku słužbu. Jako chcychu wobornicy hižo přez kuchinske wokno do bydlenja zalězć, so muž před telewizorom jich skónčnje dohlada a jim durje wočini.

nawěšk

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson

nowostki LND