To a tamne (23.06.15)

wutora, 23. junija 2015 spisane wot:

Nowe zasadźenje za stare policajske uniformy: Něhdźe 150 zelenych kombinowanych woblekow za motorskich su po naćiskach studentow modoweho designa z Hannovera na wjace hač 500 modernych tobołow předźěłali. Tak nastachu mjez druhim etwije za mobilne telefony, nachribjetniki a pućowanske to­boły. Delnjosakski nutřkowny minister Boris Pistorius (SPD) wudźěłki wčera prezentowaše, mějo je za „cool“. Toboły zhoto­wjeja w dźěłarni zbrašenych. Wunošk je za załožbu, kotraž dźěło zbrašenych podpěruje.

Prěni króć w swojich 117lětnych stawiznach chce Hamburgski wjesłowanski klub Germania nětko tež žonam zmóžnić do kluba zastupić, pišu Hamburgske nowiny. Nastorčiło wšak bě to měšćanske zarjadnistwo. Wone wjaza spěchowanske srědki za twar noweho kluboweho domu na tele wuměnjenje.

To a tamne (22.06.15)

póndźela, 22. junija 2015 spisane wot:

Miliony ludźi po wšěm swěće su so składnostnje wčerawšeho joga-dnja na zjawnych ćěłozwučowanjach wobdźělili. Jeničce w indiskej stolicy New Delhiju zhromadźi so po oficialnych informacijach 37 000 ludźi, štož chcedźa samo do Guinnessoweje knihi rekordow zapisać. UNO bě loni na namjet Indiskeje 21. junij jako swětowy dźeń jogi deklarowała. 5 000 lět stara filozofiska wučba polěkuje nutřkownej harmoniji čłowjeka kaž tež runowaze z přirodu.

Najdlěšu pizzu swěta su w Italskej napjekli. 80 kucharjow bě so sobotu na swětowej wustajeńcy w Milanu zhromadźiło, zo bychu 1,59 kilometrow dołhu a pjeć tonow ćežku pizzu margheritu spřihotowali. Zastupnik Guinnessoweje knihi nowy­ swětowy rekord wobkrući. Titul za najdlěšu­ pizzu měješe dotal Španiska z 1,1 kilometrom. Za italsku pizzu trje­bachu nětko 2,5 tonow muki, 1,7 tonow mozzarella a 1,5 tonow tomatow.

To a tamne (19.06.15)

pjatk, 19. junija 2015 spisane wot:

Dlěje hač tydźeń je swójba z Hornjeje Frankskeje na popjelnicu zemrěteho nana čakać dyrbjała, dokelž Němski póst stawkuje. Paket z popjelnicu bě w centralnej rozdźělerni w bayerskim Neun­kirchenje am Brand ležo wostał, dokelž jenož jedyn z cyłkownje 14 póstownikow dźěłaše. Dźensa dopołdnja su popjelnicu pře­podali. Wotpósłali běchu ju srjedu tydźenja­ njedaloko Lipska.

Kupać so kaž w 19. lětstotku móža so ludźo wot dźensnišeho na biedermeierskim přibrjohu Schladitzskeho jězora njedaloko Lipska. Tamniše pobrjóžne towarstwo chce wječor lětnje zawjeselenje zahajić. Nimo kupanja poskića na přibrjohu tež koncerty a reje. Dźensa wočakuja tam wosebiteho­ hosća: Tež sakski premier­ Stanisław­ Tilich (CDU) chce sej kupanje w biedermeierskej modźe wobhladać.

To a tamne (18.06.15)

štwórtk, 18. junija 2015 spisane wot:

W kupnicach žiwidłow na wustup hić ma přichodnje w Berlinje móžno być. Senator­ za wuwiće Andreas Geisel (SPD) chcył kupnicy nuzować, wustupy zjawnosći spřistupnić. Rjadowanje płaći spočatnje jeno za nowe kupnicy, poněčim pak chcedźa tež wobstejace zapřijeć. Hłowna přičina je přiběraca ličba starych ludźi w měsće. Za nich nimaja tuchwilu dosć zjawnych nuznikow.

Torty debić je wuměłstwo. To je Lübe­ck­ske hamtske sudnistwo rozsudźiło. 47lětna designerka tortow njetrjeba tuž pokutu čornodźěła dla płaćić, dokelž bě bjez dowolnosće rjemjesło wukonjała. Kaž sudnistwo zwěsći, je zhotowjenje indiwidualnych motiwow za debjenje torty kreatiwny wukon, kotryž normalne dźěło konditora přesahuje. Rjemjeslniska komora bě designerku čornodźěła dla wobskoržiła (hlej wčerawše SN).

To a tamne (17.06.15)

srjeda, 17. junija 2015 spisane wot:

Padušne wróny su w japanskim měsće Matsue zasadźenje policije zawinili. Tamniši wobydlerjo běchu so na policajskim rewěrje stajnje zaso hóršili, dokelž něchtó woknotrějaki parkowacych awtow kóncuje, kaž nowiny rozprawjeja. Na to zasadźi policija na wšě 50 zastojnikow, zo bychu mysteriozne njeskutki wujasnili. Z pomocu nastajenych kamerow woni zwěsćichu, zo wróny gumi trějakow rady za twar swojich hnězdow wužiwaja.

Je tortu debić rjemjesło abo wuměłstwo? Wo tym jednachu dźensa na Lübeckskim hamtskim sudnistwje. Město bě tortowej designerce chłostanku napołožiło, dokelž wona rjemjesło konditora wukonja, byrnjež na lisćinje rjemjeslnikow zapisana njebyła. Žona pak ma so za wuměłču a chłostanku wotpokaza. Nětko dyrbi sudnistwo rozsudźić.

To a tamne (16.06.15)

wutora, 16. junija 2015 spisane wot:

W měšćanskich wodomjetach a studnjach so kupać abo nic – wo tym so tuchwilu w morawskej stolicy Brnje wadźa. Mnozy so tam na horcych dnjach rady wočerstwjeja. Měšćanska policija pak kupanje w studnjach zakazuje. Nětko chcedźa w měšćanskej radźe wo tym wuradźować a naležnosć wotpowědnje rjadować, kaž morawske nowiny pisaja.

Spěwanje honača w Kamjeničanskej coologiskej zahrodźe je peticiski wuběrk Sakskeho krajneho sejma zaběrało. W susodstwje bydlacy muž bě so wospjet hary dla hóršił, kaž z rozprawy wuběrka wuchadźa. Tónkróć so muž nócneho spěwanja honača dla mjerzaše. Hižo do toho bě so na pawy a wopicy hóršił. Peticiski wuběrk jemu wotmołwi, zo wšak móže pola někotrych zwěrjatow hač do sto decibelow hary nastać. Přiwšěm so ze zwěrjencom dojednachu, honače jenož hišće wěsty čas pod hołym njebjom dźeržeć.

To a tamne (15.06.15)

póndźela, 15. junija 2015 spisane wot:

Před policajskej stražu w bayerskim Coburgu­ je 22lětny za pruwowanje jězbneje šule zwučował. Po informacijach policije bě jemu 25lětny swoje awto w nocy na sobotu za to přewostajił. Zastojnikam napadny njewěste jězdźenje. Při kontroli woni zwěsćichu, zo bě muž bjez jězbneje dowolnosće po puću a zo mě­ješe 1,3 promile alkohola w kreji. Ze skóržbu­ ličić dyrbi 22lětny alkohola a jězdźenja bjez dowolnosće dla a 25lětny, dokelž­ bě jemu­ to zmóžnił.

Tola hišće přizjewił je so dobyćer 14 milionow eurow w loteriji. Jedna so wo 49lětneho přistajeneho z hornjeje Frankskeje, kaž loterijowa towaršnosć zdźěla. Muž bě dospołnje přemóženy, jako wo sumje dobyća zhoni. Wón prawidłownje loteriju hraje. Dokelž pak wužiwa wjacore tydźenje płaćiwe lisćiki, traje zwjetša trochu dlěje, prjedy hač ličby přirunuje.

To a tamne (12.06.15)

pjatk, 12. junija 2015 spisane wot:

Bjezdźěłny? Čehodla njestanješ so to ze zaprajerjom? Nižozemski dźěłowy zarjad płaći bjezdźěłnym wukubłanje na „spi­rituelneho telefoniskeho poradźowarja“. Sydom bjezdźěłnym su za to dotal wot­po­wědne pjenjezy wupłaćili, kaž rěčnik zarjada nižozemskemu rozhłosej wobkrući. Priwatne předewzaće zajimcow za něhdźe tysac eurow nawuči, kak maja z kartow čitać abo dóńt čłowjeka w škleń­čanej kuli spóznać. Tež reinkarnaciju – wožiwjenje zemrětych – tam poskićeja.

Na wšě 15 wosobow w jednym awće je policija při kontroli w Badensko-Württembergskej zwěsćiła. Dźesać dorosćenych a pjeć dźěći běchu po puću do Španiskeje, zo bychu tam na žnjach pom­hali. Zastojnicy policije klučiki awta sćazachu, dokelž běchu 35lětneho šofera a jeho sobujěducych hižo dźeń do toho zadźerželi a jim dalejězbu zakazali.

To a tamne (11.06.15)

štwórtk, 11. junija 2015 spisane wot:

Tak mjenowany čorny dźěłaćer je spytał swojeho šefa na hłownym cłownym zarjedźe wozjewić. Twarski dźěłaćer bě někotre tydźenje na wšelakich twarnišćach zasadźeny, njedóstawaše pak žanu mzdu. Zastojnicy wšak zwěsćichu, zo nima 34lětny scyła dowolnosć přebywanja w Němskej. Nětko­ ma kraj najspěšnišo wopušćić. Šef pak změje so ilegalneho přizwolenja dźěła dla zamołwić.

Jako slepy pasažěr bě 22lětny z nakładnym ćahom w Bayerskej po puću. 22lětny chcyše z awtami nakładowany ćah wužiwać, zo by wot Mnichowa do Strasbourga jěł. Lokomotiwnik młodeho Texasčana po něhdźe hodźinje jězby blisko Augsburga wuhlada, zadźerža ćah a přepoda młodźenca policiji. Muž njebě wopity a njesteješe tež pod drogami. Wón přizna, zo bě w Mnichowje na ćah zalězł. Nětko čaka na njeho pokuta.

To a tamne (10.06.15)

srjeda, 10. junija 2015 spisane wot:

Sławny orchestrowy nawoda James Last je njeboh. Hudźbnik zemrě wčera 86lětny w Floridźe (USA). To zdźěli dźensa­ w Berlinje wjelelětny zarjadowar jeho koncertow Semmel Concerts. James Last bě w kruhu swójbnych po krótkej, ćežkej chorosći wumrěł. Jako wunamakar „happy­ partysounda“ w bigband-­for­maće­ bě wón jedyn z najwuspěšnišich orchestrowych­ nawodow po wójnje. Miliony­ tačelow a CDjow je Last předał.

Krótke drěmnjenčko za wodźidłom traktora měješe wčera za 18lětneho w Vogtlandskim wokrjesu zahubne sćěhi. Sekundoweho spara dla wón do štoma prasny, kaž policija w Zwickauwje informuje. Při tym so mjez druhim tank traktora torhny, wolij a diesel wuběžeštej do přirowa. Wohnjowa wobora dyrbješe přijěć a jej zrumować. Nastatu wěcnu škodu trochuja na 20 000 eurow. Koče zbožo za traktorista bě, zo so njezrani.

nawěšk

nowostki LND