Policija (10.12.19)
Něhdźe tysac eurow škody
Nowa Wjes. Njeznaći su so minjeny kónc tydźenja do zawoda w Nowej Wsy pola Rakec zadobyli. Kaž policija zdźěla, wobškodźichu skućićeljo najprjedy groćany płót, zo bychu so na areal firmy na Hermančanskej dóstali. W běrowowym twarjenju přepytachu wšitke rumnosće. Spakosćili su po informacijach policije 600 eurow hotowych pjenjez, kluč za generatorowu budku kaž tež kapsnu lampu. 57lětny škodowany trochuje wěcnu škodu na něhdźe tysac eurow. Zastojnicy su wjacore slědy zawěsćili. Kriminalna policija pad nětko přepytuje.
Policija (09.12.19)
Frontalnje do so zrazyłoj
Delni Wujězd. Ćežke njezbožo sta so dźensa rano wokoło sedmich při wotbóčce na awtodróhu A 4 w Hornim Wujězdźe. Šoferka Toyoty ze směra Zejic chcyše na awtodróhu wotbočić, přewidźa pak z Wujězda přijěducy transporter. Jězdźidle zrazyštej frontalnje do so. Wodźerjow wobeju awtow dyrbjachu zranjeneju do chorownje dowjezć, wěcna škoda wučinja wjacore tysacy eurow.
Policija (06.12.19)
Škodu načinić chcyli
Budyšin. Worakawcy běchu tele dny w Budyšinje po puću. Kaž policija wčera zdźěli, su njeznaći w nocy na srjedu na Wjacławskich wikach winowu budku nadpadnyli. Z wulkim praskotakom chcychu płun w bleši zamiškrić. Při tym mějachu cyle jasnje wotpohladane, budku wobškodźić. Na zbožo so skućićelam njeporadźi někajku škodu načinić.
Policija (05.12.19)
Rozkora ze zranjenym
Wojerecy. Policisća dyrbjachu wutoru na Hasy Liselotty Herrmann we Wojerecach dweju muži změrować. 21 a 25 lět staraj mužej běštaj so chětro do włosow dóstałoj, młódši biješe samo z piwowej blešu do tamneho, tak zo dyrbjachu jeho zranjeneho do chorownje dowjezć.
Policija (04.12.19)
Podhladnych zwěsćili
Budyšin. Sakska policija je w zhromadnym dźěle ze zastojnikami z Čěskeje a Pólskeje móhła w naležnosći manipulowanych bankomatow w Budyskim a Zhorjelskim wokrjesu štyrjoch podhladnych zwěsćić. Wšitcy štyrjo su z wuchodnych krajow. Wumjetuja jim manipulaciju bankowych awtomatow w znajmjeńša 22 padach, zdźěla Zhorjelska policajska direkcija. Kaž wottam dale rěka, su wšitcy štyrjo skućićeljo po wšěm zdaću tež w Lipsku a we wjacorych městach Braniborskeje podobne njeskutki skućili. Policija tuž dale přepytuje.
Policija (03.12.19)
Dwě žonje na dróze zranił
Budyšin. Zo móže so jednora jězba njedźelu popołdnju z awtom tež njeluboznje skónčić, wo tym móža policisća zawěsće spěwčk spěwać. K zranjenju hnydom dweju žonow je slědowacy pad w Budyšinje wjedł. 43lětny muž bě předwčerawšim ze swojim awtom na Budyskej Serbskej hasy po puću. Kaž wón měnješe, pak je jemu na chódniku parkowace jězdźidło dweju žonow puć zaraćiło. Na to poča trubić, a tak dóńdźe k rozkorje mjez nim a žonomaj w starobje 30 a 35 lět. Tak biješe muž jenož jónu z pjasću do směra žonow, při čimž trjechi wobě w mjezwoču a jej lochce zrani. Zawołana policija přija přizjewjenje skóržby přećiwo łamarjej zakonjow a zawěsći slědy njeskutka, kaž w rozprawje pisa. Mjeztym je kriminalna policija pad přewzała a jón přepytuje.
Policija (02.12.19)
Cigaretowy awtomat rozbuchnyli
Sulšecy. Přewšo wótry wrjesk je wobydlerjow delnich Sulšec w nocy na sobotu něhdźe w dwěmaj ze spara torhnył. Kaž policija dźensa zdźěli, běchu njeznaći we wsy na twarjenju připrawjeny zjawnje přistupny cigaretowy awtomat rozbuchnyli. Kelko pjenjez móžachu ze swojej akciju spakosćić a kelko tyzow cigaretow su sobu wzali, dotal hišće jasne njeje. Kriminalna policija pad přepytuje. Kaž pak informuje, su skućićeljo z detonaciju awtomata wjacore tysacy eurow škody načinili.
Policija (29.11.19)
Šofer sej po wšěm zdaću wusnył
Koitzsch. K ćežkemu njezbožu je dźensa w nocy pola Koitzscha njedaloko Kamjenca dóšło. Z dotal njeznateje přičiny bě tam wodźer Opela na prawy bok z puća zajěł a frontalnje do štoma zrazył. Policija z toho wuchadźa, zo bě sej wodźer awta na někotre sekundy wusnył. Zawołani sanitetarjo zranjeneho šofera zastarachu a dowjezechu jeho na dalše lěkowanje do chorownje. Najskerje poměrnje wulkeje spěšnosće dla bě jězdźidło chětro wobškodźene. Wohnjowa wobora dyrbješe z awta wuběžane ćěriwo wotstronić, čehoždla bě dróha někotre hodźiny zawrjena. Policija móžnu přičinu njezboža nětko přepytuje.
Policija (28.11.19)
Wopity kradnył a z awtom jěł
Njeswačidło. Wutoru wječor je w Njeswačidle muž z terena firmy płunowe bleše spakosćił. Kedźbliwy wobydler to widźeše a zawoła policiju. W Čelchowje móžachu zastojnicy paducha krótko na to zajeć. W jeho awće namakachu šěsć prózdnych płunowych blešow. Alkoholowy test wunjese, zo měješe 44lětny 2,14 promilow alkohola w kreji.
Policija (27.11.19)
Šěsć awtow skóncowanych
Budyšin. Wodźer Renaulta bě wčera připołdnju na Budyskej Schliebenowej po puću, je pak z dotal njewujasnjeneje přičiny nalěwo z puća zajěł. Zhubiwši kontrolu nad wodźidłom zrazy wón z wulkim wotmachom do jězdźidła hladanskeje słužby. Te suny so do Peugeota, kotryž prasny na to do před nim stejaceho BMWja. Tón zrazy skónčnje do Seata a VWja. Wěcna škoda je hoberska.
Z garaže koleso pokradnyli
Nowa Wjes. W Nowej Wsy pola Rakec je wobsedźer trekingoweho kolesa hakle wčera rano zwěsćił, zo wone hižo w garaži njesteji. Paduši běchu elektriske wrota wočinili a jězdźidło w hódnoće 1 000 eurow sobu wzali. Z njejasneje přičiny na wrotach žana škoda njenasta.
