Dóstanu spěchowanje
Pančicy-Kukow. Za dalše saněrowanje Šule Ćišinskeho w Pančicach-Kukowje přepoda statny sekretar w sakskim kultusowym ministerstwje Herbert Wolff gmejnje zajutřišim přizwolenje za wjace hač milion eurow spěchowanskich srědkow. W srjedźišću steja twarske naprawy za wohnjoškit z wuchowanskimi pućemi a za strowotniski škit. Dohromady chcedźa 1,4 miliony eurow nałožić.
Z Litawskeje so nawróćili
Budyšin. Chór 1. serbskeje kulturneje brigady je so sobotu po 15hodźinskej busowej jězbje z wuprawy do Litawskeje nawróćił. Kaž je na wšěch dlěšich busowych jězbach z wašnjom, spěwachu brigadnicy zahoriće pod přewodom instrumentow. Dźakowano darićelam a spěchowarjam ćělesa, organizatoram jězby a dirigentej Friedemannej Böhme mějachu woni wulke dožiwjenje.
Staćanstwo jednorišo dóstać
Budyski wokrjes přiwzaty
Choćebuz. Budyski wokrjes bu na wčerawšej zhromadźiznje towaršnikow towaršnosće Łužiski hospodarski region w Choćebuzu oficialnje, to rěka z wobkrućenjom notara, jako jeje čłon přiwzaty. Nětko dźěła wšitke sydom administratiwnych cyłkow zhromadnje za žiwjenjahódny a wuspěšny přichod Łužicy, kaž towaršnosć zdźěla.
Acubijowy tiket přińdźe
Drježdźany. Wot 1. awgusta budu sakscy wukubłancy tuńšo z busom a ćahom po puću. Sakske wobchadne zwjazki zawjedu z podpěru swobodneho stata acubijowy tiket. Kóždy powołanski šuler móže sej tajki kupić. Swobodny stat podpěruje iniciatiwu z něhdźe 14 milionami eurow wob lěto. Tiket płaći w lětnym abonemenće 48 eurow na měsac.
Olympiadu wuhódnoćili
Rada chce šulerjow podpěrać
Drježdźany. Sakska krajna staršiska rada je šulerjam za jich klimowu konferencu sobotu w Lipsku połnu podpěru přilubiła. Pozadk je pospyt 14lětneje šulerki, krajnej šulerskej radźe wobdźělenje na konferency zakazać. Chwatnu próstwu wo to na Drježdźanskim zarjadniskim sudnistwje bě šulerka stajiła, kotruž zastupuje prawiznik Joachim Keiler, wicepředsyda AfD w Sakskej. Sudnistwo dotal hišće rozsudźiło njeje.
Myto přichoda do Łutow
Drježdźany. Łutowska firma Witrinowy a škleńcotwar Reier tzwr je Myto přichoda 2019 Drježdźanskeje rjemjeslniskeje komory dobyła. Sakski ministerski prezident Michael Kretschmer (CDU) a prezident komory Jörg Dittrich staj je dźensa we wobłuku jeje lětnjeho swjedźenja přepodałoj. Witriny z Łutow wuhladaš na přikład w Pariskim Louvre.
Lěkarske zastaranje so polěpša
Łužiskej přinoškaj
Wrócław. Serbski ludowy ansambl pokaza we wobłuku festiwala Kalejdoskop kultur swój program „Naša duša“. Dalši łužiski přinošk je čitanje Měrany Cušcyneje a Měrćina Wjenka. Nimo kulturow narodnych mjeńšin je 20. róčnica załoženja regionalneho partnerstwa Sakskeje a Delnjeje Šleskeje ćežišćo swjedźenja, kotryž zajutřišim we Wrócławju zahaja.
Na wuprawje w Litawskej
Wilnius. Čłonojo chóra 1. serbskeje kulturneje brigady su sej we wobłuku swojeje wuprawy do Litawskeje wčera ortodoksnu cyrkej w stolicy Wilniusu wobhladali. Po wodźenju přewjedźechu pod hołym njebjom probu za dźensniši wustup. Popołdnju wopytachu Miłosćiwu madonu. Nawječor přebywachu w synagoze a zanjesechu tam jednu twórbu.
„Naša Domowina“ wušła
Druhi plan naprawow schwalili
Drježdźany. Sakske statne knježerstwo je dźensa druhi plan naprawow wobzamknyło, z kotrymž chce nałožowanje serbšćiny posylnić a wožiwić. Plan wopřijima dwanaće zaměrow z 21 předewzaćemi. Po słowach přisłušneje ministerki dr. Evy-Marije Stange (SPD) „dyrbi wšudźe znate a samozrozumliwe być, zo w Sakskej tež serbsce rěča“.
Bombu namakali
Baršć/Rogow. Znješkódnjenja bomby z Druheje swětoweje wójny dla dyrbješe dźensa něhdźe 1 500 ludźi w Baršću zawrjeny kruh nimale kilometra wokoło namakanišća wopušćić. 250 kilogramow ćežku bombu běchu wčera při twarskich dźěłach w měšćanskim dźělu Rogowje namakali. Ewakuacija měješe hač do připołdnja wotzamknjena być, a město chcyše naprawu hišće dźensa zaso zběhnyć.
Bydlenje wurumowane
Nowy měšćanosta wuzwoleny
Zhorjelc. Octavian Ursu (CDU) budźe přichodny wyši měšćanosta Zhorjelca. Wón je so na wčerawšich rozsudnych wólbach přećiwo kandidatej AfD Sebastianej Wippelej přesadźił, zdobywši 55,2 procentaj wotedatych hłosow. 56 procentow wólbokmanych bě so na wothłosowanju wobdźěliło.
Michauk nowy wjesnjanosta
Budestecy. Nowy wjesnjanosta gmejny Budestecy je 46lětny Markus Michauk. W rozsudnych wólbach doby wón wčerawše přidatne wólby z 66,5 procentami wotedatych płaćiwych hłosow přećiwo kandidatej CDU Norbertej Gloßej (33,5 procentow). Wólbne wobdźělenje bě 57,3 procenty. To je jasnje mjenje hač 26. meje z nimale 75 procentami.
Muzejopedagogiska dźěłarnička
Kamjenc Na prěnjej němsko-pólskej dźěłarničce „Praksy bliske kubłanske programy za šulske rjadownje – Móžnosće a hranicy“ pjatk w Kamjenskim Muzeju zapadneje Łužicy su so zajimcy z rjemjesłami zašłych lětstotkow zeznajomili. Wotmysł bě, „kulturnišćam a kubłanišćam přiležnosć skićić so zwjazać a jim zakłady komunikacije a modulow muzejopedagogiskich konceptow spřistupnić“.
Žurnalistiske myta přepodali
Wrócław. Lětušich lawreatow Němsko-Pólskeho žurnalistiskeho myta Tadeusza Mazowieckeho su wčera we wobłuku Němsko-Pólskich medijowych dnjow we Wrócławju počesćili. We wosebitej kategoriji „žurnalizm w pomjeznym regionje“ doby Małgorzata Jurgiel, Polskie Radio Szczecin, z přinoškom „Doma pólsce rěčimy“. W nim dźe wo nawuknjenje rěčow za zhromadny pomorski přichod.
Nowej dźěćacej knize wušłoj
Budyšin. Pod titulomaj „Findus a hara z honačom“ resp. „Findus a kokot-spiwarik“ stej w Ludowym nakładnistwje Domowina wušłoj knize dyrdomdejow po cyłym swěće znateho a woblubowaneho duwa Petterson a Findus. Šwedski original Svena Nordqvista stej Dorothea Šołćina do hornjo- a Madlena Norbergowa do delnjoserbšćiny přenjesłoj.
Posledni sněh w Kyrkonošach
Kapacity přepruwować
Kiel. W boju přećiwo lěsnym wohenjam wobstawaja nutřkowni ministrojo krajow na tym, zo Zwjazk swoje kapacity za hašenje z powětra přepruwuje. To wuchadźa z předłohi za wobzamknjenje, kotruž rozjimuje tuchwilna konferenca nutřkownych ministrow w Kielu. Předłoha powěsćerni dpa předleži. Kraje maja podpěru z helikopterami Zwjazkoweje wobory a Zwjazkoweje policije za rozsudne.
Słona woda na planetoidźe
Köln. Najwyša hora Ahuna Mons na planetoidźe Ceres w pasmje asteroidow je „jedna z najdźiwnišich strukturow našeho słónčneho systema“, rěka w zdźělence Němskeho centruma za lětarstwo a astronawtiku DLR. Objekt je „aktiwny wulkan, nastaty něhdy z erupcijow słoneje wody“. Dotal tajki fenomen wobkedźbowali njeběchu.
Modelowy region za strowotu
Škoda za předsydu wuzwoleny
Hochoza. Clemens Škoda předsyduje nowemu wuběrkej Zwjazkoweho předsydstwa Domowiny „Europeada 2020“. Jeho je wčera dźesaćčłonski gremij na skonstituowanju skupiny wuzwolił, zdźěla Domowina. Clemensa Škodu zastupuje Marcus Końcaŕ. Wuběrk ma serbskej mustwje žonow a muži za koparske europske mišterstwa narodnych mjeńšin-europeadu, kotraž wotměje so klětu pola Korutanskich Słowjencow w Awstriskej, zestajeć.
Zrěčenje na dobro najmjeńšich
Drježdźany. Zwjazkowa ministerka za swójby dr. Franziska Giffey (SPD) a sakski kultusowy minister Christian Piwarz (CDU) podpisataj jutře w Drježdźanach dojednanje wo zakonju „Gute Kita“. Zwjazk přewostaja krajam mjez druhim za dalewuwiwanje kwality při kubłanju dźěći w lětach 2019 do 2022 něhdźe 5,5 milliardow eurow, Sakska dóstanje z toho 269 milionow eurow.
Wjele pjenjez za pomnikoškit
Loni wjele mjenje rybow było
Kamjenc. Horcota a suchota stej plahowanje rybow w Sakskej loni jara poćežowałoj. Najwjetše problemy mějachu pstruhi a sajblinki, kaž statistiski krajny zarjad w Kamjencu zdźěla. Někotre akwakulturne zawody su samo dospołnu stratu poćerpjeli. 91 tonow módricy woznamjenja minus 40 procentow přirunajo z lětom 2017. Cyłkownje su loni 2 215 tonow jědźneje ryby naprodukowali.
Póńdźe wo škit před wulkej wodu
Frankenberg. Krajna zahrodna přehladka w Frankenbergu steji sobotu, 15. junija, w znamjenju škita před wulkej wodu. We wobłuku 2. tajkeho dnja hosćo zhonja, kak móža swoje domske přećiwo škodam wulkeje wody škitać. Tam předstaja wupokaz za prewenciju, na kotrejež zakładźe hodźi so wěstota twarjenjow nastupajo wulku wodu posudźować a polěpšić.
Češa lubuja „konjacy“ lěk