To a tamne (07.09.18)

pjatk, 07. septembera 2018 spisane wot:

Zo by sej słódkosće kupił, je jědnaćelětny z awtom maćerje w delnjosakskim Schöningenje ke kupnicy žiwidłow jěł. Po dźesać kilometrach bjezporočneje jězby zadźeržachu jeho policisća, kotrychž bě druhi šofer awta alarmował. Hólčec bjez problemow a cyle wěsće na kromje dróhi zasta. Zastojnicy su małeho wulětnikarja dospołnje překwapjenej maćeri přepodali. Swoje jězbne kmanosće bě sej pachoł na traktoru přiswojił.

Pod konopejom staršeju namakali su pomocnicy pjećlětneho hólca, za kotrymž běchu cyłu hodźinu pytali. Samo policiju su hižo alarmowali, dokelž njemó­žachu hólčka namakać. Na to wohnjowi wobornicy, stafla wuchowanskich psow a policija z wótřerěčakami w bydlenskej štwórći za nim pytachu. Skónčnje hólca pod konopejom wuhladachu, hdźež drje bě so wšón čas chował.

To a tamne (06.09.18)

štwórtk, 06. septembera 2018 spisane wot:

Swoje před hodźinomaj kupjene awto je 18lětny započatkar w Šwabskej při jězbje dospołnje zešrotował. Do toho bě wón asistencne systemy sportoweho ­woza wotšaltował, štož bě najwjetši zmylk. Wšako młody muž sylny bolid bjez pomocneje techniki njewobknježeše. Jako tón z wotmachom pospěši, zajědźe z jězdnje, prasny do płota a wosta na industrijnej płoninje stejo. 20 000 eurow drohe awto hodźi so jenož hišće do stareho železa. 18lětny a sobujěducej wosobje mějachu koče zbožo a so njezranichu.

Skurilne to zasadźenje za běłoruskich namjeznych policistow: Dokelž bě so ně­hdźe 180 howjadow na Ukrainje z pastwy wudobyło a přez statnu mjezu do susodneje Běłoruskeje twochnyło, su jich pastyrja nachwilnje zajeli. Tón bě za howjadami pytajo statnu hranicu překročił. Pastyr nawróći so najprjedy raz bjez howjadow. Te pušćichu po zrjadowanju wšitkich formalitow hakle něšto pozdźišo.

To a tamne (05.09.18)

srjeda, 05. septembera 2018 spisane wot:

Kruwa na třěše garaže je w badensko-württembergskim Maichingenje wjacore hodźiny policiju zaběrała. Samo helikopter bě zasadźeny, zo móhli sej zastojnicy přehlad wo połoženju tworić. Howjado bě přez nasyp na zadnjej stronje garaže na třěchu zalězło a runje tak zaso dele, po tym zo běchu jemu wopojny srědk dali. Wohnjowi wobornicy dowjezechu je wróćo do ratarskeho zawoda, z kotrehož bě w rańšich hodźinach twochnyło.

Trójniki Sakskeje smědźa so na wose­bity dźeń wjeselić: Ministerski prezident ­Michael Kretschmer (CDU) přeprosy jich za 23. september do Lipšćanskeho zwěrjenca. Na 10. zetkanju tajkeho razu chcedźa 14 nowych tajkich ­trójkow do kruha kmótřiskich swójbow přiwzać. Wot lěta 1995 wukonja sakski premier čestne kmótřistwo trójnikow. Swójby dóstanu jónkrótnje 3 000 eurow.

To a tamne (04.09.18)

wutora, 04. septembera 2018 spisane wot:

Do zwonkazemskeho žiwjenja wěri Berlinski knježacy měšćanosta Michael Müller. „Zo je druhdźe hinašeho žiwjenja, kaž přeco wone tež wupada, a zo njejsmy jeničcy w uniwersumje, wo tym sym přeswědčeny“, rjekny 53lětny politikar SPD dźěćacym reporteram Berlinskeje nowiny B.Z. Přiwšěm wón njewěri, zo chcył něchtó zemju nadpadnyć. Sam by jako astronawt rady do swětnišća lećał. Jako dźěćo bě wón často w planetariju.

Jako chłóšćej hubje do šule zadobyłoj stej so holcy w badensko-württembergskim Dietingenje, byrnjež prózdniny byli. Holcy běštej tam wočinjene durje wuhladałoj. Přez nje dóstaštej so do běrowa domownika a spakosćištej jemu słódkosće. Z namakanym klučom dźěštej dale do wučerskeje stwy, hdźež pak jej wučerka lepi. Zawołana policija je holcy w starobje 13 a 15 lět domoj dowjezła.

To a tamne (03.09.18)

póndźela, 03. septembera 2018 spisane wot:

Konja ze swimmigpoola wuchowali su pomocnicy w sewjerorynsko-westfalskim Meerbuschu. Kón bě z bliskeje pastwy ćeknył a běžeše přez bazenk, kotryž bě jeno z lamelemi wodźěty. Kóń so přełama a padny do wody. Jeho wuchować pak bě wobćežne, dokelž bě ležownosć za jězdźidła wohnjoweje wobory přemała. Tak přijědźe susod z małym bagrom. Z pomocu pasow móžachu konja po hodźinomaj skónčnje wućahnyć, po tym zo bě jeho skótny lěkar z lěkami změrował.

Bamžej moped přepodali su čłonojo ­Vespa-cluba w Italskej. K historiskemu rolerej słušeja tež běły nahłownik, wopon Vatikana a swójska čisłowa taflička „BF362918“. „B“ rěka Bergoglio, swójbne mjeno bamža, „F“ rěka Franciskus a „36“ je jeho narodne lěto. Na kóncu steji datum přepodaća. 81lětny bamž je připowědźił, zo chce jězdźidło přesadźować.

To a tamne (31.08.18)

pjatk, 31. awgusta 2018 spisane wot:

Na nastupišću dwórnišća dźěćo porodźiła je žona w Pólskej. Porod na centralnym Waršawskim dwórnišću „Śródmieście“ njetraješe ani pjatnaće mjeńšin. Žona­ móžeše runje hišće z ćaha wulězć. Nan dźěsća, policija a personal dwórnišća při ekspresnym porodźe pomhachu. Mać a strowe dźěćko dowjezechu do chorownje. Pólska železnica gratulowaše, při­powědźejo darny paket. Wězo so nadźija, zo budźe dźěćo lubowar železnicy.

Njewšědnu připrawu k zawodźenju čisłoweje taflički awta je policija w bayerskim Bindlachu wuhladała a wotstroniła. Šofer móžeše z dalokoposłužowakom taf­lič­ku z małej elektriskej žaluziju zakryć. Zastojnikam bě přezpólny wóz bjez prědnjeje čisłoweje taflički na awtodróze A 9 napadnył. 54lětny šofer přizna, zo chcyše „njelube wobrazy“ policije wobeńć. Ta wšak připrawu nablaku wotšrubowa.

To a tamne (30.08.18)

štwórtk, 30. awgusta 2018 spisane wot:

Protestujo přećiwo zanjerodźenju přirody a nadměrnemu rybyłójenju je Wulkobritaničan Ärmelowy kanal po dołhosći přepłuwał. 48lětny Lewis Pugh je wčera po něhdźe 560 kilometrach swój zaměr Dover docpěł. Startował bě 12. julija na zapadźe Cornwalla. Po swójskich informacijach je wón prěni čłowjek, kiž je kanal na te wašnje přewinył. Poprawom płuwarjo Ärmelowy kanal na najwušim městnje přeprěčeja, mjez jendźelskim Doverom a francoskim Calaisom. Čara je tam runje 32 kilometrow dołha.

Wjace hač 20 000 ludźi je so we wuchodošpaniskim Buñolu na tradicionalnej tomatowej bitwje „La Tomatina“ wob­dźěliło. Kaž kóžde lěto poslednju srjedu awgusta su wobdźělnicy ze wšeho swěta něhdźe hodźinu dołho přezrawjene tomaty na so mjetali. Při tym přetrjebachu 145 tonow płodow.

To a tamne (29.08.18)

srjeda, 29. awgusta 2018 spisane wot:

Tysacy pčołkow su wčera předawanišćo hotdogow wosrjedź z turistami mjerwjaceho so Times Squara w New Yorku woblěhowali. Prawdźepodobnje běchu swój schow horcoty dla wopušćili. Ludźo so předawanišća zdalowachu. Policija pósła swojeju hłownohamtskeju fachowcow za pčołki. Njetraješe ani hodźinu, a něhdźe 40 000 pčołkow bě popadnjenych a po puću k nowej domiznje na Long Island.

Tójšto wusměšowanja dyrbi sej britiska premierministerka Theresa May w interneće lubić dać, po tym zo bě na wopyće w Južnej Africe ze šulerjemi rejwała. Rejuje „kaž roboter Maybot“, abo „kaž Mick Jagger, po tym zo je jeho Boža ručka zajała“, tam čitaš. W zjawnosći rejwać je za politikarjow „wěste riziko“. Kóždy dźě tak „cool njegroovuje“ kaž bywši US-prezident Barack Obama na swojim poslednim wopyće Južneje Afriki.

To a tamne (28.08.18)

wutora, 28. awgusta 2018 spisane wot:

20 centimetrow dołhi štabik kokoška­ceho kebaba su britiscy lěkarjo psej ze žołdka wuoperowali. Šěsćlětny pos mě­ješe na prawym boku naraz spodźiwnu zaćeklinu. Štož lěkarjo pod röntgenowym nastrojom wuhladachu, jich zadźiwa: Stajnje zaso psy kamjenje abo hrajki póžěraja, tajki dołhi štabik pak skerje nic. Wobsedźerjo psow dyrbjeli tuž na grilowanskich partyjach derje na swoje štyrinohače kedźbować.

Nop wopicy a róh antilopy su cłownicy na Hannoverskim lětanišću w kófrje žony­ z Namibije namakali. Při kontroli wačoka so cłownicy chětro stróžichu, jako­ na röntgenowym nastroju nop wuhladachu. Wočiniwši kófer njenamakachu jenož wosobinske wěcy, ale tež nop šimpansy a róh antilopy. Dokelž njeměješe žona žane dokumenty za škitanej wěcy, jej cłownicy nablaku sćazachu.

To a tamne (27.08.18)

póndźela, 27. awgusta 2018 spisane wot:

Wosrjedź twarnišća swoje awto zešro­tował je šofer transportera njedaloko bayerskeje wsy Schneckenlohe. Byrnjež tafle wuraznje před twarnišćom warnowali, bě 24lětny zawěry z wulkej spěšnosću wobjěł a runu smuhu na hromadu bitumena jěł. Poł metra wysoka hro­ma­da skutkowaše kaž skakanišćo. Po tym zo bě transporter něhdźe 20 metrow lećał, zrazy tón do pobóčneho wobhrodźenja. Jězdźidło bu dospołnje skóncowane, wobě wósce buštej wutorhnjenej. Šofer so kaž dźiw jeno snadnje zrani.

Z Trabantom 25 000 kilometrow po puću był je čěski dyrdomnik a filmowc Dan Přibáň. Jězbu zahajił bě před pjeć měsa­cami w južnej Indiskej. Wčera so do Prahi nawróći. Přewodźałoj stej jeho dalši w Zwickauwje twarjeny „601“ kaž tež mólički Fiat 126p z 23 PS. Skurilnu skupinu běchu wšudźe witali, kaž Přibáň rjekny.

nawěšk

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.

nowostki LND