Koronapandemiju jako šansu wužiwać a čas zmysłapołnje wužiwać je hesło mnohich, kotřiž su sej něšto nowe předewzali. Tež serbscy hosćencarjo po tejle zasadźe jednaja.

Budyšin (CS/SN). Nanuzowanu korona přestawku wužiwataj mějićelej Budyskeho hosćenca „Wjelbik“ Monika Lukašowa a jeje mandźelski Tomaš, zo byštaj hosćenc přetworiłoj. Tak běchu sanitarne připrawy hišće na stawje kaž před 30 lětami. Nětko tam sobudźěłaćerjo Rječkec a Čornakec zawoda nuzniki dospołnje ponowjeja a za to tež nowe roły kładu. Nuzniki a honače budu potom bjezkontaktne. Bohužel, tak Tomaš Lukaš praji, dyrbjachu korony dla na přikład na myjadła wjele dlěje čakać hač planowane. Dale dóstanje hosćenc nowu přewě­trjensku připrawu. Stara pochadźeše z časa załoženja „Wjelbika“ a njeměješe žane filtry. Zatwar wužiwachu hnydom sobu za to, sćěny a wjerchi znowa wobarbić.

Hłowne wuslědki reprezentatiwneho naprašowanja łužiskeje ludnosće nastupajo strukturnu změnu, tež Łužiski monitor 2021 mjenowaneho, su znate (SN rozprawjachu). Prěni zjawny online-forum je wčera na najnowše detailowe wuhódnoćenja skedźbnił.

Kwětanecy/Budyšin (SN/at). Poprawne pozitiwne poselstwo lětušeho druheho Łužiskeho monitora mjenowaše sobuiniciator naprašowanja dr. Jörg Heidig fakt, zo je podźěl ludźi, kotřiž kónc wudobywanja brunicy wotpokazuja, po jednym lěće mjeńši hač tych, kotřiž jón podpěruja. Z tym njeběchu slědźerjo ličili, přizna dr. Heidig na wčera­wšim prěnim online-předstajenju Łužiskeho monitora.

Za wobsahi naprašowanja we wobłuku lětušeho Łužiskeho monitora staj iniciatoraj zaměrnje z měšćanostami a wjesnjanostami rěčałoj. Wo tym je wčera na online-předstajenju jedyn z njeju rozprawjał. Zdobom zwurazni swoju přesłapjenosć, zo njezdadźa so wuslědki naprašowanja nětko ani za komunalnych politikarjow ani za regionalnych planowarjow wulce zajimawe być. Někotrych z nich bychu dr. Jörg Heidig a jeho do projekta zakótwjene sobudźěłaćerki na wčerawšim zarjadowanju wočakowali. Zaćišć z njeho njeje tuž – hinak hač předležace dopóznaća – reprezentatiwny. Najebać to wostanje nadźija, zo so předewšěm komunalni politikarjo z předležacymi pozicijemi ludnosće nastupajo strukturnu změnu po kóncu wudobywanja brunicy zaměrnje zaběraja. Wospjet hižo w medijach citowana wulka zwjazanosć Łužičanow z domiznu jako připóznata lěpšina pak hłubšo tčace problemy, kaž na přikład niske mzdy, za­krywa. Axel Arlt

Berlin (dpa/SN). Drjewo, wocl a maćizny izolacije na twarnišćach přiběrajcy pobrachuja. „Dochadźa dale a bóle k twarskim zastatkam, dokelž dyrbimy na material čakać“, pisa fachowe zjednoćenstwo twar. Wot spočatka lěta začuwaja twarske zawody pandemije dla napjate połoženje na wikach surowiznow. Zwjazk namjetuje, zo měli so krajne knježerstwa z producentami twarskich maćiznow, z wikowanjom a twarskim hospodarstwom wothłosować. Wobmjezowanych transportnych móžnosćow a wulkeho naprašowanja z krajow kaž Chiny a USA dla tuchwilu twarske maći­zny pobrachuja. Prěnje twarske zawody su mjeztym krótkodźěło připowědźili. Twarske firmy maja nimo toho problem, zo njemóža hižo k wujednanym płaćiznam twarić a zo dyrbja přidatne kóšty same zwjesć. „Ličimy dale z přiběracymi płaćiznami, dokelž maja firmy wjele naprašowanjow na blidźe a njedostatk materiala płaćizny dale do wysokosće ćěri“, rjekny hłowna jednaćelka fachoweho zwjazka Manja Schreiner. Tak chcedźa přichodnje klawslu do zrěčenjow zaplesć, zo móhli přidatne kóšty dale dać.