Sněhakowy centrum Sugarloaf Mountain w sewjernych Apalachach USA sta so minjenu njedźelu z pupkom swěta trailowych běharjow. Serija XTERRA w trailowym marathonje a połmarathonje zwjedźe tu sportowcow ze wšitkich kontinentow swěta hromadźe, zo by swojich lětušich swětowych mištrow namakała. Tež Stefan Zarjeńk z Drježdźan bě po lońšej kwalifikaciji na XTERRA-wubědźowanju w Žitawskich horach přeprošenju do něhdźe 6 000 km zdaleneho Carrabasset Valley w US-staće Maine slědował. Sportowče a sportowcy z wjace hač 30 krajow so tam wubědźowachu. Trailowy marathon wotměwa so po njeasfaltowanych šćežkach w přirodźe.