Zelena Liga so nadal rozšěrjenju jamy a zašlahanju dróhi do wsy spjećuje

Miłoraz (JoS/SN/mb). Stawizny stareho Miłoraza so nachileja. Kónc lěta ma so nětk tež dróha mjeze wsu a Slepom za zjawny wobchad zawrěć. Nimale wšitcy wobydlerjo su mjeztym swoje nowe doma namakali. Jenož za horstku z nich, kotrychž domske w Nowym Miłorazu hišće dotwarjene njejsu, płaći wosebity status. Stary Miłoraz budźe wot klětušeho jenož hišće wot Mułkec přistupny. Wot žiweje wsy pak je lědma hišće něšto zwostało, wšako je koncern LEAG statoki něhdyšich wobydlerjow hnydom spotorhał. Zarjadniski zwjazk Slepo je w swojim hamtskim łopješku 25. septembra wozjewił, za móža so w běhu třoch měsacow znapřećiwjenja přećiwo planowanemu rozsudej, dróhu do Miłoraza za zjawnosć zašlahać, zapodać. Tole chce Zelena liga přichodnu póndźelu oficielnje činić, štož je René Schuster z wobswětoweje skupiny w Choćebuzu wčera Serbskim Nowinam wobkrućił.