Zjawne wozjewjenje FUEN
Budyšin. Ze zjawnymaj listomaj swojeho čestneho prezidenta Hansa Heinricha Hansena a Mjeńšinoweje rady w Němskej, kotrejž njewotwisnosć FUEN a jeje angažement za demokratiju a čłowjeske prawa do prašenja stajitej, je so nowowuzwoleny prezidij FUEN předwčerawšim zaběrał. Prezidij je oficialne wozjewjenje wobzamknył, w kotrymž po słowach prezidenta Loránta Vinczeho „zranjenje swobody, demokratije, čłowjeskich prawow a prawostatnosće zasudźa“.
Čestnohamtskich počesćili
Drježdźany. Za wosebity angažement w kulturje je sakska kulturna ministerka Barbara Klepsch (CDU) wčera 27 čestnohamtsce skutkowacych počesćiła. Mjez wuznamjenjenymi su Gabriela Linakowa ze Serbskeje rejwanskeje skupiny Ćisk, Christa Heide z Kulturneje załožby Miłkečanski park a Klaus-Peter Rosenstengel z Wojerowskeje Kulturneje fabriki.
Trolejbusy so do Prahi nawróća
Za jenake wobchadźenje
Drježdźany. Sakska rada ćěkancow je wobchadźenje knježerstwa z ćěkanymi ze Syriskeje, Afghanistana a Iraka kritizowała. Tohodla je wjace solidarity z nimi trěbne, podobnje kaž ta napřećo Ukrainjankam a Ukrainjanam, kotřiž su domiznu ruskeje wójny dla wopušćili, wujasni Dave Schmidtke ze Sakskeje rady ćěkancow dźensa w Drježdźanach.
Hala wostanje zawrjena
Zły Komorow. Nazymu a w zymje wostanje jenička indoor-sněhakowanska hala Braniborskeje w Złym Komorowje energijoweje krizy dla zawrjena, rjekny nawoda tamnišeje šule za sněhakowanje a snowboard Thomas Köder. Smykanišćo za smykanje a lodohokej pak wotewru. Dotal dyrbjachu halu tež w lěću chłódźić, zo njeby hač do 50 centimetrow sylna lodowa woršta wottała. Nětko halu přetwarja, zo ju cyłe lěto chłódźić njetrjebaja.
Inspiracija z Němskeje
Helmut Rychtar njeboh
Budyšin. Serbski rozhłosownik Helmut Rychtar je póndźelu 80lětny w Drježdźanskej chorowni zemrěł, kaž serbska redakcija MDR dźensa informuje. 1977 bě započał jako rozhłosownik dźěłać, wot 1989 nawjedowaše Serbski rozhłós a 1992 sta so z nawodu studija MDR w Budyšinje. Zo mamy serbski rańši rozhłosowy program a Radijo Satkula je sobu jeho zasłužba.
Změny wustawkow přiwzate
Drježdźany/Budyšin. Hamtske sudnistwo Drježdźany je wšitke změny wustawkow Domowiny přiwzało a zapisało, kotrež bě wurjadna hłowna zhromadźizna serbskeho třěšneho zwjazka 3. junija w Choćebuzu wobzamknyła. To je předsyda Dawid Statnik čłonam zwjazkoweho předsydstwa a předsydstwam sobustawskich towarstwow a župow zdźělił.
Hanina medalja Geratej Róblej
Ličba protestowacych přiběra
Budyšin/Zhorjelc. Po informacijach policije je wčera znowa tójšto ludźi po cyłej Sakskej protestowało. W Budyskim a Zhorjelskim wokrjesu zwěsćichu něhdźe 5 000 wobdźělnikow. Předewšěm hladajo na energijowu krizu a stupace płaćizny we wšěch žiwjenskich wobłukach ludźo swoje njezrozumjenje zwuraznjeja. Protesty přewažnje měrnje wotběžachu.
Nowa čłonka přirady ECMI
Flensburg. Zastupowacu direktorku Instituta za slawistiku Pólskeje akademije wědomosćow prof. dr. Nicole Dołowy-Rybińsku su za čłonku přirady Europskeho mjeńšinoweho slědźenskeho centruma (ECMI) w Flensburgu powołali. Spočatk nowembra chce so gremij ze 17 čłonkow a čłonow z cyłeje Europy a Ameriki w Flensburgu schadźować.
Nahladny rozrost korona-padow
Pfeiffer wólby dobył
Zły Komorow. Nowy měšćanosta Złeho Komorowa je Andreas Pfeiffer. Kandidat CDU je wčera rozsudne wólby z nachwilnym wuslědkom 54,4 procentow hłosow dobył. Za kontrahentku Nadine Hönicke (SPD), kotraž ležeše w prěnim wólbnym přechodźe prědku, hłosowaše 45,6 procentow wolerjow. Pfeiffer je tež trěbny kworum 15 procentow wólbokmanych docpěł. Wólbne wobdźělenje wčera bě 38,5 procentow.
Nowe hudźbne widejo „Ta ćma“
Budyšin. „Ta ćma“ rěka nowe, wot soboty w syći wozjewjene serbske hudźbne widejo. Skupina Astronawt je je zhromadnje z orchestrom Serbskeho ludoweho ansambla (SLA), Milenu Wowčerjec a Lilom Handrijom produkowała. Twórba je w Korzymskej wuměłskej hali „Friese“ nastała a bu přez saksku wabjensku kampanju „So geht sächsisch“ spěchowana.
Dwurěčne kemše swjećili
Lawreatka je Annie Ernaux
Stockholm. Francoska spisowaćelka Annie Ernaux je lětuša lawreatka Nobeloweho myta za literaturu, kaž za renoměrowane wuznamjenjenje přisłušna Šwedska akademija wčera w Stockholmje wozjewi. Wona dostanje myto za „zmužitosć a klinisku wótrosć, z kotrejž korjenje, wocuzbnjenje a kolektiwne wobmjezowanja wosobinskich dopomnjećow wotkrywa“. Na lětušej přewšo potajnej „longlist“ za myto steješe 233 mjenow.
Blok E zaso přizamknjeny
Janšojce. Předewzaće Łužiska energija a milinarnje (LEAG) je 500 megawattowy blok E Janšojskeje milinarnje wčera we wobłuku zastaranskeje rezerwy zaso milinowej syći přizamknyło. Blok měješe wot oktobra 2019 za pad nuzowych situacijow w syći jako rezerwowa připrawa status wěstotneje hotowosće. Hladajo na aktualnu energijowu krizu smě pak přez nazymu a zymu zaso dźěłać.
Wosebite posedźenje
Festiwal z „Dnjom Ukrainy“
Choćebuz. Z 13 filmami z Ukrainy a třomi wo njej je wot Ruskeje nadpadnjeny kraj lětsa we wšěch sekcijach Choćebuskeho filmoweho festiwala sylnje zastupjeny. Mjez nimi wobdźěla so tři přinoški na wubědźowanjach. We wobłuku lětušeho 32. festiwala steji 11. nowember pod hesłom „Dźeń Ukrainy“. Na nim přizamknjetej so dwěmaj filmomaj rozmołwje režiserow z publikumom, dale stej podijowej rozmołwje planowanej.
Pječat EU za Picnjanskeho karpa
Brüssel. Picnjanski karp je w přichodźe z pochadowym pječatom EU škitany. Wón smě so podobnje kaž Champagner abo Błótowske kórki jenož we wěstym geografiskim regionje plahować. W konkretnym padźe je to Braniborska. Wo tym je Europska komisija wčera w Brüsselu informowała. Kaž dale rěkaše, wuznamjenja so mjaso Picnjanskeho karpa přez swój charakteristiski słód a aromatisku wóń.
AWO z wobhospodarku
Nowe filmowe myto
Choćebuz. Šula za delnjoserbsku rěč a kulturu je nowe filmowe spěchowanske myto „Akcija!“ we wysokosći dohromady 3 000 eurow za Łužisku filmowu přehladku na Choćebuskim filmowym festiwalu wupisała. Lětsa chcedźa najlěpši filmowy koncept wuznamjenić. Hač do 23. oktobra móža zajimcy ideje za maksimalnje 20 mjeńšin trajacy film zapodać.
Pěstowarska akcija zahajena
Budyšin. Smolerjec kniharnja je dźensa lětušu pěstowarsku akciju zahajiła. Kniharnica Stefanie Zänkerowa poda so do serbskich a dwurěčnych pěstowarnjow Hornjeje a srjedźneje Łužicy, zo by bohaty poskitk nakładnistwa na dźěćacych knihach a słuchoknihach pěstowarnjam a staršim předstajiła. Nowum je dwurěčny barbny skazanski zešiwk za staršich, z kotrehož pomocu móža sej z dźěćimi knižne wudaća zwuběrać.
Karel Čapek tabuizowany
Tež wo Slepom rozprawjeli
Mainz. Serbow, Slepjansku kónčinu a brunicu tematizowali su wčera w filmje „Wir bleiben! Jung. Ostdeutsch. Selbstbewusst.“ Mathiasa Kubitzy a Larsa Seefeldta, kotryž je sćelak ZDF składnostnje Dnja němskeje jednoty wusyłał. Dokumentacija, w kotrejž so tež Slepjanska fararka Jadwiga Malinkowa słowa jima, je w mediatece ZDF hač do 2024 přistupna.
Wjele padow wopodstatnjenych
Drježdźany/Wermsdorf. Wot kónc oktobra 2020 do nětka je 1 653 padow afriskeje swinjaceje mrětwy w Zhorjelskim, Budyskim a Mišnjanskim wokrjesu wopodstatnjenych. Dotal je so poradźiło, zo njeje chorosć na wobstatk domjacych swini přeskočiła, zdźěli sobotu sakska socialna ministerka Petra Köpping (SPD) na wotewrjenju wikow „hońtwa a wudźenje“ we Wermsdorfje.
W Hućinje přednošował
Jednohłósnje předsydstwo wolili
Budyšin. Towarstwo Přećeljo Smolerjec kniharnje je na swojej wčerawšej hłownej a wólbnej zhromadźiznje dr. Francej Šěnej znowa nawjednistwo zjednoćenstwa dowěriło. Za jeho naměstnicu wuzwolichu Měranu Cušcynu. Dalšej čłonaj předsydstwa staj Marka Maćijowa a Měrćin Wjenk. Róža Domašcyna bě so wospjetneje kandidatury wzdała. Wólby wotměchu so jednohłósnje.
Přichod je wobnowjomna energija
Choćebuz/Lipsk. Po předstawach koncerna Łužiska energija a milinarnje (LEAG) dyrbi we Łužicy najwjetši centrum za wobnowjomne energije nastać. Z wukonom sydom gigawattow móhli něhdźe štyri milionow domjacnosćow z „ekologiskej“ milinu zastarać, informowaše wčera nawoda předsydstwa LEAG Thorsten Kramer na wuchodoněmskim energijowym forumje w Lipsku.
Štwórta sakska „Slawiniada“