Za optimalny přihot na nowu hrajnu dobu podachu so koparjo Sportoweje jednotki Chrósćicy (SJC) kónc julija do treningoweho lěhwa w pólskej Raszowje. To je wjes w gmejnje Leśnica, kotraž je zdobom partnerska komuna Chrósćic. Koparjo SJC přebywachu tam mjeztym třeći raz.
Po tym zo běchu sej štwórtk, 25. julija, wječor 14 hrajerjow a trenarje do Pólskeje dojěli, startowachu pjatk po rańšim sporće a snědani z treningom. Na planje steještej dwě jednotce, jedna dopołdnja a jedna popołdnju. W dopołdnišej dźěłachu wobdźělnicy při horcych temperaturach wosebje na kondiciji, popołdnju zwučowachu wšelake hrajne formy. Wječor slědowaše hišće hra přećiwo mustwu z Raszowy, kotraž skónči so 2:1 za domjacych. Chróšćenjo mějachu w prěnim kaž tež w druhim połčasu dosć šansow, njezamóchu pak je wužić.