To a tamne (27.11.15)

pjatk, 27. nowembera 2015 spisane wot:

Přez płót Běłeho domu skočił je muž we Washingtonje, jako prezident USA Barack Obama ze swójbu a hosćimi na zahrodźe thanksgiving swjećeše. Muž bě do chorhoje USA zawobaleny. Wobrónjeni zastojnicy słužby Secret Service, za wěstotu prezidenta zamołwići, su zadobywarja zajeli. Motiwy muža njejsu znate. Je to lětsa hižo třeći króć, zo je so něchtó přez płót na ležownosć Běłeho domu dóstał.

Darmotnu poliwku je Syričan Alex Assali na Berlinskim Alexanderowym naměsće potrěbnym rozdźělał. Wón chcyše so tak Němskej dźakować, zo je jeho jako ćěkanca přiwzała, kaž nowinarjam rjekny. 38lětny Assali bě hižo před lětami před režimom Assada ze Syriskeje ćeknył. Ze swojej­ akciju žněje tež w interneće wjele chwalby a připóznaća.

To a tamne (26.11.15)

štwórtk, 26. nowembera 2015 spisane wot:

Putnikam a turistam w Romje derje znaći jako staroromscy legionarojo předrasćeni mužojo dyrbja sej nowe dźěło pytać. Měšćanski prefekt Paolo Tronca je zakazał, so w historiskich drastach za pjenjezy fotografować dać. Legionarojo běchu stajnje zaso hněw zbudźeli, dokelž sej wot turistow dosć agresiwnje wjele pjenjez za fotografowanje žadachu. Tym, kotřiž to dale činja, hrozytej wysoka pjenježna pokuta a sćazanje kostima.

Tři měsacy po swojim dowolu je žona w sewjerorynsko-westfalskim Herfordźe w swojim bydlenju skorpiona wuhladała, kotrehož drje bě sej mylnje z dowola při Srjedźnym morju sobu přiwjezła. Po tym zo bě na sćěnje sedźace zwěrjo ze škleńcu popadnyła, zawoła policiju. Ta zwěsći, zo njeje skorpion strašny, wšako bě by­dlenje 47lětneje hižo tři měsacy jako nowe­ bydło wužiwał.

To a tamne (25.11.15)

srjeda, 25. nowembera 2015 spisane wot:

Lěto 2015 drje budźe najćopliše wot zahajenja zapisowanja. Přerězna temperatura bě lětsa prěni króć wo cyły stopjeń wyša hač w času do industrializacije kónc 19. lětstotka, zdźěla Swětowa organizacija za meteorologiju­ w Genfje. Hłownej přičinje stej wot čłowjeka zawinowana klimowa změna kaž tež fenomen El Niño, při kotrymž morjo wjele składowaneje ćopłoty zaso wotedawa. „Špatne to po­wěsće za planet“, fachowcy pišu.

Z ćahom ćeknył je sydomlětny hólčec w Berlinje. Při tym jědźeše kaž kóžde rano najprjedy z busom do šule. Tam pak sydny so wón do měšćanskeje železnicy a jědźeše hač do Frankfurta nad Wódru. Železnicarka so samolutkeho bjez přewoda dohlada a informowaše policiju. Wulět pachoła so zbožownje skónči, jako jeho staršej pola policije wotewzaštaj.

To a tamne (24.11.15)

wutora, 24. nowembera 2015 spisane wot:

18 kóčkow w 100 kwadratnych metrow wulkim bydlenju je přewjele a přičiny dosć za hnydomne wupowědźenje. Tole je Augsburgske hamtske sudnistwo rozsudźiło. Přenajer bydlenja bě podružnikej před štyrjomi lětami dowolił sej kóčku dźeržeć. Mjeztym pak so sobuwoby­dlerjo wjaceswójbneho domu přiběrajcy hóršachu, předewšěm smjerda kočich powostankow na schodźe domu dla.

Slědy w sněze su policistow runu smuhu k paduchej wjedli. 28lětny bě so w nocy na póndźelu do jednoswójbneho domu w Lipsku zadobył. Susod tole wobkedźbowaše a alarmowaše policiju. Ta trjebaše jeno stopy w sněze slědować a paducha zaja, jako chcyše tón ćeknyć. Při sebi měješe telefony, kompjuter a kameru. Wobsedźerjo domu spachu.

To a tamne (23.11.15)

póndźela, 23. nowembera 2015 spisane wot:

Štyrjoch wopačnych policistow su w Berlinje lepili. Wulcečinjacy w starobje 28 do 33 lět jědźechu w nocy na sobotu z módrej swěcu a sirenu po měšćanskim dźělu Friedrichshain. Při tym přesćahnychu awto z ciwilnymi zastojnikami, po­kazujo jim policajsku machawku. Zastojnicy wšak jich přesćěhachu a z pomocu kolegow zadźeržachu. Pola 33lětneho šofera zwěsćichu 1,8 promilow alkohola. Awto njebě zawěsćene.

Z pomocu bagra su rubježnicy w durinskim Münchenbernsdorfje spytali, pjenježny awtomat rubić. Wjaceswójbny dom, w kotrymž je wotnožka banki zaměstnjena, pak njeznaći při akciji w nocy na njedźelu chětro wobškodźichu z bagrom, kotryž běchu do toho w twarskej firmje pokradnyli, spotorhachu wukładne wokno a dźěl fasady. Pjenjezy pokradnyć pak so jim njeporadźi. Wostajichu bager tuž wosrjedź dróhi stejo a ćeknychu. Dom njeje hižo wužiwajomny.

To a tamne (20.11.15)

pjatk, 20. nowembera 2015 spisane wot:

Tež we Vatikanje so pomału na hody přihotuja. Wčera su tam z kranom 25 metrow wysoku jědlu postajili, dar bayerskich gmejnow Hirschau, Schnaitterbach a Freudenberg. Jědla budźe wudebjena z pisanymi keramiskimi kulemi, kotrež dźěći w italskich chorownjach zhotowjeja. Hoberski žłobik na Pětrowym naměsće je dar awtonomneje prowincy Trentino w Italskej.

W Botswanje su po informacijach kanadiskeho hórniskeho předewzaća druhi najwjetši dejmant swěta nadešli. Droho kamjeń waži 1 111 karatow a ma wulkosć tenisoweho bula. Je to najwjetši namakany dejmant minjenych sto lět. Najwjetši dotal znaty dejmant namakachu 1905 w Južnej Africe pola Pretorije. 3 106 karatow ćežki kamjeń bu dźěleny a słuša nětko k juwelam britiskeje króny kralowny Elisabeth II.

To a tamne (19.11.15)

štwórtk, 19. nowembera 2015 spisane wot:

W Indiskej nima 774 milionow ludźi přeco hišće porjadny nuznik. Bychu-li so tući w rynku nastupili, by tutón hač na měsačk sahał. To wozjewi swětowa pomocna organizacija Water Aid k dźensnišemu swětowemu dnjej nuznikow. Pobrachowacych nuznikow dla přenjesu so w Indiskej mnohe chorosće. Po zdźělenju organizacije Water Aid wumrje lětnje 140 000 dźěći na sćěhi chorosćow, wuchadźacych z njedosahacych hygieniskich poměrow.

Lochko mějachu so policisća w Hildesheimje při pytanju za paduchom. 31lětny zawostaji njewotpohladnje mjeno a adresu na městnje njeskutka. Po tym zo bě 81lětnu starušku nadpadnył, twochny z kolesom. Při tym zrazy pak do latarnje. Jako padny, wusuny so jemu na njeho adresowany list. Tuž ćěkaše pěši dale. Policija jeho potom doma zaja.

To a tamne (17.11.15)

wutora, 17. nowembera 2015 spisane wot:

Wosebita funkcija mobilneho telefona, kotraž pokazuje, hdźe telefon runje je, je policiji při wujasnjenju padustwa pomhała. Paduch bě na Dortmundskim hłownym dwórnišću drohi smartphone z kabata sobujěduceho pokradnył, jako tón spaše. Swědk na nastupnišću tole wobkedźbowaše, wubudźi muža a za­woła policiju. Ta zwěsći, zo sedźi paduch z kradnjenym telefonom w regionalnym ćahu. Tam zastojnicy 26lětneho zajachu. Smartphon wobsedźerjej wróćichu.

Hnydom trójce je zwjazkowa kanclerka Angela Merkel tele dny w kabineće wóskowych figurow Madame Tussauds w Berlinje widźeć. Tak dokumentuja politikarku CDU w čornym wobleku při prěnim spřisahanju za zwjazkowu kanclerku 22. nowembra 2005, štyri lěta pozdźišo ze styknjenymaj rukomaj a lěta 2013 z dźensa typiskim dźerženjom rukow.

To a tamne (16.11.15)

póndźela, 16. nowembera 2015 spisane wot:

Alarmowak kura dla je w Mecklenburgsko-Předpomorskej wohnjowu woboru k plantaži konopja wjedł. Susodka bě w Stargardźe alarmowak słyšała a wohnjowu woboru wołała, kaž policija zdźěli. Dokelž njebě wobsedźer bydlenja doma, dyrbjachu wobornicy durje namócnje wočinić. Na to cannabisowu plantažu z dźesatkami rostlinow wuhladachu. Horca tepjenska lampa bě drje alarmowak aktiwizowała. Policija rostliny sćaza.

Ze spěšnosću 160 km/h je muž na wonkownym schodźenku ćaha sobu jěł. Muž bě minjeny štwórtk na Stuttgartskim hłownym dwórnišću hišće cigaretu kurił, jako ćah, w kotrymž bě wačok muža, wot­jědźe. Zo njeby swoje wěcy přisadźił, skoči muž na schodźenk hižo jěduceho ćaha. Hakle po 21 kilometrach ćah zasta, po tym zo běchu swědkojo zwažliwu akciju wobkedźbowali a policiju zazwonili.

To a tamne (13.11.15)

pjatk, 13. nowembera 2015 spisane wot:

Wobličo za słónčnym škitom schowane a čisłowu tafličku z nowinskej papjeru zawodźětu měješe 26lětny roznošowar pizzy, jako je z awtom w Dortmundźe z 55 km/h na dróze z dowolenymi 30 km/h do radaroweje kontrole jěł, pokazujo srjedźny porst. Fachowcy pak móžachu na foće z pomocu lupy na zadnim woknje awta mjeno firmy spóznać, za kotruž 26lětny dźěłaše. Nětko hrozytej jemu bolostna chłostanka a dypk.

Třilětny hólčk je we Wiesbadenje sam z busom sobu jěł. Na naměsće před dwórnišćom bě wón staršeju z wočow zhubił, na čož sam do čakaceho busa zalěze, kaž policija zdźěli. Kedźbliwej sobujěducej mały pasažěr napadny. Wona dowjeze jeho na policiju. Ta informaciju wo zhubjenym hólčku hižo měješe.

nawěšk

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson

nowostki LND