Dźěćo mylnje do awta zamknył
Budyšin. Po nakupowanju ze swojej třilětnej dźowku wróći so sobotu 33lětny muž w Budyšinje k swojemu awtu. Sadźiwši do toho holcu na jeje městno, połoži wón twory do wačoknika a wostaji tam tež kluč ležo. Začiniwši wačoknik so awto sekundy pozdźišo same wot so zamkny. W swojej nuzy zawoła muž policiju. Zastojnicy dojědźechu sej k jeho mandźelskej po rezerwowy kluč, tak zo móžachu dźěćo njezranjene „wuswobodźić“.
Gumijowy čołm pokradnyli
Wulke Ždźary. Na kotrym z łužiskich jězorow drje paduši swoju rubiznu wužiwaja? Z tymle prašenjom zaběra so policija we Wulkich Ždźarach, hdźež běchu sej njeznaći njewšědnu rubiznu wupytali. W nocy na minjenu srjedu přewinychu woni płót wokoło saněrowanskeje kónčiny Hórnikečanskeho jězora a dóstachu so tak na twarnišćo. Tam pokradnychu industrijowy gumijowy čołm, štyri padle a wonkowny motor. Škodu na skóncowanym płoće a hódnotu pokradnjeneho dźěłoweho gratu saněrarjow trochuja na dohromady 5 500 eurow. Kriminalna policija pad přepytuje a nětko najskerje při jězorach wosebje kedźbuje.
Kuchinski grat drohi był
Kamjenc. Před móžnymi wobšudnikami warnuje policija w Kamjencu a wokolinje. 89lětneho wobydlerja Lessingoweho města je zawčerawšim njeznaty muž narěčał a wudawał, zo chce jemu antikske meble za njemało pjenjez wotkupić. Popołdnju chcyše pjenjezy přinjesć. W běhu rozmołwy poskići njeznaty kófer z kuchinskim gratom, kotryž bě pječa jara drohotny a 700 eurow hódny. Rentnar jemu to wěrješe a nahladnu sumu na městnje zapłaći. Něšto hodźin pozdźišo, jako podarmo na muža čakaše, poča starc dwělować, hač bě wšitko prawje činił, a informowaše policiju.
Jězbny započatkar wopity był
Budyšin. Po wšěm zdaću z wulkej spěšnosću bě dźens w nocy jězbny započatkar w Budyšinje po puću. W dołhej lěwej křiwicy na Zeppelinowej zhubi wón něhdźe w 3 hodź. kontrolu nad swojim Opelom a zajědźe na prawy bok dróhi. Tam přełama najprjedy płót a so na to na dworje priwatneje firmy wjacekróć přećisny. Mjez někotrymi štomikami před železniskim mostom wosta dospołnje skóncowane jězdźidło na boku ležo. Ćežko zranjeneho 19lětneho šofera dyrbješe wohnjowa wobora z awta wućahnyć. Hladajo na to, kak demolěrowane wone bě, měješe młody muž zbožo, zo bě sam w nim. Dowjezechu jeho k lěkarskemu zastaranju do chorownje. Při kontroli běchu policisća zwěsćili, zo měješe muž 1,4 promile alkohola w kreji.
Muža z pokradnjenym awtom lepili
Budyšin. Na awtodróze A 4 njedaloko Budyšina do směra na Zhorjelc je policija wčera dopołdnja muža z pokradnjenym VW Touranom lepiła. Za awtom su hižo mjezynarodnje pytali, dokelž bu wone jenož něšto hodźin do toho w Erfurće pokradnjene. Za wodźidłom sedźeše 53lětny muž, kotrehož zastojnicy nachwilnje zajachu. Nětko pad bliže přepytuja.
Harley z garaže pokradnyli
Wojerecy. W času wot minjeneho štwórtka hač do soboty zadobychu so njeznaći do garaže blisko Wojerowskeje industrijoweje přestrjenje. Z njeje pokradnychu motorske typa Harley Davidson FXST z čisłom HY-T 29. Jeho wobsedźer bě mašinu z někotrymi přidatnymi dźělemi wuhotował, tak zo trochuja hódnotu jězdźidła na něhdźe 15 000 eurow.
Přespěšne před gymnazijom
Budyšin. Při kontroli před Serbskim gymnazijom je policija zawčerawšim spěšnosć měriła. Ze 403 měrjenych jězdźidłow bě nimale 20 přespěšne. Při dowolenych 30 km/h bě rekord 61 km/h.
Bydlenski připowěšak fuk
Budyšin. Najskerje hižo na dowol myslili su njeznaći, kotřiž zadobychu so na teren awtoweho domu na Budyskej Lubijskej. Tam pokradnychu swětły dowolowy bydlenski připowěšak typa Prestige. Nimo toho spakosćichu dwě kolesy wosoboweho awta Suzuki. Škoda wučinja nimale 4 000 eurow.
Pčolace ludy kradnyli
Hórnikecy. Njewšědnu rubiznu su sej njeznaći w Hórnikecach wupytali. Tam dyrbješe 73lětny pčołar zwěsćić, zo je jemu něchtó dźesać pčolacych ludow pokradnył. Wužitne insekty běchu w 50 króć 50 króć 50 centimetrow wulkich kołćach. Nastatu škodu trochuje rentnar na 2 000 eurow. Dale načinichu paduši 120 eurow wěcneje škody.