Halowy turněr w Kulowje
Módro-běli z Kulowa zarjadowachu tež lětsa zaso halowy turněr za cyłki koparjow, kotřiž su starši hač 50 lět. Pódla běchu mustwa SJ Njebjelčicy, team Laubag (zakitowar pokala) a Módro-běli Kulow jako hosćićel.
W běhu hrow dóńdźe k wulkej spěšnosći, zajimawymi scenam a rjanym kombinacijam. Dołho za tym wupadaše, zo sej hosćićel prěni raz pokal wobchowa. Nawjedowanje 2:1 we wšo rozsudźacej partiji pak njemóžeše dźeržeć a kasěrowaše dwanaće sekundow do kónca přećiwo SJ Njebjelčicam po super kombinaciji přećiwnika 2:2. Prěnje městno zawěsćichu sej tuž Njebjelčenjo (7:5, 5 dypkow) před Módro-běłymi Kulow (4:4, 4 dypki) a teamom Laubag (3:6, dypk). Najlěpši kopar bě Andreas Sebastian (Laubag), najlěpši wrotar Hubert Mička (SJ Njebjelčicy) a najlěpši třělc wrotow za Kulow hrajacy Detlef Panic. Werner Müller
Wot apryla změja fanowe artikle
Budyšin (SN/JaW). Přebytk wobeju serbskeju wubrankow na 3. koparskich mišterstwach europskich narodnych mjeńšin w juniju w Južnym Tirolu je zawěsćeny. To rjekny nawoda přihotowanskeho wuběrka Marko Kowar wčera na nowinarskej konferency w Budyšinje.
Kóšty za přebywanje wobeju wubrankow financuja zwjetšeho dźěla ze spěchowanja Załožby za serbski lud. „Tež koparki a koparjo dyrbja swój podźěl ze swójskeje kapsy płaćić“, Kowar rozłoži. Zdobom su so za sponsorami rozhladowali a naprašowanja rozesłali. Někotři su hižo pomoc připowědźili. Tak je wokrjes Budyšin při přewjedźenju treningoweju lěhwow pomhał. Šustrec elektrofirma z Njebjelčic a předewzaće Ewag stej podpěru mjeztym hižo připowědźiłoj; a za muski cyłk su ze sportowym wuhotowarjom w zrěčenju dojednali, zo dóstanu drastu a dalše koparske wuhotowanje potuńšene. Rozmyslowali su tež hižo wo nahrudźnym wabjenju na trikotach, to pak sej zarjadowarjo po słowach Marka Kowarja njepřeja. Za mustwo koparkow chcedźa so hišće wo wuhotowarja prócować.
Wuslědki (04.02.16)
Wokrjesna wyša koparska liga
Póst Budyšin – Hnašecy 3:0 (2:0)
SJ Ćisk – Wachau4:1 (2:1)
Łuty – Wjelećin1:1 (0:0)
Rakecy – Kulow3:1 (1:1)
Kinspork – Ralbicy/Hórki 0:2 (0:0)
Chrósćicy – Połčnica0:3 (0:3)
1. Chrósćicy 17 42 : 13 44
2. Hory 17 49 : 10 39
3. Großröhrsdorf 17 45 : 28 32
4. Ralbicy/Hórki 17 37 : 17 30
5. Kumwałd 17 44 : 33 29
6. Póst Budyšin 17 42 : 36 27
7. Hnašecy 17 33 : 23 24
8. SJ Ćisk 17 34 : 33 23
9. Rakecy 17 30 : 29 23
10. Ramnow 17 31 : 37 23
11. Połčnica 17 31 : 27 22
12. Kinspork 17 34 : 32 18
13. Kulow 17 25 : 30 15
Wokrjesna koparska liga, stafla III
Sepicy – Njebjelčicy1:1 (1:1)
1. Ottendorf/Liegau 14 40 : 14 35
2. Frankenthal 14 43 : 23 34
3. Arnsdorf 14 37 : 15 28
4. Großnaundorf 14 44 : 20 26
5. Marijina hwězda 14 47 : 31 24
Volleyballisća SGB najlěpši we wuchodnej Sakskej
Mjez 16 startowacymi šulemi z wuchodneje Sakskeje na wubědźowanju „Młodźina trenuje za olympiju“, a to w štyrjoch starobnych skupinach, zaruči sej Serbski gymnazij Budyšin (SGB) we volleyballu wurjadne prěnje městno. Najmłódši hrajerjo wróćichu so z Kamjenca ze slěbornej a bronzowej medalju.
Kajki to zwjeselacy wukónc regionalneho wubědźowanja. SGB wudoby sej po lěće 2014 znowa čestne wopismo najlěpšeje šule wuchodneje Sakskeje w bulosportowej družinje volleyballu. Z dwěmaj złotymaj, dwěmaj slěbornymaj a jednej bronzowej medalju wobsadźi SGB ze 16 dypkami suwerene prěnje městno. Wutrobnu gratulaciju wšitkim holcam a hólcam serbskeho kubłanišća za grandiozny wuspěch.
K jara zwjeselacej cyłkownej bilancy přinošowachu minjeny štwórtk najmłódši volleyballisća SGB. W sportowni Kamjenskeho Lessingoweho gymnazija, hdźež wobdźěli so wosom šulerskich cyłkow z wuchodneje Sakskeje, wubědźichu sej holcy 5. do 7. lětnika slěbro, hólcy samsneje staroby bronzu. W turněrowej formje hraješe kóždy přećiwo kóždemu dwě dobyćerskej sadźbje.
Wulke zbožo z wjedrom měli
Sněhakowanske lěhwo w Bedřichovje wuspěšne
My wosom holcow a sydom hólcow 8. lětnika Serbskeje wyšeje šule Ralbicy mějachmy srjedź januara na sněhakowarskim arealu w Bedřichovje pola Libereca najlěpše wuměnjenja z wjedrom. Běchu to zdobom optimalne sněhowe poměry na alpinskich wotjězdach a čarach. Dny do sněhakowarskeho lěhwa běchu so tam wjacore centimetry sněha našli, tak zo móžachmy po dołhich čarach sněhakować a tež po wotjězdach na horje Malinovce. Do Bedřichova dóstachmy so z ćahom přez Žitawu do Libereca a dale z busom. To je najtuńša warianta, sej do sněhakowarskeho lěhwa do Čěskeje dojěć. Našu skupinu přewodźachu knjeni Bejmakowa, hłowny zamołwity sportowy wučer knjez Bejmak a knjez Wornar. Wšitcy starachu so wo naše derjeměće, organizowachu wukubłanje na sněhakach a je tež sami přewjedźechu. Nimo toho postarachu so wo spodobnej wječoraj w Liberecskej kupanskej hali a w Bedřichovskim bowlingowym centeru. Za to so jim kaž tež našim staršim na tymle městnje wutrobnje dźakujemy.Z dypkom spokojom
Zeleno-běli Sepicy – SJ Njebjelčicy 1:1 (1:1)
Zestawa hosći: Hahn – Deleńk, Pawlik, Kral, Hrjehor, Dubaw, Hommel, Šołta (46. Mjechela), Lejnart, Hanuza, Čornak (74. Ričel)
Po treningowym lěhwje a přihotowanskej hrě přećiwo Radworskim koparjam nastupichu Njebjelčenjo njedźelu k nachwatanskej partiji w Sepicach. W jich rjadach pobrachowachu Cyž (zranjeny), Haška a Hoelzel.
Hosćićel sej pokal zawěsćił
13. bulowa nóc ST Natwara Němske Pazlicy w sportowni při Kamjenskim lětanišću je so wo spodobnu kopańcu za něhdźe 60 wopytowarjow starała.
Dźesać zastupnistwam poradźi so w 26 hrach 93 wrotow. Turněr postajace cyłki běchu Jednota Radeberg, SJ Njebjelčicy a Natwar Němske Pazlicy. W finalu přesadźi so hosćićel jasnje z 3:0 přećiwo Njebjelčanskim koparjam. Dypkownje w 24 hodź. bě turněr Ü 35 zakónčeny a Uwe Tschacher prošeše na mytowanje. Najlěpši wrotar dnja bě Thomas Drexel (HZ Halštrow/Hlinowc), najlěpši kopar Frank Ričel (SJ Njebjelčicy), najlěpši třělc wrotow Thomas Borkenfeld (Jednota Radeberg) a hrajer z najwjetšej zasadźitosću Matthias Hartmann (Jednota Radeberg).
kónčny staw:
1. Natwar Němske Pazlicy
2. SJ Njebjelčicy
3. Jednota Radeberg
4. ST Běła/Cunnersdorf
5. HZ Halštrow/Hlinowc
6. Přećelski kruh DB
7. ST Marijina hwězda
8. Natwar Němske Pazlicy II
9. Lok Kamjenc
10. Stala Něm. Pazlicy Norbert Adler
Bojowniska testowa hra wo dypki
RB Lipsk II – FSV Budissa Budyšin 2:2 (1:1)
Zestawa hosći: Jakubov – Kolan, Klippel, Patka, Čermák, Hoßmang, Reher (73. Salewski), Heineccius (62. Rosendo), Kral (86. Heppner), Hansch, Walther
Budyšenjo nastupichu pola rezerwy RB Lipska. Cyłkaj stej so na koparski test dojednałoj, dokelž běštej hižo dwójce přećiwo sebi wo dypki wojowałoj. Hosćo startowachu z połnej paru. Hansch bu w šěsnatce foulowany, a Hoßmang jědnatku k 0:1 (5.) přetwori. Njetraješe dołho a hižo steješe 1:1 (12.). Hač do přestawki mějachu hišće někotre móžnosće na woběmaj stronomaj. Krótko po změnje třělichu Lipšćenjo 2:1 (49.). Hra bě dale jara bojowniska. Krótko do kónca poradźi so Waltherej 2:2 (88.). Clemens Werner
Poradźeny zazběh do 2. połserije
HZ Kinspork/Łužnica – Sokoł Ralbicy/Hórki 0:2 (0:0)
Zestawa hosći: Gloxyn – von Köding, Schultz, B. Bjeńš, Korjeńk, Wałda, Šołta, S. Bjeńš, Bejmak (82. T. Bejma), B. Bejma, Domaška (80. Kurjat)
Po krótkej zymskej přestawce nastupichu koparjo Sokoła Ralbicy/Hórki pola postupnika Kinspork/Łužnica. Byrnjež doma ze 6:0 jasnje dobyli, běchu Sokoljo warnowani. W pokalnym kole běchu tam hižo dwójce podleželi. Kumštny trawnik w Kinsporku je mjeztym tak dodźeržany, zo mjenuja jón jenož hišće plastowa přestrjeń.
Poslednju testowu hru dobyli
FSV Budissa Budyšin – FK Teplice U23 4:0 (3:0)
Zestawa Budissy: Große – Heppner, Patka, Pfanne, Čermák, Hoßmang, Heineccius, Hansch, Kral, Salewski, Walther, Fröhlich, A. Jakubov, Reher, Rosendo, Klippel, Kolan, Hausdorf
Na testowu hru su so zamołwići z Budyšina a Teplic krótkodobnje dojednali, dokelž partija Budissy přećiwo Lok Lipsk wjedra dla wupadny. Bě to posledni test za Budissu, z pomocu kotrehož móžeše trenar Tomaš Henčl swojich chowancow pruwować. Wot wšeho spočatka regionalny ligist duel na kumštnym trawniku w Humboldtowym haju postajowaše. Prěnje wrota pak dachu na so čakać. Po někotrych wuwostajenych móžnosćach postara so Florian Hansch wo 1:0 (26.). Pjeć mjeńšin pozdźišo přetwori Martin Hoßmang foulowu jědnatku k 2:0. Přewaha Budissy bě dale jasnje spóznajomna a Hansch zwyši mjeńšinu do přestawki samo na 3:0.
Po přestawce Budissa pilnje dale nadběhowaše. Wrota pak docpě jenož Maik Salewski (62.). Tež Alexander Jakubov móhł hišće foulowu jědnatku k dalšim wrotam přetworić. To pak so jemu njeporadźi. Wosta tuž při wuslědku 4:0. Clemens Werner
