To a tamne (04.08.16)
Chětro njezbožowny dźeń měješe 42lětny wčera w porynsko-pfalcskim Frankenthalu. Najprjedy přizemi zapozdźeny a bjez wačoka na lětanišću. Doma so při telefonje z přećelku zwadźi, na čož roznjemdrjeny do špihela dyri a sej ruku rozrěza. Tak sydny so do awta a jědźeše do chorownje. Spodźiwne wašnje jězdźenja pak pěškej napadny, kiž zawoła policiju. Ta zwěsći 0,9 promilow alkohola. Jězbna dowolnosć je tuž na měsac fuk. Doma muž pytny, zo bě so sam wuzamknył. Tuž dyrbješe pinčne wokno rozbić, zo by do swojeho bydlenja přišoł.
Z busom je jědnaćelětny samlutki po Ingolstadće jězdźił. Po informacijach policije bě so za wodźidło parkowaceho busa sydnył a wotjěł. Pěšcy wołachu policiju, kotraž małeho busoweho šofera zadźerža a maćeri přepoda. Zastojnikam hólčec rjekny, zo bě klučik busa namakał a sej jón za „wulki dźeń“ wobchował.
To a tamne (03.08.16)
Wulět ćeknjeneje kruwy w Pfalcy je so po štyrjoch tydźenjach skónčił. Skoćo, kotrež słucha na mjeno Johanna, su wčera w Kaiserslauternje popadnyli. Kruwa bě so na ležownosć zawoda zabłudźiła. Jako zawodna wohnjowa wobora dojědźe, wona spočatnje ćekny. Sobudźěłaćerjo pak móžachu ju na wobhrodźenu płoninu ćěrić. Johanna bě spočatk julija z rězarnje ćeknyła a policiju zas a zaso za nós wodźiła. Nětko chcedźa ju na statok smilnosće dowjezć, kaž rěkaše.
Camping na njewšědnym městnje je we wokrjesu Teltow-Fläming zasadźenje policije zawinił. Ludźo běchu ju informowali, dokelž někotre wosoby na kromje B 96 za campingowym blidom sedźo jědźachu. Policija wšak móžeše pad wujasnić: Wulětnikarjam bě so awto skóncowało. Čakajo na pomocnu słužbu činjachu to najlěpše ze situacije.
To a tamne (02.08.16)
Jeno na zwjenu jěducy je 78lětny wodźer awta w Awstriskej přiwšěm spěšnje po puću był. Zo bjez prědnjeje wobruče jězdźi, ani pytnył njebě, wón policistam zamyleny rozłoži, po tym zo běchu jeho njedaloko wsy Wattens na awtodróze A 12 zadźerželi. Jězbnu dowolnosć jemu sćazachu a pósłachu jeho k lěkarjej. Potrjechene aluminijowe zwjeno bě hižo hač na połojcu wotjězdźene. Šoferojo běchu policiju alarmowali. Starca zadźeržeć njebě scyła tak lochko, dokelž wón spochi druhe awta přesćahowaše.
Z 3 000 kwadratnych metrow wulkim grafitom chce 40lětny Eduardo Kobra w Rio de Janeiru nowy swětowy rekord nastajić. Wobraz na sćěnje twarjenja blisko přistawa pokazuje portrety ludźi ze wšeho swěta. Kobra je sobu najznaćiši nadróžny wuměłc Brazilskeje.
To a tamne (01.08.16)
Na wšě 7 620 metrow z lětadła do hłubiny skočił je Luke Aikins z USA – a to bjez padaka. Tak je „skydiver“ nowy rekord nastajił. Tajki zwažliwy skok sej do njeho hišće nichtó zwěrił njebě. Akcija nad juhokaliforniskej pusćinu njedaloko Los Angelesa traješe dobrej dwě mjeńšinje. Aikinsa přewodźachu třo parašutisća. Sekundy do přizemjenja so wón na chribjet wobroći a padny do 30 króć 30 metrow wulkeho saka 60 metrow nad zemju. Wokomiki pozdźišo Aikins ze saka wulěze a swoju žonu wobjimaše.
Skóncowaneho zamka dla njemóžeše muž w Heidelbergu minjenu nóc nuznik hižo wopušćić. Wón wołaše tak dołho wo pomoc, doniž susodka policiju njezawoła. Zastojnicy móžachu drje z generalnym klučom do bydlenja samostejaceho. Durje wustupa pak dyrbjachu wohnjowi wobornicy wočinić.
To a tamne (29.07.16)
Ničo za słabe čuwy: Wosebje zmužići turisća smědźa so w chinskim Shanghaiju 340 metrow nad zemju přechodźować. Tam su wčera na 88. poschodźe 420 metrow wysokeje wěže Jin Mao wonkowny škleńčany chódnik přepodali. Tón je 60 metrow dołhi a runje 1,20 metrow šěroki. Zastup płaći 40 do 50 eurow. Ludźo su z pasom zawěsćeni, přetož škleńčany chódnik nima žane wobłoženje. Za to je wuhlad na milionowe město pječa wulkotny.
Dospołnje pjany po cuzej zahrodźe wjacore koła jězdźił je wodźer awta wčera rano zahe w Braunsdorfje we wokrjesu Wódra-Sprjewja. 56lětny wšak měješe tež 3,29 promilow alkohola w kreji. Wopity bě z jězdnje zajěł a přez polo skónčnje na zahrodu, při čimž hišće płót wobškodźi. Wobsedźer zahrody bě policiju wołał. Jězbnu dowolnosć dyrbješe muž jej hnydom přewostajić.
To a tamne (28.07.16)
Na dosć rabiatne wašnje je so wobydler w hornjopfalcowskim Nabburgu nowej wirtuelnej hrě Pokémon wobarał. Wón biješe z drjewjanym retlom na parkowace awto a načini tak 500 eurow škody. Po informacijach muža so po wudyrjenju noweho hibanja wokoło internetneje hry wodnjo a w nocy hrajerjo Pokemóna z awtami a wótrej hudźbu před jeho domom zetkawaja. Prawdźepodobnje tam fiktiwne „monstery“ honja.
Před třomi lětami ćeknjena kóčka je zaso pola swojeje wobsedźerki w Berlinje. Sobudźěłaćerce towarstwa za škit zwěrjatow bě před něšto dnjemi wuhłódnjena kóčka na dróze napadnyła. Žona wza ju sobu do zwěrjatownje. Tam zwěsćichu, zo ma zwěrjo chip pod kožu. Tak móžachu wobsedźerku wuslědźić a jej mjeztym 16lětnu „Mauzi“ přepodać. Kóčka bě so w lěću 2013 zhubiła.
To a tamne (27.07.16)
Na wšě šěsnaće hodźin je muž w kontejneru stareje drasty na swoje wuswobodźenje čakać dyrbjał. 44lětny bě w Gorknitzu pola Drježdźan kontejner přeslědźił a so při tym do njeho sunył, zdźěli policija. Wusłyšawši wołanje a klepanje muža w železnym sudobju, poinformowa wobydler susodneho domu wohnjowu woboru. Policija nětko pospytaneho „padustwa mjenje hódnych wěcow“ dla přećiwo njemu přepytuje.
Před třomi tydźenjemi z rězarnje ćeknjena kruwa w Kaiserslauternje policiju přeco hišće za nós wodźi. Šoferojo běchu skoćo wčera w měsće wuhladali, na čož policiju wołachu. Jako zastojnicy pijědźechu, skoćo do lěsa ćekny. Tam bjez wuspěcha za nim pytachu. Před třomi tydźenjemi běchu samo helikopter podarmo zasadźili. Dokelž kruwa tež po kolijach běhaše, dyrbjachu nachwilnje čaru zaraćić.
To a tamne (26.07.16)
W zwadźe smjerdźateju nohow dla je muž sobujěducemu w ćahu plistu wottyknył. W ćahu z Basela do Berlina dóńdźe wčera k rozestajenju, jako bě sej 54lětny črije zuł a noze na prózdne sedło pódla 32lětneho wupřestrěł. Tón so smjerda dla hóršeše a noze skónčnje z ławki suny. Na to so wobaj wurěčowaštaj, doniž so młódši z njeju z plistu za smjerdźatej noze „njepodźakowa“. Na dwórnišću w Göttingenje policija mužomaj dalejězbu zakaza. 32lětny dósta skóržbu ranjenja ćěła a 54lětny křiwdźenja dla.
Z basketballoweho saka wuswobodźić dyrbješe Bremenska wohnjowa wobora 17lětneho młodostneho. Tón bě na sćežor zalězł a so z nohu w saku zapopadnył. Tež sobuhrajerjo jemu pomhać njemóžachu. Wohnjowi wobornicy tuž přijědźechu a stajichu młodostnemu rěbl, po kotrymž wón dele zalěze.
To a tamne (25.07.16)
Z awtom maćerje je sej wčera 13lětny w durinskim Unterwellenbornje wulećał, ale bórze do štoma prasnył. Jězba skónči so njejapcy w lěwej křiwicy, jako so młody šofer tež hišće z mobilnym telefonom zaběraše. Nimo toho steješe pachoł pod wliwom alkohola. Při zražce so wón na zbožo jenož lochko zrani. Mać jeho na městnje njezboža wotewza a staraše so wo to, zo awto wotwleku.
Wša próca bě na kóncu tola podarmotna: Třo mužojo su w bayerskim Weidenje něhdźe tysac prózdnych blešow z wulkowobchoda pokradnyli a we wjacorych wulkich měchach wottransportowali. Ze swojimi hoberskimi wačokami wšak trójka wobsadce policajskeho awta napadny. Po krótkim přesćěhanju zastojnicy pakostnikow dosahnychu. Prózdne bleše běchu 232 eurow hódne. Policija přepytuje nětko padustwa dla.
To a tamne (22.07.16)
Tež na najwotležanišich twarnišćach njejsu dźěłaćerjo před kontrolemi čornodźěła dla wěsći. Hłowny cłowny zarjad w Augsburgu je swojich zastojnikow wčera na 2 224 metrow wysoki Nebelhorn pola bayerskeho Oberstdorfa pósłał, hdźež tuchwilu nowy panoramowy hosćenc nastawa. Mjez 37 dźěłaćerjemi su cłownicy woprawdźe wjacore přeńdźenja zakonjow zwěsćili. Dokelž powjaznica twarskich dźěłow dla njejězdźeše, wšak dyrbjachu woni pěši na horu.
Přechutnje brał je Stuttgarćan kriminalku w telewiziji a je policiju wołał. 46lětny bě na schodźe wjaceswójbneho domu słyšał, kak něchtó žonu wudrěwuje, dokelž bě mandźelstwo łamała. Wuchadźejo z toho, zo jedna so wo njeskutk, wołaše muž policiju. Durje bydlenja pak wočiništej sotře w starobje 14 a 16 lět, kotrejž běštej film hladałoj.
