To a tamne (07.10.21)
Agresiwny šofer nakładneho awta by na awtodróze A7 pola Fuldy bjezmała dwě njezboži zawinił. Najprjedy je spytał dalše jězdźidło z jězdnje stłóčić. Na to zasta prěki přez wšě čary, wulěze z Lkw-ja a pokaza tamnym šoferam nahi zadk. Dale jěducy by nimale dalše awto z dróhi stłóčił, te pak móžeše so jemu hišće runje tak wuwinyć a na parkowanišćo wotjěć. Policija 39lětneho skónčnje zadźerža, a tón ma so nětko wjacorych přeńdźenjow dla zamołwić.
Leopard na zahrodźe je policiju w Münsterlandźe zaběrał. Znajmjeńša přizjewi to wosoba, kotraž bě nuzowe čisło woliła. Jako zastojnicy na zahrodu w Stadtlohnje přińdźechu, tež woprawdźe za tym wupadaše. Kaž so wukopa, pak jednaše so wo rubježnu kóčku z mjenom serwal. Fachowc zwěrjo skónčnje popadny.
To a tamne (06.10.21)
Dokelž njebě 13lětny do šule přišoł, je jeho kubłanišćo póndźelu rano w delnjofrankskim Oberstreuju policiju informowało. Zastojnicy podachu so tuž k swójbje, hdźež jim nan powědaše, zo njebě syna z łoža dóstał. Kaž so wukopa, bě so tón hač do nocy widejowym hram wěnował a njebě wězo hišće wuspany. Policija tuž chutne słowčko z hólčecom porěča, a nan jeho na to do šule dowjeze.
Zo maja we Wulkej Britaniskej wulke ćeže z personalom w logistiskim wobłuku, bě minjene tydźenje wobkedźbować. We wjele wobłukach je jara mało fachowcow, předewšěm w předźěłanju mjasa mnozy rěznicy pobrachuja. Tak maja burja swoju lubu nuzu swoje swinje zarězać dać. Ći prěni su tuž hižo započeli sami swój skót rězać. Rězarnje njemóža njedostatka fachowych dźěłowych mocow dla buram skót k rězu wotewzać.
To a tamne (05.10.21)
Pytanje za nóclěhom skónči so za muža we Würzburgu w celi policajskej straže. 49lětny bě na policajskej inspekciji prosył, jemu při pytanju za hotelowej stwu pomhać. Při kontroli personalijow so wukopa, zo předležitej wukazaj zajeća snadnych přeńdźenjow dla. Dokelž njemóžeše muž 3 000 eurow pokuty zapłaćić, tyknychu jeho do cele. Mjeztym je wón we Würzburgskim jastwje, hdźež ma přichodne 150 dnjow stwu sam za so.
Wjace hač 10 000 eurow pokuty dyrbješe turist z USA w bayerskim Garmisch-Partenkirchenje zapłaćić, zo by so jastwu wuwinył. Policisća běchu při kontroli šofera wosoboweho awta zwěsćili, zo je tón wopity. Zastojnicy zwěsćichu, zo předleži hižo z lěta 2019 wukaz zajeća přećiwo njemu, jako bě tež pjany z awtom jěł. 76lětny dyrbješe nětko 10 400 eurow wotzběhnyć a chłostanku zapłaćić.
To a tamne (04.10.21)
6 000 kwadratnych metrow wulku chorhoj Němskeje su parašutisća w sewjerorynsko-westfalskim Paderbornje w powětře rozpřestrěli a tak po informacijach zamołwitych swětowy rekordny pospyt wuspěšnje wobstali. Chorhoj bě w cyłej wulkosći widźeć, z čimž je so eksperiment radźił, a nětko móža jón do Guinnessoweje knihi rekordow zapisać. Parašutisća běchu z 3 500 metrow wotskočili a na lětanišću přizemili. Wětřik pak je chorhoj do bliskeho lěsa wotnjesł.
Na wulět po awtodróze A 9 pola durinskeho Eisenberga poda so wčera rano jack-russell-terrier. Psyca Bella bě při rańšej wuchodźowance swojemu wobsedźerjej twochnyła a wjacorych šoferow nastróžiła. Jedyn z nich na to na nuzowej čarje zasta, wza psa a přepoda jeho přiwołanym policistam. Woni móžachu Bellu njezranjenu wobsedźerjej wróćić.
To a tamne (01.10.21)
Ze zwažliwej akciju je muž w zwjazkowym staće USA Floridźe z wotpadkowym sudobjom krokodila popadnył. Něhdźe mjeńšinu trajacy widejowy clip wo podawku w městačku Mount Dora, 35 kilometrow sewjerozapadnje Orlanda, su wot wutory na twitteru mjeztym dźesać milionow króć nakliknyli. W nim je widźeć, kak so 26lětny z wočinjenym sudobjom na zemi aligatorej bliži a jeho skónčnje popadnje. Po tym běži muž přez dróhu a krokodila zaso pušći.
Z pomocu bananow su ze zwěrjenca ćeknjenu wopičku w porynsko-pfalcskim Rockenhausenje do paslow wabili. Makak „Udo“ bě před měsacomaj twochnył. Minjene dny bě wón stajnje zaso sad z balkona spakosćił. Tuž jemu direktor tam bananowe pasle nastaji, do kotrychž sej Udo zalěze. Kónc julija bě wón stpicu swojeje klětki wotzhibnył a so zminył.
To a tamne (30.09.21)
Do swobody pušćić chcychu w běhu dnja tři sorny, kotrež hižo tři dny na twarnišću noweho jastwa za młodostnych w Hamburgu-Billwerder žiworja. Zwěrjata běchu so prawdźepodobnje na ležownosć jastwa dóstali, jako dźěłaćerjo twarski płót nastajichu. Sorny su z nadosć picu a wodu zastarane. Hajnik chcyše dźensa płót wočinić.
Dospołnje putany wot napohlada hrodu Hohenschwangau je šofer sportoweho awta po schodźe pěškow dele jěł. Při tym wobškodźi 39lětny wjacore schodźenki. Škoda wučinja 3 000 eurow. Po powučenju policije móžeše šofer dale jěć. Hród Hohenschwangau steji w susodstwje hrodu Neuschwanstein w Bayerskej, kiž přiwabja kóžde lěto syły turistow.
Paducha rolera přelesćił je muž w bayerskim Fürthće. Njeznaty bě tydźenja wotstajeny roler pokradnył. Nan wobkradnjeneje holcy něšto dnjow pozdźišo zwěsći, zo poskićuja 180 eurow drohe dźěćace jězdźidło w interneće. Muž sej z poskićowarjom rolera termin dojedna a informowaše policiju. Kaž dojednane, přińdźe pozdatny paduch z rolerom k dojednanemu městnu, hdźež jeho policija wočakowaše. 14lětneho zajachu.
To a tamne (29.09.21)
Nimo lećaca tonuška je smalerja na sewjeru Francoskeje před pokutu škitała. „Maće dwě móžnosći tomu zadźěwać, zo was błyskač lepi“, piše policija k njewšědnemu podawkej w pobrjóžnym městačku Grègesu. „Pak dodźeržiće předpisanu spěšnosć, pak dyrbiće so na zbožo spušćić.“ K tomu wozjewi policija foto błyskača, na kotrymž křidło nimo lećaceje tonuški čisłowu taflu awta zakrywa. „Poručujemy skerje, nohu z płunoweho pedala wzać“, policija piše.
Swoju mać z awta wuzamknyła bě lěto stara holčka. Do toho bě mać w bayerskim Kreuzwertheimje dźěsću, kiž w awće sedźeše, klučik awta k hrajkanju přewostajiła. Při tym stłóči holca na kluč a zamkny tak awto wotnutřka. Přirěčowanje maćerje ničo njepomhaše. Skónčnje dyrbjachu wohnjowu woboru wołać. Wobornicy awto na to wotewrěchu.
To a tamne (28.09.21)
Bjez toho zo by to wědźała je 91lětna na balkonje starownje w bayerskim Krumbachu hašišowu rostlinu plahowała. Sobudźěłaćerka doma bě podhladnu rostlinu wuhladała a policiju informowała. Wobydlerka bě dospołnje překwapjena, dokelž mjeno rostliny ani njeznaješe a wo zakazu plahowanja ničo njewědźeše. Hižo dlěši čas bě wona ju lubosćiwje wobstarała. Zastojnicy trjebachu wjele sćerpnosće, doniž jim seniorka rostlinu njepřepoda. Wróćo wšak ju njedóstanje.
W hornjopfalcskim Nabburgu je šěsćlětny hólčec swojeho dźěda wuchował. 59lětny sej nohu pod připowěšakom zatłusny, po tym zo bě so ze słomu nakładźene jězdźidło powaliło. Wnučk bě njezbožo wobkedźbował a alarmowaše pěškow, kotřiž na lěkarja zazwonichu. Dźěda dowjezechu ze złamanej nohu do chorownje. Bjez wnučka by wěc drje hórje wušła.
To a tamne (27.09.21)
Z 867 kilogramow ćežkim kirbsom je plahowar na mišterstwach w braniborskim Klaistowje prěnje myto dobył. Na Berlinsko-braniborskim wubědźowanju bě so wčera po informacijach zarjadowarja 87 plahowarjow a zahrodkarjow z 95 kirbsami wobdźěliło. Nimale 900 kilogramow ćežki kirbs plahowarja Olivera Gräfeho z wokrjesa Łobjo-Halštrow wuznamjenichu z mytom „Atlantic Giant“.
45 000 eurow škody zawinował je 82lětny šofer wosoboweho awta z Berlina, po tym zo bě pedalej płuna a borzdźidła zaměnił. Kaž policija informuje, dyrbi rentnar nětko z tym ličić, zo jeho kmanosć wodźenja awta přepruwuja. Muž bě na Rujanach w Binzu z parkowanskeho domu přijěł. Dokelž dawaše přewjele płuna, zrazy do na dróze parkowaceho awta. Swědcy wobkedźbowachu, zo rentnar po zražce přeco hišće płun dawaše.
To a tamne (24.09.21)
Wokata sowa měješe z kałatym grotom swoju lubu nuzu, dokelž bě w nim z prawej pazoru wisajo wostała. Hakle wohnjowemu wobornikej so poradźi, ptaka z pasli wuswobodźić, za čož wužiwaše techniski nastroj. Chětro wosłabjenu sowu dyrbjachu na to do zwěrjećeje kliniki dowjezć, zo by so po tajkich stróželach zaso porjadnje zhrabała.
Swětowy rekord twarožkoweje pizzy chce Francoz Julien Serri nětko na zežiwidłowych wikach w Lyonje docpěć. Z pomocu regionalnych producentow chce wón pizzu z 1 000 družinami twarožka napjec. K tomu złožuje so jenož na domoródne družiny, z kotrychž maja hižo něhdźe 1 200. Narodny centrum za mlokowe hospodarstwo a dalši nazhonići fachowcy předewzaće Serrija wězo podpěruja. Wuslědk chce wón mjez wopytowarjemi wikow rozdźělić.
