To a tamne (14.02.23)
To a tamne (13.02.23)
Při nadpadźe rubježnika na hosćenc w Nižozemskej njeje skućićel z rozsudźenosću hosći ličił. Jako muž minjeny pjatk hosćenc w gmejnje Best z brónjemi nadběhowaše a za pjenjezami žadaše, su jeho wjacori hosći přemóžili. Woni jeho tak dołhe zadźeržachu, doniž njebě policija na městnje. Kaž so pozdźišo wukopa, měješe muž samo atrapu pistole a powětrowu pistolu při sebi.
Ze starobu 9 lět a 210 dnjow je mała myš z mjenom Pat nětko w knize Guiness zapisana. Zwěrjatko je najstarša žiwa myška, kotruž ludźo hladaja. Pat bydli w zwěrjencu SanDiego Wildlife, hdźež prócuja so wot wotemrěća wohrožene družiny zwěrjatow wuchować. Myška přisłuša k rědkej družinje, kotraž ma swoju domiznu na juhu kaliforniskeho přibrjoha.
To a tamne (10.02.23)
To a tamne (09.02.23)
W Peru je po informacijach zarjadow znajmjeńša 585 mórskich lawow na ptačej gripje zahinyło. Mortwe zwěrjata namakachu podłu pobrjoha južnoameriskeho kraja. Z přepytowanjow wuchadźa, zo běchu wone z wirusom H5N1 inficěrowane. W škitanych kónčinach kraja su nimo toho něhdźe 55 000 zahinjenych ptačkow namakali, mjez druhim pelikany, tonuški a pinguiny.
Tysacy ludźi su wčera před čěskej Narodnej banku w Praze čakali, zo bychu jednu z 200 000 limitěrowanych wopomnjenskich bankowkow dóstali. Tež w druhich městach kraja su so rynki před bankami wutworili. Najebać zmjerzk su so zajimcy samo hižo w nocy nastupili. Bankowka dopomina na 30lětne wobstaće Narodneje banki.
To a tamne (08.02.23)
Žona je z něhdźe 800 myšemi w jednoswójbnym domje na sewjeru Porynsko-Pfalcowskeje hromadźe bydliła. Hižo minjeny tydźeń bě weterinarny zarjad 400 zwěrjatow z domu wuswobodźił. Při wospjetnym zasadźenju wčera chcychu zastupjerjo zarjada a priwatnych zwěrinoškitnych iniciatiwow něhdźe 400 myšow wuchować. Susodźa žony běchu pokiw sposrědkowali, dokelž su so smjerda dla hóršili. Wobsedźerka myšow je přeswědčena, zo ma situaciju pod kontrolu a njedowidźi, zo je dospołnje přežadana.
Zwjazkowy financny minister Christian Lindner (FDP) je nowy Oldenburgski kral zeleneho kała. Zastojnstwo je do toho Berlinska měšćanostka Franziska Giffey (SPD) wukonjała. W swojej nastupnej narěči wón zwurazni, zo wón zeleny kał jara lubuje.
To a tamne (07.02.23)
Wuknjacy zakładneje šule w hessenskim Griesheimje je so po wšěm zdaću jara na šulu wjeselił. Tak je sydomlětny hólčec wčera rano hižo krótko do pjećich dom wopušćił a so z tobołu a kolesom do šule podał. Staršej staj hišće spałoj, policija zdźěli. Kedźbliwy pasant hólca wuhlada, jako po dróze horje a dele jědźeše, a zdźěli to policiji. Zastojnicy su pachoła potom domoj dowjezli a překwapjenymaj staršimaj přepodałoj.
Jako kat předrasćeny muž z pozdatnym mječom je w Esslingenskim starym měsće minjeny pjatk zasadźenje policije zawinił. Swědkojo so starosćachu, dokelž bě wón jara přeswědčiwje a z namocu wustupował. Tuž zawołachu policiju. Zastojnicy namakachu jeho w pincy domu. Tam přihotowaše so kat na wodźenje po měsće, kotrež chcyše w srjedźowěkowskim stilu wuhotować.
To a tamne (06.02.23)
Při renowěrowanskich dźěłach je starša Berlinjanka najwšelakoriše brónje, kaž na přikład pancerowu pjasć, zady swojeje lěharnje namakała. Zasadźenske mocy zawěsćichu w bydlenju brónje, třělby, mašinsku pistolu a wjacore ručne brónje, zdźěli policija tele dny na Facebooku. Žona bě so hižo před tydźenjomaj přizjewiła. Nahladnu zběrku je wona našła, jako chcyše ponowjenske dźěła wukonjeć. Před třomi lětami je jeje mandźelski wumrěł, kiž je brónje po wšěm zdaću tajnje składował.
Koparski profi a hrajer narodneho mustwa Joshua Kimmich ma za pjeć tydźenjow w Mnichowskim Tatort hóstny wustup. W njedźelnym krimiju ARD „Hackl“, kotryž je za 12. měrca připowědźeny, wustupuje Kimmich jako fitnesowy trenar. Jedyn dźeń su sceny z koparjom natočili, Bayerski sćelak (BR) nětko rozprawja.
To a tamne (03.02.23)
Dokelž je dźesaćlětny hólčec z wokrjesa Herford wótře rjejił, staj so paduchaj nablaku z ležownosće staršeju zminyłoj. Wčera je policija pad wozjewiła. Hólc bě dopołdnja sam doma, jako spytaštaj skućićelej do bydlenskeho domu so zadobyć. Tak staj škleńcu terasowych duri rozbiłoj. Hólčec je na to wótře rjejił, tak zo staj paduchaj ćeknyłoj. Po tym je wón swoju mać a policiju informował.
Pjeć tydźenjow stary aziski elefant w Lipšćanskim zwěrjencu rěka „Bào Ngoc“ – drohotny juwel. Mjeno je vietnamski wulkopósłanc Vu Quanga Minha wupytał.
To a tamne (02.02.23)
To a tamne (01.02.23)
Zwada mjez susodkomaj rumowanja sněha dla je so w Spiesen-Elversbergu pola Saarbrückena přiwótřiła. Tak je 39-lětna žona swoju 59lětnu susodku ze sněhowej łopaču nadpadnyła a ju na hłowje zraniła. Mandźelski 59lětneje chcyše pomhać a bu tohorunja zranjeny. Policija je přepytowanja přećiwo woběmaj žonomaj zahajiła.
W južnoafriskej hospodarskej metropoli Johannesburg je druhi raz w běhu dweju tydźenjow tiger ćeknył. Rubježne zwěrjo su ludźo zawčerawšim rano na wobstražowanskim wideju běrowoweho kompleksa wuhladali. Nětko tam za tigrom pytaja. Srjedź januara bě hižo raz tiger z wobhrodźenja ćeknył. Zwěrjo je muža nadpadnyło a wjacore zwěrjata moriło. Po štyrjoch dnjach tigra popadnychu. Tigry njejsu w Africe w přirodźe žiwe, ale so na priwatnych farmach plahuja.
