Jónkrótne, puć rubace, fascinowace – tak wopisuje so wotewrjenska swjatočnosć Olympiskich hrow 2024 w Parisu, z toho časa, jako buchu prěnje plany za wosebite zarjadowanje před třomi lětami wotkryte.

Wot 26. julija hač do 11. awgusta je Paris městno gigantiskeho sportoweho podawka. Francoska stolica je hižo třeći króć po 1900 a 1924 hosćićel – jenož London bě dotal runje tak husto městno přewjedźenja. Mjeztym, zo so zašłe hry 2021 w Tokiju wo lěto zapozdźichu, a pod koronowymi postajenjemi tež w dalokej měrje bjez přihladowarjow wotměwachu, wočakuja w Parisu zaso milionow wopytowarjow ze wšeho swěta.

Prěni raz njewotměje so wotewrjenska ceremonija znutřka stadiona, ale z čołmami na rěce Seine. Dźensa wječor přeměni so francoska stolica do gigantiskeho stadiona a do najwjetšeho sportoweho jewišća. Tradicionalna parada atletkow a atletow ćehnje w čołmach na Seine nimo najsławnišich Pariskich charakteristiskich znamjenjow.