To a tamne (15.09.16)
Wbohe to zahrodkowe palčiki! Přehusto so wone politisce, rasistisce a samo seksistisce znjewužiwaja, štož ma so nuznje změnić! Tole měnja přiwisnicy wosebiteje specije, kotřiž chcedźa so kónc tydźenja w durinskim Trusetalu na palčikowym kongresu schadźować. Přećiwo znjewužiwanju mužikow z módrej abo čerwjenej čapku ma so zakročić, woni praja. Tak lěta 2006 załožena Mjezynarodna palčikowa strona z něhdźe 100 sobustawami planuje, nastajić rezoluciju Zwjazkowej antidiskriminaciskej instancy.
Za trochu njeradźeny postrow policistam bu 26lětny wodźer awta w Ludwigshafenje pochłostany. Tak je wón zastojnikow nimojěducy z piwom w ruce strowił a sej samo hišće lunk popřał. Zastojnicy muža hnydom zadźeržachu a zwěsćichu 0,7 promilow alkohola w jeho kreji, za čož ma nětko pokutu płaćić.
To a tamne (14.09.16)
Po wšěm zdaću bě sornikej přehorco, zo je minjenu nóc do priwatneho poola skočił. Po wochłódnjenju pak njeje z njeho hižo sam won přišoł. Wobydlerka to wobkedźbowaše, zawoła policiju a rozprawješe jej wo wbohim žatku w juhohessenskim Höchstu. Zastojnicy jej radźachu, zo ma młodeho sornika cyle jednorje z wody wućahnyć, štož so jej skónčnje poradźi. Kaž wona měnješe, je so zwěrjeću wulět najskerje spodobał.
89lětny předawar lodu móže so skónčnje na wuměnk podać. Přez lěta bě wón wšědnje z wozom po puću a předawaše ludźom mexiski lód. Fidenzio Sanchez bě wot swojeho dźěłoweho městna wotwisny, wšako dyrbješe so wo swójbu starać. Z pomocu crowdfundinga je fotograf Joel Cervantes Macias nětko za muža pjenjezy zběrał. Přez akciju nahromadźi Macias 277 000 dolarow.
To a tamne (13.09.16)
Njezwučene zasadźenje mějachu pomocnicy ADAC. Jako dyrbješe mała nopawa do Nürnbergskeje zwěrjatownje, zalěze wona do karoserije awta. Dlěje hač dwě hodźinje spytachu ju hladarjo zwěrjatownje z awta wabić. A wona wutra tam cyłe štyri dny. Hakle přiwołani pomocnicy ADAC wotšrubowachu nutřkowne wukładźenje awta, hdźež nopawu skónčnje nańdźechu. Žona bě ju do kófroweho ruma zamknyła a do zwěrjatownje dowjezć chcyła.
Nowy rekord nošerjow narodneje drasty docpě njedźelu w Hornjej Bayerskej ležace město Beilngries. Tam je 3 414 ludźi w narodnej drasće na ludowy swjedźeń přišło. Na notarielnje kontrolowanym zarjadowanju zličichu jenož korektnje woblečenych nošerjow drasty. Hakle w awgusće nastajeny rekord města Kempten – 3 134 – bu tak přetrjecheny.
To a tamne (12.09.16)
Lubosć k architekturje je 53lětneho muža pohnuła sej podrys bywšeho cistercienskeho klóštra Eberbach (Rheingau) pod kožu kałać dać. Kaž Joachim Träuptmann praji, je to znamjo jeho hłubokeje zwjazanosće. Jako bě wón skicu hrodu Neuschwanstein pola tattoowoweje wuměłče wuhladał, zrodźi wón ideju, sej klóšter na ruku tetowěrować dać. A to je dohromady sydom hodźin trało.
Muž je spad swojeho awta z dźewjateho poschoda parkowanskeho domu w ameriskim Austinje bjez zranjenjow přetrał. Kaž wohnjowa wobora zdźěli, bě wón do wobhrodźenja zajěł, při čimž awto w groće wisajo wosta. Jězdźidło wisaše na to padorunje z parkowanskeho domu: Šoferej pak so poradźi přez wokno na třěše jězdźidła wulězć a so do domu wuchować. Wohnjowej woborje so zešlachći awto z wysokosće na zemju sćahnyć.
To a tamne (09.09.16)
Do domskeho so zadobyli a tam warili běchu njeznaći w Neuruppinje. Tak nasyćichu so z nudlemi a praženymi běrnami a zminychu so na to z laptopom. Po wšěm zdaću bě so to w času wot njedźele do srjedy stało. A paduši so samo hišće raz nawróćichu. Wčera pobrachowaše nadobo telewizor. Jako policija wčera dopołdnja dom za slědami přepytowaše, tón tam mjenujcy hišće steješe.
Tomaty na row dźěda a wowki sadźiła je młoda žona w hornjobayerskim Neuburgu nad Dunajom. Rěčnicu kěrchowa, kotraž je zdobom měšćanska radźićelka, tole přewšo rozhorja. „Wšako njeje kěrchow zahrodka“, kaž praji. Nětko přihotuje wona próstwu, kotraž zakazuje na kěrchowje zeleninu plahować. Poprawom wšak chcyše młoda žona dźěda a wowku jenož zwjeselić. Wonaj dźě staj tomaty přewšo rady měłoj.
To a tamne (08.09.16)
Dokelž hrožeše konopej z woknom padnyć, su starosćiwi wobydlerjo Běłowodźanskeho domu policiju wołali. Skónčnje so wukopa, zo chcyše 36lětny wotnajer bydlenja ze swojimi přećelemi konopej přez wokno dele pušćić. Tón pak bě trochu přešěroki, zo njedóstachu jón ani tam ani sem. Pomocnicy běchu muža z problemom samoho wostajili. Hakle wohnjowej woborje so poradźi, konopej wróćo do bydlenja bugsěrować.
Nimale milion eurow by čěski žurnalist płaćić dyrbjał, chcył-li naprašowanje ke kriminalnej statistice wotmołwjene měć. Policija zdźěli, zo měła za trěbne informacije 1 543 485 njeskutkow přeńć, štož woznamjenja 1 543 485 x 4 = 6 173 940 minutow, to rěka 102 899 hodźin. Přeličene na mzdu by to 956 100 eurow było. Wón měł zličbowanku w běhu 60 dnjow zapłaćić abo naprašowanje cofnyć.
To a tamne (07.09.16)
Chětro nastróžił je so muž z Italskeje, jako dósta milinowu zličbowanku za 65 500 eurow. Daniele Cametti Aspri z Roma pak je stajnje swoje zličbowanki płaćił, kaž rjekny. Energijowe předewzaće Acea wšak jemu zdźěli, zo jedna so wo nachwatane płaćenja minjenych dźesać lět, a tuž na žadanju wobstawa. Zadwělowany je Italčan mjeztym na swojej Facebook-stronje k tak mjenowanemu crowdfundingej namołwjał, zo by pjenjezy za mega-zličbowanku někak hromadu dóstał.
Štyri kófry połne žiwych reptilijow su cłownicy na Amsterdamskim lětanišću našli. 259 hadow, ješćelcow a nopawow su tam sćazali. Dźesać zwěrjatow bě mjeztym hižo zahinyło. Třo Španičenjo chcychu reptilije, mjez nimi žadne leguany, z Mexika do Španiskeje pašować. Hódnota reptilijow je 80 000 eurow.
To a tamne (06.09.16)
Po dźewjeć měsacach je so zhubjena kokoš w Hamburgu k swojemu wobsedźerjej zaso nawróćiła. Kaž wčera rěkaše, bě sobudźěłaćerka pěstowarnje kokoš na ležownosći kubłanišća našła. Přiwołani policisća so w susodstwje naprašowachu, komu trochu leděrowane pjerite skoćatko słuša. Při tym so wukopa, zo bě wone 87lětnemu starcej před třištwórć lětom z kurjenca twochnyło a wot toho časa jako „single“ na puću žiworiło.
80lětna žona je w poruhrskim Bottropje ze swojim awtom wonkownu murju parkowanskeho domu přełamała a tři metry hłuboko na dalše parkowace awto padnyła. Wobě jězdźidle so chětro wobškodźištej. Staruška pak wopokaza so jako přewšo robustna. Njezranjena zalěze wona z rěbla přiwołaneje wohnjoweje wobory. Tež 85lětnemu mandźelskemu so ničo njesta. Wón wšak njebě na zbožo hišće do awta zalězł.
To a tamne (05.09.16)
Hada w swojim awće našoł je muž w badensko-württembergskim Weilu. Jako chcyše wón sobotu někotre reparatury přewjesć a jako motorowu hawbu wočini, nadeńdźe w awće 1,5 metrow dołhu bowu Constrictor. Kak bě so njejědojty had tam nutř dóstał a komu słuša, njeje dotal jasne. Fachowc je zwěrjo dosahnył a najprjedy raz sobu wzał.
Na dróze ležacych pjenjez dla je w bayerskim Kemptenje k wobchadnemu njezbožu dóšło. Jako je wodźer awta na jězdni wuhlada, wón nablaku zasta, tak zo jězdźidło za nim hižo sčasom borzdźić njezamó a do njeho zrazy. Sobujěduca prědnjeho awta pak njeda so mylić a „fenki“ na dróze pilnje zběraše. 55lětna smě nětko z jednanjom překřiwjenja dla ličić. Wina na njejapkim pjenježnym zbožu bě zabyćiwy muž, kiž je swoju móšeń na třěše awta ležo wostajił.
To a tamne (02.09.16)
Štóž z mopsom přińdźe, ma darmotny zastup. Tak je to znajmjeńša na mjezynarodnym zetkanju tejele psyčeje družiny jutře w Berlinje. Něhdźe 250 je přizjewjenych. Jedyn přijědźe samo z Italskeje. Wjeršk zetkanja je běh na 50 metrow. Dobyćerjam kiwaja trofeje w formje mopsa. Štóž chce sej wubědźowanje wobhladać a žanoho mopsa nima, wšak dyrbi dwaj euraj zastupa płaćić.
Wobkedźbowarjo tuchwilneho NSU- procesa w Mnichowje su całty a přikuski w hódnoće wjacorych tysac eurow kradnyli. Wot spočatka procesa móžachu sej ludźo a zastupjerjo medijow we wěstotnej conje sudnistwa całty, šokolodu abo tykanc kupić. Płaćić mějachu do kasy dowěry. Kaž sudnistwo zdźěli, pak su wjac zjědli hač zapłaćili. Hoberskeje škody dla njeje catering hižo zwólniwy přikuski poskićeć a je předań mjeztym zastajił.
