To a tamne (09.03.22)
To a tamne (08.03.22)
Namócne rozestajenje połneje pjelchi dla měješe dźensa swoje pokročowanje na Düsseldorfskim hamtskim sudnistwje. Wobskorženy bě 42lětny nan ranjenja ćěła dla. Wón bě swoje dźěćo na Düsseldorfskej Kralowskej aleji pjelchował a na to połnu pjelchu do hrjebje znateje promenady ćisnył. Jako jeho žona narěča a přesćěhaše, dokelž bě so jej wuwinył, da so z pjasću do njeje a dalšich pěškow, kotřiž z nim pjelchi dla rozrěčowachu.
Ćeńka lajna za šaty mjez awtom a transporterom je kedźbnosć policije zbudźiła a wopiteho šofera přeradźiła. 46lětny wodźer transportera bě na awtodróze A 11 mjez Berlinom a Szczecinom šofera małeho awta prosył jeho do Pólskeje wotwlec, dokelž bě jemu bencin wušoł. Njewšědny zapřah policiji napadny. Při kontroli so wukopa, zo nima muž žanu jězbnu dowolnosć a zo pólska policija za nim pyta. Test alkohola wunjese 1,5 promilow.
To a tamne (07.03.22)
Chětro wopita šoferka wosoboweho awta je při njezbožu škodu 5 000 eurow zawiniła. Kaž policija zdźěli, bě 43lětna sobotu wječor z 2,16 promilemi alkohola we vogtlandskim Rosenbachu po puću. Při tym zhubi kontrolu nad wodźidłom a zrazy do wjacorych kwětkowych sudobjow. Zwróći z awtom na lěwy bok, a wone wosta w płoće tčacy. Přećiwo 43lětnej zahajichu chłostanske jednanje. Jězbnu dowolnosć jej nablaku sćazachu.
Wjacore kóčki z balkona na šestym poschodźe wuchować dyrbješe wohnjowa wobora wčera w Drježdźanach, zo njebychu do hłubiny padnyli. Před domom namakachu pomocnicy mortwu kóčku, kotraž drje bě hižo z balkona padnyła. Z pomocu wjerćiteho rěbla zalězechu woni tam přez susodny balkon a móžachu štyrinohače wuchować. Wobydlerjo njeběchu doma. Přiwuzni su kóčki přiwzali.
To a tamne (04.03.22)
Sobu najnaročniše wubědźowanje sankowych psow „Iditarod“ chcedźa jutře, sobotu, w Alasce přewjesć: 1 800 kilometrow po sněze a w surowej zymje. Cyłkownje 49 wobdźělnikow, mjez nimi 17 žonow, chce so z psyčim zapřahom na puć nastajić. Z Němskeje wobdźěli so Sebastian Schnülle z Wuppertala, a to mjeztym wosmy króć. W lěće 2009 bě wón čaru po dźesać dnjach a pjeć hodźinach na druhim městnje zmištrował.
Z porstom w kolijach drjewjaneje dźěćace železnicy tčacy wostał je štyrilětny hólčk w Düsseldorfje, na čož poda so nan z nim do chorownje. Jako tam piła za wapno zapraji, wołachu wohnjowu woboru. Ta pachołka z jednorej piłu wuswobodźi, bjez toho zo by so zranił. „Ludźo wědźa sej dźeń a mjenje pomhać a nimaja častodosć ani wjace grat doma“, rěčnik wobory zasadźenje komentowaše.
To a tamne (03.03.22)
Přećeljo Trabanta, kultoweho awta z časa NDR, chcedźa zajutřišim, sobotu, w Quilowje pola předpomorskeho Anklama nowu sezonu zahajić. Tak chcedźa přez koronawirus chětro ćerpjace towarstwowe žiwjenje zaso porjadnje wožiwić, kaž rěčnik towarstwa Trabbi-Buggy-Club 93 zdźěli. Zahajenske zetkanja prěni měrcowski kónc tydźenja z fanami z Mecklenburgsko-Předpomorskeje, Braniborskeje a Berlina pěstuja wot lěta 1995.
Z trašawku na rjemjeslnika třělał bě pjany 29lětny muž w Berlinje a mjeztym w jastwje sedźi. 63lětny rjemjeslnik poćerpje trawma prasnjenja dla we wuchu, kotrež pak njetrjebachu lěkarsce zastarać. Po přestawce na dworje wróći so rjemjeslnik z kolegomaj do bydlenja a rjekny 29lětnemu, zo chcedźa dale dźěłać. Nadobo so tón z pistolu na njeho měrješe a wospjet třěli. Rjemjeslnicy ćeknychu a wołachu policiju, kotraž muža zaja.
To a tamne (02.03.22)
Hoberske morjo swětleškow z 1 171 078 wolijowymi lampkami je knježerstwo indiskeho zwjazkoweho stata Madhya Pradesh składnostnje hinduistiskeho swjedźenja Maha Shivaratri inscenowało. Tak su nowy swětowy rekord wolijowych lampow nastajili, kaž z redakcije Guinnessoweje knihi rekordow rěka. Dotalny rekord wjace hač 900 000 lampkow bě loni w nowembru w indiskim měsće Ayodhya.
Pjaneho šofera zaparkowali su swědcy w sewjerorynsko-westfalskim Hagenje. 54lětny swědk bě policiju informował, zo wodźer awta w napřećiwnym wobchadźe při kolonje čakacych jězdźidłow nimo jědźe, a to chětro njewěsće. Jako chcyše so zawróćić, so dwě awće před nim stupištej a jeho tak zadźeržeštej. Přiwołana policija zwěsći wjace hač jedyn promil alkohola w kreji 66lětneho šofera.
To a tamne (01.03.22)
Wjace hač štyri promile alkohola měješe wodźer nakładneho awta w kreji, jako na awtodróze A 2 pola Ziesara njedaloko Podstupima znjezboži a so zrani. Šofer zhubi kontrolu, jako chcyše k tankowni. Najprjedy šmórny so jeho Lkw pobóčneho wobhrodźenja. Na to zrazy do dalšeju nakładneju awtow a so powróći. Po tym zo su pomocnicy sylnu „chorhojčku“ zwěsćili, přewjedźe policija test alkohola.
Něhdźe 100 000 eurow škody na železniskim mosće načinił je šofer nakładneho awta w Hennigsdorfje, dokelž njebě kran swojeho awta porjadnje zrumował. Móst njeje hižo wužiwajomny. Po prěnich dopóznaćach bě 61lětny šofer do njezboža dwaj kontejneraj nakładował. Po tym njeje kran po předpisach zaso do zakładneje pozicije přinjesł, ale wotpołoži jón na kontejneromaj. Jako chcyše pod mostom jěć, dóńdźe k zražce.
To a tamne (28.02.22)
Na powjazu 30 metrow wysoko je němski artist Alexander Schulz před palastom Red Fort w indiskej stolicy New Delhiju běžał. Bě to zarjadowanje składnostnje 75. róčnicy njewotwisnosće Indiskeje. Schulz steji ze swojimi rekordami hižo w Guinnessowej knize rekordow. Před lětomaj bě wón nad aktiwnym wulkanom w južnym Pacifiku kročił. Lěto na to přeprěči Schulz na 1,7 kilometrow dołhim powjazu hłubinu – a to 800 metrow wysoko ze zawjazanymaj wočomaj.
Kozoła na zadnjej ławce swojeho awta měještaj policistaj w Durinskej sedźo. Do toho běchu při zasadźenju objekt přepytali. Jako swědk bě tež wobsedźer kozoła na městnje. Tón zastojnikow hnydom warnowaše, zo „kozoł rady z awtom jědźe“. A hižo skoči tón do woza, zo by sobu jěł. Přeće pak jemu policistaj njespjelništaj, kozoł dyrbješe awto wopušćić.
To a tamne (25.02.22)
Psa na lisćinje čłonow su francoscy konserwatiwni republikanojo při wólbach swojeho kandidata za prezidentske wólby 10. apryla stejo měli. Jedyn z čłonow bě w korčmje mysličku zrodźił a swojeho psa Clovisa pod swojej adresu napisał a samo čłonski přinošk zapłaćił. Nowinarjam bě napadnyło, zo maja republikanojo třoch zemrětych a psa na lisćinje. Čłon na to swój „žort“ přizna.
Do jamy błóta padnyła je žona, jako so w lěsu w delnjobayerskim Egingu wuchodźowaše, a njemóžeše so hižo sama wuswobodźić. Wohnjowi wobornicy su 60lětnu skónčnje z dźěry njedaloko Passauwa wućahnyli. Cyłu hodźinu dyrbješe žona w štyri kwadratne metry wulkej dźěrje wutrać a wołaše wo pomoc. Přemjerznjenu dowjezechu ju do chorownje. Dźěra bě drje přez dešć minjenych dnjow nastała.
To a tamne (24.02.22)
Kaž bychu sej to dorěčeli: Předwčerawšim, 22. februara 2022, je we woběmaj uniwersitnymaj chorownjomaj Sakskeje dokładnje 22 dźěći na swět přišło, jědnaće w Lipšćanskej uniwersitnej klinice a jědnaće w Drježdźanskej. Tak bě druha palencowa ličba woblubowaniša hač prěnja 2.2.22. Tón dźeń bě so w Lipšćanskej klince pjeć ćěšenkow narodźiło, w Drježdźanskej wosom.
Wikowarja falšowanych šćěpjenskich wupokazow je policija w Berlinje lepiła. 19lětny bě z bydlenja swojeju staršeju w měšćanskim dźělu Kreuzberg z wopačnymi dokumentami wikował. Wón bě wupokazy z nalěpkami, lěkarskim kołkom a podpismom w interneće poskićał. Jako chcyše štyri tajke šćěpjenske wupokazy na Dieffenbachowej přepodać, jeho zastojnikaj zaještaj. W bydlenju namakaštaj na to kołki a nalěpki.
