Zwjazkowemu ministerstwu za kubłanje a slědźenje jako projekt namjetowany slědźenski wulkocentrum „Łužiska fabrika přichoda“ je wizija za cyły region a za jeho mjezami.
Hórnikecy (AK/SN). Tajki centrum ma nowe technologije za wobłuki woda, energija a zežiwjenje wutworić. To podšmórny sobuiniciator prof. Michael Stelter, w Fraunhoferskim instituće zastupowacy nawoda instituta za keramiske technologije a systemy, wčera w Hórnikečanskej Energijowej fabrice. „Je-li požadanje wuspěšne, móhł klětu w měrcu koncept předležeć. Nazymu 2022 móhli potom projekt zahajić, a to ze zazběhowej fazu třoch do pjeć lět. Ličimy z lětnym budgetom 170 milionow eurow. Dohromady 1 500 dźěłowych městnow (z wokolinu ličene 4 500 cyłkownje) móhło nastać“, prof. Stelter rozłoži. Wjesnjanostam, měšćanostam a zastupjerjam z hospodarstwa, slědźenja a zwjazkow předstaji wón projekt, za kotrymž steji 40 podpěrarjow. Za „Łužisku fabriku přichoda“ su so pod režiju Fraunhoferskeje towaršnosće Wysoka šula Žitawa/Zhorjelc, TU Drježdźany, TU Freiberg kaž tež Wysoka šula za techniku a hospodarstwo Drježdźany požadali.
Budyšin (CS/SN). Mjeztym štwórty króć běchu ludźo minjeny pjatk popołdnju na „pózdnju změnu“ přeprošeni. Je to wot Budyskeho měšćanskeho zarjadnistwa organizowana jězba, kotraž zmóžnja dohlad za kulisy wšelakich Budyskich zawodow. Někotre z cyłkownje dźewjeć čarow běchu spěšnje wuknihowane, tak tež čara čo. 6, kotraž wjedźeše mjez druhim k zhotowjerjej pisakow Edding a do Wulkodubrawskeho zawoda za graty prasowanskich wudźěłkow.
We Wojerecach tča wjelestronske hospodarske potenciale. Wuměnjenja za zasydlenje a infrastrukturu pak maja so dale polěpšić, zo bychu inwestorow do města wabili.
Wojerecy (AK/SN). „Mamy so hišće bóle zwičnjeć, přeco w dorěčenju z wokolnymi komunami. Mamy wodźacu rólu, a tejle zamołwitosći wotpowědujemy“, podšmórny wyši měšćanosta Torsten Ruban-Zeh (SPD) minjeny štwórtk, jako wopytachu sobudźěłaćerjo Helmholtzskeho slědźenskeho centruma Drježdźany-Rossendorf a Drježdźanskeje Techniskeje uniwersity Wojerecy, Lejno kaž tež Čornochołmčanski Krabatowy młyn.
„njumii“ rěkaja nowemu rjemjeslniskemu kubłanskemu centrumej w Drježdźanach. „Nastała je nowa domizna rjemjesła“, měnješe prezident Drježdźanskeje rjemjeslniskeje komory Jörg Dittrich na oficialnym přepodaću.
Drježdźany (SN/at). Metalotwarcy, elektrotechnikarjo, klempnarjo, drobnomechanikarjo a mechanikarjo za ratarske mašiny z cyłeje wuchodneje Sakskeje wuknu hižo wot lěta 2019 w jednym z najmodernišich wukubłanišćow Němskeje. Minjeny pjatk bu „njumii“ swjatočnje wotewrjene. Posrědkowanje fachoweje wědy njeje w kompleksu w Drježdźanach-Albertowym měsće na wěsty wobłuk wjazane. Kaž Jörg Dittrich rozłoži, „wuknu tu wukubłancy, rjemjeslniscy a mištrojo w samsnej měrje“. Runje tak móža sej šulerjo w praktikumach powětr rjemjeslniskich powołanjow wokoło nosa duć dać. Tež tajcy z wjelelětnymi nazhonjenjemi w swojej profesiji zhonja hódnu wědu za swoje wšědne dźěło. Zapřijaty zarjadowanski centrum je „městnosć zetkawanjow a za diskusije, kotraž bytostnje k wutworjenju měnjenjow w rjemjesle přinošuje“, je komorny prezident přeswědčeny.
Němska železnica je wčera w Choćebuzu nowe testowe polo za digitalnu techniku wotewrěła. Wone rozpřestrěwa so mjez delnjołužiskej metropolu, Halle nad Solawu na zapadźe a Niskej na juhu po třoch zwjazkowych krajach a ma wobdźělenym kónčinam perspektiwu po brunicowej dobje zmóžnić.
Choćebuz (SN). Wjetši klimowy škit, lěpše wodźenje wobchada z ćahami a mjenje hary, to wšo chce Němska železnica (DB) z digitalnej techniku docpěć, kotruž dyrbja testować. Zwjazkowy minister za wobchad Andreas Scheuer (CSU) rěčeše wčera w Choćebuzu wo „jónkrótnym projekće w Europje“, wo digitalnych wuhibkarnjach a kuplowanjach jako přikładach za planowane inwesticije. Z digitalnej techniku, na to skedźbni šef DB Netz Frank Sennhenn, hodźi so w padźe zapozdźenja za ćah po cyłej Němskej nowy jězbny plan wobličić a nahrawać. Po słowach braniborskeho ministra za infrastrukturu Guida Beermanna (CDU) je Łužica modelowy region za to, zasadźić inowatiwnu techniku na kolijach.