Krótkopowěsće (09.11.18)
Serbski dźeń frakcijow Lěwicy
Budyšin. Zakładne rysy nowelěrowanja sakskeho serbskeho zakonja je zapósłanc krajneho sejma Hajko Kozel (Lěwica) na 14. serbskim dnju frakcijow Lěwicy w krajnymaj sejmomaj Sakskeje a Braniborskeje dźensa w Budyšinje předstajił. Trěbne nowelěrowanje zakonja z lěta 1999 su zdobom wobdźělnicy podijoweje diskusije analyzowali.
Wusyłanski čas rozšěrić
Berlin. Škit narodnych mjeńšin steješe w srjedźišću konferency zwjazkoweho nutřkowneho ministerstwa tón tydźeń w Berlinje. Zastupnicy Domowiny pokazachu tam mjez druhim na trěbnosć, rozšěrić čas serbskich wusyłanjow MDR a RBB, a na winowatosć Zwjazka a krajow, narunać straty předewšěm wotbagrowanja serbskich wsow dla. Rozjimali su tohorunja młodźinske dźěło narodnych mjeńšin Němskeje a dwurěčnosć na wobchadnych taflach při awtodróhach.
Předewzaćelske myto spožčene
Krótkopowěsće (08.11.18)
Seehofer přijědźe
Berlin/Budyšin. Zwjazkoweho nutřkowneho ministra Horsta Seehofera (CSU) wočakuja póndźelu na oficialne wotewrjenje zhromadneho slědźenskeho a kompetencneho centruma zwjazkoweje a sakskeje policije w Budyšinje. Sakski nutřkowny minister Roland Wöller (CDU) chce Seehofera přewodźeć.
Dalšu kandidatku nominowali
Mjedźojz. Patricia Wissel je we wólbnym wokrjesu 52 (Budyšin 1) znowa direktna kandidatka CDU za klětuše wólby Sakskeho krajneho sejma. 44 čłonow CDU je tuchwilnu zapósłanču na wólbnowokrjesnej zhromadźiznje wutoru w Mjedźojzu (Medewitz) ze 97,7 procentami přihłosowanja wuzwoliło. „Mi je wažne za ludźi w swojim domizniskim wólbnym wokrjesu skutkować, jim pomhać a jich podpěrać“, rjekny Wissel.
Zastupne lisćiki jara požadane
Krótkopowěsće (07.11.18)
Přirada a župa informowałoj
Wojerecy. Tójšto wo pozitiwnych wuskutkach dźěławosće přirady za serbske naležnosće města Wojerec zhoni předsydstwo Maćicy Serbskeje wčera wot zastupjerjow gremija a župy „Handrij Zejler“ na zetkanju w tamnišim Domje Domowiny. Wulki wothłós namaka na přikład poskitk kursa serbšćiny za přistajenych měšćanskeho zarjada. Maćica zaběraše so tež z přihotami hłowneje zhromadźizny klětu 9. měrca.
Namjety prašane
Kamjenc. Lessingowe město prosy wobydlerjow, towarstwa a zwjazki, namjetować ludźi, kotrychž móhli za čestnohamtski angažement počesćić. Kaž na internetnej stronje Kamjenca rěka, wyši měšćanosta na nowolětnych přijećach 20 wobydlerjow jako dźak za skutkowanje tradicionalnje wuznamjenja. Namjety přijimuja w radnicy hač do 3. decembra. Nowolětne přijeće budźe klětu 1. februara.
Stres z přirodu přewinyć
Krótkopowěsće (06.11.18)
Rjemjesło sobu zapřijeć
Grodk. Grodkowski zapósłanc zwjazkoweho sejma dr. Klaus-Peter Schulze (CDU) wobžaruje, zo njeje rjemjesło w komisiji za rozrost, strukturnu změnu a dźěło zastupjene. Po jeho słowach wučinja přerězna mzda we Łužicy z hórniskim wobłukom 4 200 eurow, bjez njeho 2 200 eurow. „Rjemjesło wotwisuje wot wuhloweho a energijoweho hospodarstwa, zwotkelž ma wjele nadawkow.“
Přepytuja mysterij materije
Genf. Z nowymaj eksperimentomaj chcedźa wědomostnicy Europskeje organizacije za jadrowe slědźenje (CERN) přepytować, čehodla eksistuje w swětnišću wjele wjace materije hač antimaterije. Byrnjež wobě přirunajomne fyzikaliske kajkosće měłoj, njeje dotal teorije za njewurunane rozdźělenje. Wčera su slědźerjo tohodla nowej připrawje za produkciju antiwodźika zapinyli.
Zapozdźenja a wupady
Krótkopowěsće (05.11.18)
Dźesać namjetow zapodatych
Budyšin. Dźesać wosobow ze serbskich zjednoćenstwow je zwólniwych kandidować za radu Załožby za serbski lud. Wo tym informuje Domowina, po tym zo je so doba zapodaća namjetow minjeny štwórtk skónčiła. Wólbna komisija namjety nětko pruwuje. Sakskich čłonow załožboweje rady wuzwoli Zwjazkowe předsydstwo Domowiny na swojim posedźenju 14. decembra w Chrósćicach.
Hižo 750 podpismow
Pančicy-Kukow. Po druhim tydźenju naprašowanja je skupina Kukowske prašaki hižo wjace hač 750 podpismow zezběrała. Z toho je so 713 Serbow přećiwo aktualnej formje Serbskeho sejma wuprajiło. Jeničce sydomatřicećo, něhdźe pjeć procentow, su za sejm hłosowali. Podpismowa akcija běži hač do kónca lěta. Wjacori zajimcy nawjazachu kontakt ke Kukowskim prašakam. Tež w Delnjej Łužicy přichodnje podpisma zběraja.
Za mnohotnosć w redakcijach
Krótkopowěsće (02.11.18)
Nóžkuja za klimu po Łužicy
Wojerecy. Ekumeniski putniski puć za klimowu sprawnosć přeprěči łužiski brunicowy rewěr póndźelu, 5. nowembra, wot Wojerec do Gubina. Zwjazkowy předsyda wobswětoweho zwjazka Zelena liga Renej Šuster z Choćebuza wot Wojerec do Rownoho sobu nóžkuje. K centralnym žadanjam putniskeho puća słuša wudobywanje brunicy sčasom skónčić, zo by ke klimowej sprawnosći po cyłym swěće dóšło.
Hłosy po wólbach zjawnje wuliča
Njebjelčicy. Registrowani wolerjo za wólby Serbskeho sejma móža hišće hač do jutřišeho, 3. nowembra, w 10 hodź. swoje wólbne listy w běrowje wólbneho wuběrka na Hłownej 9 w Njebjelčicach wosobinsce wotedać. Potom započnu čłonojo wólbneho wuběrka hłosy wuličeć. Zjawne wuličenje móža zajimcy na městnje sćěhować.
Za moderny bliskowobchad
Krótkopowěsće (01.11.18)
Prěni roman Zwahra wušoł
Lipsk. Hartmut Zwahr wuda swój roman „Božemje dać“. W nim powěda stawiznu hólčeca, kiž na nawrót swojeho nana z wójny čaka, a rysuje wobraz Łužicy kołowokoło kónca Druheje swětoweje wójny. Prěnja ryzy literarna kniha emeritowaneho profesora za socialne a towaršnostne stawizny Uniwersity Lipsk je w nakładnistwje Sax wušła. Klětu ma tam tež druhi zwjazk „Lipsk – Studentski roman“ wuńć.
Najlěpše kniharnje mytowane
Kassel. Zwjazkowa ministerka za medije a kulturu Monika Grütters (CDU) je wčera dohromady 118 njewotwisne a wot mějićelow wobhospodarjene kniharnje wuznamjeniła. Mjez wobchodami třećeje, ze 7 000 eurami dotěrowaneje kategorije „wurjadne předawanišćo“ stej tež kniharnja a pisanski běrow Angeliki Heinrich w Biskopicach.
Podpěruja sadowcowy projekt
Krótkopowěsće (30.10.18)
Pozitiwny trend traje
Budyšin. We wuchodnej Sakskej je nětko kónc oktobra 17 862 bjezdźěłnych, 401 wosoba mjenje hač w septembrje a 1 509 mjenje hač před lětom. „Zwólniwosć předewzaćow, ludźi přistajić, je wulka a wužadanja, zo bychu městna wobsadźili, přiběraja“, rjekny nowinarjam dźensa Thomas Berndt, předsyda jednaćelstwa Budyskeje agentury za dźěło.
Z Gorbačowom festiwal zahajili
Lipsk. Podawki lěta 1968, kaž Praske nalěćo, protesty přećiwo wójnje we Vietnamje a studentske zběžki su ćežišćo lětušeho 61. filmoweho festiwala DOK Lipsk. Prěni raz nałožowana kwota zaruča, zo je 40 procentow přinoškow pod režiju žonow nastał. Na wčerawšim wotewrjenju pokazachu jako zazběh dokumentaciju Wernera Herzoga „Zetkanje z Gorbačowom“.
Nowaj sobudźěłaćerjej w SI
Krótkopowěsće (29.10.18)
FDP z nowym předsydstwom
Kamjenc. Budyski wokrjesny zwjazk FDP je zašły pjatk na stronskim zjězdźe w Kamjencu nowe předsydstwo wuzwolił. Nowy a bywši předsyda je Budyski měšćanski radźićel Mike Hauschild. Za jeho naměstnika wuzwolichu Thomasa Kunza a za pokładnika Holgera Johnu. Dalši čłonojo su Sirko Rosenberg, Stefan Richter, Katharina Gerber, Reiner Deutschmann, Matthias Schniebel a Martin Nedo.
IG metal konferencu přewjedła
Kamjenc. Něhdźe 60 aktiwnych čłonow dźěłarnistwa IG metal z najwšelakorišich zawodow je so sobotu na konferency w Kamjencu wobdźěliło. Na diskusijach a forumach woni zhonichu, što sobustawow dźěłarnistwa zajimuje. Zdobom wuwiwachu plany, kak móhli so přichodnje zaměrnišo za dobre tarifowe zrěčenja zasadźić a dobrych zawodnych radźićelow zdobyć.
W Pólskej čitałoj
Krótkopowěsće (26.10.18)
Mostowe myto Libeskindej
Zhorjelc. Daniel Libeskind dóstanje dźensa Mjezynarodne mostowe myto europskeho města Zhorjelca-Zgorzeleca lěta 2018. Myto za spěchowanje dorozumjenja mjez ludami je sej ameriski architekt zasłužił, dokelž „wěnuje so temam, kotrež hłubiny stawiznow 20. a 21. lětstotka wotbłyšćuja a k dopóznaću wjedu, zo njesmědźa so nihdy wospjetować“, we wobkrućenju rěka.
Kockert direktny kandidat
Njedźichow. 43lětny Mathias Kockert nastupi we wólbnym wokrjesu 54 (Budyšin 3) za CDU jako direktny kandidat a naslědnik Stanisława Tilicha k wólbam Sakskeho krajneho sejma klětu 1. septembra. 98,3 procenty z wobdźělenych 61 čłonow CDU na wólbnowokrjesnej zhromadźiznje su wutoru w Njedźichowje za Kulowčana hłosowali. „Trjebamy zhromadnosć město pačenja a nadźiju město pesimizma“, je wón přeswědčeny.
Dalše wujasnjenja trěbne
