Policija (29.10.21)
Něchtó na bus třělił
Wulke Ždźary. Njemało stróžił je so předwčerawšim wječor něhdźe w 20 hodź. wodźer busa na Kobličanskej dróze we Wulkich Ždźarach. Wosrjedź jězby zasłyša 59lětny wutřěl pistole a samsny wokomik so jedne z woknow jeho busa rozbi. Přiwołana policija namaka w škleńcy wokna zatřělowu dźěru, kotruž kriminalni technikarjo bliže přepytowachu. Hač su tež projektil namakali, z policajskeje rozprawy njewuchadźa. Wěcna škoda wučinja něhdźe 2 000 eurow. Tónle pad přepytuje policija nětko přećiwo njeznatej wosobje pospytneho strašneho zranjenja ćěła dla.
Policija (28.10.21)
Awtomat rozbuchnyli
Budyšin. Cigaretowy awtomat na Budyskej Weinertowej su njeznaći we wčerawšich rańšich hodźinach rozbuchnyli. Pjenjezy a cigarety woni sobu wzachu a so do njeznateho směra zminychu. Hódnota rubizny njeje hišće doskónčnje zwěsćena. Wot swědka informowani wzachu policisća zbywace cigarety a skóncowany awtomat sobu.
Policija (27.10.21)
Tobak při puću ležał
Krušwica. Paket hrubeho tobaka je předwčerawšim popołdnju w Krušwicy policajske zasadźenje zawiniło. Swědcy namakachu paket při kromje puća, kotryž wjedźe k hraničnemu mostej, a informowachu policiju. Po wšěm zdaću bě paket z transportera abo nakładneho awta padnył. Kaž bě z nalěpka wučitać, jednaše so wo 33 kilogramow tobaka. Policisća wzachu wšitko sobu a informowachu swojich kolegow-cłownikow. Woni maja nětko nadrobniše wobstejnosće namakanki wuslědźić.
Policija (26.10.21)
Katalyzator pokradnyłoj
Běła Woda. Dźeń a časćišo so paduši na katalyzatory wosobowych awtow měrja. Najnowši tajki pad sta so předwčerawšim w Běłej Wodźe. Tam su njeznaći wot Mercedesa katalyzator a wot Audija wobě čisle pokradnyli. Hnydom alarmowana wobsadka policajskeho awta wuslědźi na to muži w starobje 25 a 31 lět. Při jeju Audiju A6 běštej spakosćenej čisle přičinjenej. W awće samym namakachu zastojnicy pokradnjeny katalyzator kaž tež wotpowědny grat. Policisća wšitko sćazachu a wzachu paduchow sobu na policajski rewěr. Tam jich z fotami a porstowymi wotćišćemi kriminalistisce registrowachu. Pad nětko dale přepytuja.
Policija (25.10.21)
Granatu namakali
Chrósćicy. Dźěći, kotrež sej sobotu připołdnju w Chrósćicach hrajkachu, namakachu na Puću měra jim njeznaty nastroj. Dokelž so jim metalowy objekt dźiwny zdaše, dowěrichu so wone na zbožo swojim staršim. Ći informowachu hnydom policiju. Najprjedy přijědźe wobsadka policajskeho awta, kotraž na to fachowcow za wotstronjene rozbuchadłow přiwoła. Eksperća wzachu 30 centimetrow dołhu granatu sobu.
Policija (22.10.21)
Kwětki kradnyć chcył
Běła Woda. Kwěćel je njeznaty muž předwčerawšim w Běłowodźanskim kwětkowym wobchodźe pokradnyć chcył. Předawarka jeho na parkowanišću před předawanišćom dosćahny a jemu kwěćel zaso wotewza. Paduch pak njepopušći a dźěše za předawarku wróćo do wobchoda. Jako chcyše wona na to policiju wołać, dóńdźe k rozestajenju z mužom. Swědka předawarce pomhaše, na čož njeznaty skućićel ćekny.
Policija (21.10.21)
Pod drogami njezbožo zawinił
Zdźěr. Při wobchadnym njezbožu předwčerawšim w Zdźěri je 21lětny zawinowar po wšěm zdaću pod drogami z awtom po puću był. Ze swojim Daciju jědźeše wón po Mužakowskim puću do směra na zwjazkowu dróhu B 156. Při tym njewobkedźbowaše předjězbu Hyundaja a do njeho zrazy. Při přepytowanju so wukopa, zo steješe młody muž pod wliwom konopje. Policisća jemu jězbnu dowolnosć nablaku sćazachu.
Policija (20.10.21)
Wo wjele pjenjez přišła
Kulow. Něhdźe 15 000 eurow wotknihowachu njeznaći wot konta Kulowčanki, kotraž sta so předwčerawšim z woporom wobšudnistwa po telefonje. Pozdatny sobudźěłaćer banki žadaše sej wot njeje tak mjenowanu TAN, zo móhł na jeje konće něšto zrjadować. Žona jemu tajne čisło přewostaji, pozdźišo pak zwěsći, zo pjenjezy na konće pobrachuja.
Policija (19.10.21)
Z pokradnjenym kolesom po puću
Wojerecy. We wčerawšich rańšich hodźinach kontrolowachu policisća we Wojerecach 36lětnu kolesowarku a jeje třoch muskich přewodźerjow. Při tym wopokazachu zastojnicy dobry čuch. Přetož za kolesom žony policija hižo pytaše, dokelž bě pokradnjene. Při dokładnišej kontroli wačokow třoch přewodźerjow namakachu hišće rozrězanej kolesowej zamkaj. Dokelž wobsteješe podhlad, zo běchu tež tamne kolesa kradnjene, zastojnicy groćane koniki sćazachu a přizjewichu to sudnistwu.
Do kulturneho domu so zadobyli
Biskopicy. Spodźiwnu njedźelnu zaběru wupytało bě sej pjeć młodostnych předwčerawšim w Biskopicach. Woni wočinichu zamurjowane durje kulturneho domu a zadobychu so do prózdneho twarjenja. Pasanća to wobkedźbowachu a wołachu policiju. Što su młodźi ludźo w domje chcyli, njeje znate.
Policija (18.10.21)
Na wopačnej čarje jěł
Słona Boršć. Dokelž je při jězbje do Drježdźan na wopačnej čarje jěł, je 22lětny muž z Pólskeje dźensa rano na awtodróze A4 wjacore wobchadne njezboža zawinił. Prěnju informaciju wo nim dósta policija z tunla pod Limasom. Na to spytachu zastojnicy muža zadźeržeć, štož pak so jim njeporadźi. Šofer nakładneho awta staji swój Lkw prěki přez jězdnju, tež to pak njeje wodźerja awta zadźeržało. Hakle mjez Słonej Boršću a Hornim Wujězdom zrazy wón do srjedźneho wobhrodźenja a wosta stejo. Zranjeneho 22lětneho dowjezechu z helikopterom do chorownje. Kaž so při prěnim přepytowanju wukopa, steješe młody muž pod wliwom drogow.
