Čěsko-serbsku sportowu wuměnu 54. raz přewjedli
Mjeztym 54. raz zetkachu so wot minjeneho pjatka do wčerawšeje njedźele w Ralbicach tamniši sportowcy a čěscy hosćo ze Spálenym Poříčí, městačka blisko Plzenja. Tež gmejna Ralbicy-Róžant a městačko Spálené Poříčí wudźeržujetej hižo 14 lět styki, a to z mjezsobnej wuměnu. Lětsa pak nastupi nowy starosta města Jindřich Jindřich (njestronjan) puć do Ralbic. Jindřich bu loni kónc lěta woleny a bě tuž nětko prěni króć oficialnje jako nowy měšćanosta Spáleneho Poříčí hósć we Łužicy. Znowa podpěrał bě wuprawu čěskich přećelow „Čěsko-němski fonds do přichoda“.
Po pjatkownym přijězdźe a wutrobnym witanju podachu so čěscy hosćo sobotu do Wochoz, hdźež su sej zhromadnje park błudźenkow wobhladali. Popołdnju wobdźělichu so w Ralbicach na swjedźenskim zarjadowanju „10 lět dorostowa wohnjowa wobora Ralbicy-Róžant“, we wobłuku kotrehož so mjez druhim dorost wubědźowaše. Přizamknyła je so zaso tradicionalna čěsko-serbska koparska hra.
Sokoł Ralbicy/Hórki –
TJ Sokol Spálené Poříčí 15:15
po třělenju jědnatkow (4:1, 5:5)