Zakitowanski minister Pistorius směrnicy reformy předstajił

Berlin (dpa/SN). Ze změnjenej strukturu rozkaznistwa chce Zwjazkowa wobora swoje wojerske kmanosće polěpšić. Zakitowanski minister Boris Pistorius (SPD) je dźensa swoje rozsudy nastupajo reformu wójska předstajił. Zakład reformy ­běchu koncepty, kotrež předwidźa zhromadne operatiwne nawjedowanske komando za cyłe wójsko kaž tež štyri ­dźělne wotrjady: pozemske wójsko, lětarstwo, marinu a wotrjad za internet. To rěka, zo bychu sanitarna słužba, logistika, wojerska policija a wotrjad za chemiske, biologiske a atomarne wotwobaranje swoju dotalnu samostatnosć zhubili.

W nowembru lońšeho lěta bě Pistorius na schadźowanju Zwjazkoweje wobory swoje nowe zakitowanske směrnicy „Kmanosć k wójnje jako zakład postupowanja“ předstajił. Wodźacych generalow wón namołwješe, sej struktury wójska dokładnje wobhladać a analyzować. „Wobhladujće tole jako jasny přikaz!“, wón generalam rjekny. Pistorius chcył wosebje dwójne struktury wotstronić, kotrež so mjez sobu haća a blokuja.

Wulětnisku łódź z 1 500 pasažěrami je policija w přistawje španiskeje Barcelony zadźeržała. Na „Armonía“ je 69 boliwiskich staćanow bjez płaćiweho wizuma za Schengenski rum. Boliwičenjo twjerdźa, zo je jich agentura z falšowanymi dokumentami za Europu wobšudźiła. Policija na to tuka, zo chcychu ludźo z Južneje Ameriki jeničce do Španiskeje přińć. Doniž njeje naležnosć wujasnjena, dyrbi łódź w přistawje čakać.

Ze swojoraznym widejowym poselstwom w interneće skedźbnja dźěłarnistwo policije na pobrachowacu słužbnu drastu bayerskeje policije. „Kak dołho ty hižo čakaš?“, praša so zastojnik swoju koleginu, prjedy hač wobaj bjez cholowow z policajskeho awta wulězetaj. Tuchwilu dyrbja policisća na 21 dźělow uniformy wjacore měsacy čakać. Wosebje fatalne je tole za nowačkow, dźěłarnistwo měni.

Wón bě posledni minister za kubłanje a wědomosć NDR w knježerstwje Lothara de Maizièra, sakski statny minister za wědomosć a wuměłstwo w kabineće Kurta Biedenkopfa a prezident Centralneho komiteja němskich katolikow: Prof. dr. Hans Joachim Meyer, kotry je ćichi pjatk 87lětny zemrěł.

Statne zrěčenje wo wutworjenju „Załožby za serbski lud“ 1998 kaž tež Sakski Serbski zakoń 1999 stej wusko z jeho mjenom zwjazanej. Posledni mjenowaše prof. Meyer při zapodaću naćiska do krajneho sejma „předewzaće zakonjedawarstwa z wosebitym wuznamom“. Zo ma so zakoń w němskej a serbskej rěči wozjewić, wotpowědowaše jeho wosebitemu charakterej. „Po dokładnym přemyslowanju je so statne knježerstwo k tomu rozsudźiło krajnemu sejmej namjetować, z tym wuzběhnjenjom, kotrež je z dobreje přičiny powšitkownje wustawje přewostajane, hódnotu toho zakonja a z tym zdobom česćownosć před našimi serbskimi wobydlerjemi podšmórnyć.“ Wuraz toho bě zdobom, zo bu Sakski Serbski zakoń před 25 lětami w Budyskim Serbskim muzeju ratifikowany.